ཞི་ཅིན་ཕིང་གིས་ཏང་གི་ཚོགས་ཆེན་ཉི་ཤུ་པའི་སྙིང་དོན་སློབ་སྦྱོང་དང་ལག་དོན་འཁྱོལ་བྱེད་པའི་ཞིབ་འཇུག་བགྲོ་གླེང་འཛིན་གྲྭའི་འགོ་ཚུགས་མཛད་སྒོའི་ཐོག་གསུང་བཤད་གལ་ཆེན་གནང་།

   གསར་དུ་བདམས་བསྐོས་ཐོབ་པའི་ཀྲུང་དབྱང་ཨུ་ལྷན་གྱི་ཨུ་ཡོན་དང་རྗེས་སྣོན་ཨུ་ཡོན། ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་དང་། ཏང་གི་ཚོགས་ཆེན་ཉི་ཤུ་པའི་སྙིང་དོན་སློབ་སྦྱོང་དང་ལག་བསྟར་དོན་འཁྱོལ་བྱེད་པའི་ཞིབ་འཇུག་བགྲོ་གླེང་འཛིན་གྲྭ་དེ་ཚེས་བདུན་ཉིན་གྱི་སྔ་དྲོར་ཀྲུང་དབྱང་ཏང་གི་སློབ་གྲྭ། རྒྱལ་ཁབ་སྲིད་འཛིན་སློབ་གླིང་ནས་ཚོགས་འགོ་བརྩམས། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གིས་འགོ་ཚུགས་མཛད་སྒོའི་ཐོག་གསུང་བཤད་གལ་ཆེན་གནང་སྟེ། ཀྲུང་གོའི་ལུགས་ཀྱི་དེང་རབས་ཅན་གྱི་རིགས་གཞུང་ཕྱོགས་བསྡོམས་བྱས་པར་མ་ཟད་གསལ་བཤད་ཟབ་མོ་གནང་བ་ནི་ཏང་གི་ཚོགས་ཆེན་ཉི་ཤུ་པའི་རིགས་གཞུང་གསར་གཏོད་གལ་ཆེན་ཡིན་པ་དང་། ཚན་རིག་དང་མཐུན་པའི་སྤྱི་ཚོགས་རིང་ལུགས་ཀྱི་གྲུབ་འབྲས་གསར་པ་དང་གལ་ཆེན་ཡིན། ཀྲུང་གོའི་ལུགས་ཀྱི་དེང་རབས་ཅན་ནི་ང་ཚོ་ཏང་གིས་རྒྱལ་ཡོངས་མི་རིགས་སོ་སོའི་མི་དམངས་སྣེ་ཁྲིད་ནས་དུས་ཡུན་རིང་བའི་འཚོལ་ཞིབ་དང་། ལག་ལེན་ནང་དཀའ་སྤྱད་སྡུག་རུས་བྱེད་པ། འབད་བརྩོན་ཆེན་པོ་བྱས་ནས་ཐོབ་པའི་གྲུབ་འབྲས་གལ་ཆེན་ཡིན་པས། ང་ཚོས་ངེས་པར་དུ་གཅེས་སྤྲས་དང་རྒྱུན་འཁྱོངས། རྒྱུན་མི་ཆད་པར་རྒྱ་སྐྱེད་དང་ཟབ་སྤེལ་གཏོང་དགོས་ཞེས་ནན་གསུང་གནང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་ལི་ཆང་གིས་འགོ་ཚུགས་མཛད་སྒོ་གཙོ་སྐྱོང་གནང་ཞིང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་ཀྲའོ་ལེ་ཅི་དང་། ཝང་ཧུའུ་ཉིང་། ཚའེ་ཆི། ཏིང་ཞུའེ་ཞང་། ལི་ཞི་བཅས་འགོ་ཚུགས་མཛད་སྒོའི་ནང་ཞུགས།

  ཞི་ཅིན་ཕིང་གིས། ཀྲུང་ཧྭ་མི་རིགས་རླབས་ཆེན་བསྐྱར་དར་ནི་ཉེ་རབས་ནས་བཟུང་ཀྲུང་གོ་མི་དམངས་ཀྱི་ཐུན་མོང་གི་ཕུགས་བསམ་རེད། མཛངས་པ་དུ་མས་དེའི་ཆེད་དུ་དཀའ་སྤྱད་སྡུག་རུས་དང་འཚོལ་ཞིབ་ཚོད་ལྟ་གང་མང་བྱས་ཀྱང་འཚོལ་རྙེད་བྱེད་ཐུབ་མེད། ཀྲུང་གོའི་དེང་རབས་ཅན་གྱི་ལམ་བུ་འཚོལ་རྙེད་ཀྱི་ལས་འགན་དེ་ཀྲུང་གོ་གུང་ཁྲན་ཏང་གི་ཕྲག་ཏུ་བབས་ཡོད་ལ། དམངས་གཙོ་རིང་ལུགས་གསར་པའི་གསར་བརྗེ་དུས་རབས་སུ་རང་ཏང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་ནས་འཐབ་འཛིང་གང་ནུས་དང་དཀའ་ཁྱད་བསད་བྱས་ཏེ། བྱང་འདུལ་དམག་འཁྲུག་དང་ཞིང་ས་བཅོས་སྒྱུར་དམག་འཁྲུག འཇའ་འགོག་དམག་འཁྲུག  བཅིངས་འགྲོལ་དམག་འཁྲུག་བཅས་ཀྱིས་བཙན་རྒྱལ་རིང་ལུགས་དང་བཀས་བཀོད་རྒྱུད་འཛིན་སྤྱི་ཚོགས་ཀྱི་སྟོབས་ཤུགས་ཆེན་པོ་གསུམ་རྡུལ་དུ་བརླགས་པས། མི་དམངས་ཀྱིས་རང་ཁྱིམ་རང་བདག་གི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་བཙུགས། མི་རིགས་རང་བཙན་དང་མི་དམངས་བཅིངས་འགྲོལ་ཐོབ་པས་དེང་རབས་ཅན་ལ་མཐུན་རྐྱེན་བསྐྲུན་ཡོད། ཀྲུང་གོ་གསར་པ་དབུ་བརྙེས་རྗེས་རང་རེའི་ཏང་གིས་མི་དམངས་མཐུན་སྒྲིལ་དང་སྣེ་ཁྲིད་ནས་སྤྱི་ཚོགས་རིང་ལུགས་གསར་བརྗེ་དང་། ཀྲུང་གོའི་ལོ་ངོ་སྟོང་ཕྲག་རིང་གི་བཀས་བཀོད་རྒྱུད་འཛིན་ལམ་ལུགས་རྩ་མེད་བཏང་། སྤྱི་ཚོགས་རིང་ལུགས་ཀྱི་རྩ་བའི་ལམ་ལུགས་འཛུགས་སྐྱོང་དང་ཀྲུང་ཧྭ་མི་རིགས་ཀྱི་ལོ་རྒྱུས་ཐོག་གཞི་རྒྱ་ཆེ་བ་དང་དོན་སྙིང་ཆེ་ཤོས་ཀྱི་སྤྱི་ཚོགས་བཅོས་སྒྱུར་བཏང་ནས། རང་ཚུགས་དང་ཆ་ཚང་བའི་བཟོ་ལས་མ་ལག་དང་རྒྱལ་དམངས་དཔལ་འབྱོར་མ་ལག་བཙུགས་ཡོད། སྤྱི་ཚོགས་རིང་ལུགས་གསར་བརྗེ་དང་འཛུགས་བསྐྲུན་ཐད་ཁྱད་དུ་འཕགས་པའི་རིགས་གཞུང་དང་གྲུབ་འབྲས་ཆེན་པོ་ཐོབ་བས། དེང་རབས་ཅན་གྱི་འཛུགས་བསྐྲུན་ལ་གཞི་རྩའི་ཆབ་སྲིད་སྔོན་འགྲོ་དང་ཉམས་མྱོང་རྩ་ཆེན། རིགས་གཞུང་གྲ་སྒྲིག་དང་དངོས་པོའི་རྨང་གཞི་ཡག་པོ་བཏིང་ཡོད། བཅོས་སྒྱུར་སྒོ་འབྱེད་དང་སྤྱི་ཚོགས་རིང་ལུགས་འཛུགས་བསྐྲུན་གྱི་དུས་རབས་གསར་པའི་ནང་། རང་རེའི་ཏང་གིས་ཏང་དང་རྒྱལ་ཁབ་ཀྱི་ལས་དོན་གཙོ་བོ་དཔལ་འབྱོར་འཛུགས་བསྐྲུན་ལ་ཁ་ཕྱོགས་ནས། བཅོས་སྒྱུར་སྒོ་འབྱེད་ཀྱི་ལོ་རྒྱུས་རང་བཞིན་གྱི་འཐབ་ཇུས་བཀོད་སྒྲིག་བྱས་ཤིང་། ལག་ལེན་ཀྱི་རྨང་གཞིའི་ཐོག་གི་རིགས་གཞུང་གསར་གཏོད་དང་ལམ་ལུགས་གསར་གཏོད། རིག་གནས་གསར་གཏོད། དེ་མིན་གྱི་གསར་གཏོད་འདྲ་མིན་སྣ་ཚོགས་བྱས་ཡོད།

   སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་སྒྲིག་གཞི་ལག་བསྟར་བྱས་ནས། ཐོན་སྐྱེད་ནུས་པ་ཅུང་རྗེས་ལུས་ཡིན་པའི་གནས་བབ་ནས། དཔལ་འབྱོར་གྱི་བསྡོམས་ཚད་ཨང་གཉིས་པ་ཡིན་པའི་ལོ་རྒྱུས་ཅན་གྱི་ཐོད་རྒལ་མངོན་འགྱུར་བྱས་ཡོད། མི་དམངས་ཀྱི་འཚོ་བ་ལྟོ་གོས་མི་འདང་བ་ནས་སྤྱིའི་ཆ་ནས་འབྱོར་འབྲིང་དང་ཁྱོན་ཡོངས་ནས་འབྱོར་འབྲིང་མངོན་འགྱུར་བྱེད་པའི་ལོ་རྒྱུས་རང་བཞིན་གྱི་ཐོད་རྒལ་མངོན་འགྱུར་བྱས་ཡོད། ཀྲུང་གོའི་ལུགས་ཀྱི་དེང་རབས་ཅན་གྱི་ཆེད་དུ་གསོན་ཤུགས་གསར་པ་རྒྱས་པའི་སྒྲིག་གཞིའི་འགན་སྲུང་དང་། འཕེལ་རྒྱས་མགྱོགས་པོར་འགྲོ་བཞིན་པའི་དངོས་པོའི་ཆ་རྐྱེན་མཁོ་འདོན་བྱས་ཡོད་ཅེས་གསུངས་པ་རེད།

   ཞི་ཅིན་ཕིང་གིས། ཏང་གི་ཚོགས་ཆེན་བཅོ་བརྒྱད་པ་ནས་བཟུང་། རང་རེའི་ཏང་གིས་ད་ཡོད་ཀྱི་རྨང་གཞིའི་ཐོག་མུ་མཐུད་དུ་མདུན་བསྐྱོད་བྱས་ཏེ། མུ་མཐུད་དུ་རིག་གཞུང་དང་ལག་ལེན་ཐད་ཀྱི་གསར་གཏོད་ཐོད་རྒལ་མངོན་འགྱུར་བྱས་ཡོད། ཀྲུང་གོའི་ལུགས་ཀྱི་དེང་རབས་ཅན་བདེ་བླགས་ངང་དར་སྤེལ་དང་རྒྱ་བསྐྱེད་ཡོད། ང་ཚོས་ངོས་ཟིན་ཐད་མུ་མཐུད་དུ་དུས་རབས་གསར་པའི་ཀྲུང་གོའི་ཁྱད་ཆོས་ཅན་གྱི་སྤྱི་ཚོགས་རིང་ལུགས་ཀྱི་དགོངས་པ་ཟབ་སྤེལ་དང་གསར་འཛུགས་བྱས་ནས། མར་ཁེ་སི་རིང་ལུགས་ཀྲུང་གོ་ཅན་དང་དུས་རབས་ཅན་གྱི་ཐོད་རྒལ་གསར་པ་མངོན་འགྱུར་བྱས་ཡོད། ཀྲུང་གོའི་ལུགས་ཀྱི་དེང་རབས་ཅན་ལ་རྩ་བའི་སྲུང་བྱ་མཁོ་སྤྲོད་བྱས་ཡོད། ང་ཚོས་ཀྲུང་གོའི་ལུགས་ཀྱི་དེང་རབས་ཅན་གྱི་ནང་སྙིང་དང་ངོ་བོའི་ངོས་ཟིན་ཟབ་སྤེལ་བཏང་ནས། ཀྲུང་གོའི་ལུགས་ཀྱི་དེང་རབས་ཅན་གྱི་ཀྲུང་གོའི་ཁྱད་ཆོས་དང་ངོ་བོའི་བླང་བྱ། རྩ་དོན་གལ་ཆེན་ཕྱོགས་བསྡོམས་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་རིག་པའི་གཞུང་ལུགས་ཀྱི་མ་ལག་ཐོག་མ་གྲུབ་པར་བྱས་ནས། ཀྲུང་གོའི་ལུགས་ཀྱི་དེང་རབས་ཅན་སྔར་ལས་གསལ་བ་དང་སྔར་ལས་ཚན་རིག་དང་མཐུན་པ། སྔར་ལས་ཚོར་ཐུབ་པ་དང་ལག་བསྟར་བྱེད་ཐུབ་པར་བྱས་ཡོད། ང་ཚོས་ཐབས་ཇུས་ཐད་མུ་མཐུད་དུ་འཐུས་ཚང་བཏང་ནས། ཚན་རིག་སློབ་གསོ་ཡིས་རྒྱལ་ཁབ་དར་རྒྱས་གཏོང་བའི་འཐབ་ཇུས་དང་འཇོན་མི་ཡིས་རྒྱལ་ཁབ་སྟོབས་ལྡན་གཏོང་བའི་འཐབ་ཇུས། གྲོང་གསེབ་དར་རྒྱས་ཀྱི་འཐབ་ཇུས་སོགས་འཐབ་ཇུས་གལ་ཆེན་རབ་དང་རིམ་པ་ལག་བསྟར་ཟབ་མོ་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་ལ་འཐབ་ཇུས་ཀྱི་འདེགས་རྟེན་བརྟན་པོ་མཁོ་སྤྲོད་བྱས་ཡོད། ང་ཚོས་ལག་ལེན་ཐད་མུ་མཐུད་དུ་ཕུན་སུམ་ཇེ་ཚོགས་བཏང་ནས། འཕོ་འགྱུར་རང་བཞིན་གྱི་ལག་ལེན་རབ་དང་རིམ་པ་དང་། ཐོད་རྒལ་རང་བཞིན་གྱི་འཕེལ་རིམ་རབ་དང་རིམ་པ་མངོན་འགྱུར། མཚོན་དཔེ་ཐུབ་པའི་གྲུབ་འབྲས་རབ་དང་རིམ་པ་བརྩོན་ལེན་བྱས་ནས། ཏང་དང་རྒྱལ་ཁབ་ཀྱི་བྱ་གཞག་གིས་ལོ་རྒྱུས་རང་བཞིན་གྱི་གྲུབ་འབྲས་ལོན་པ་དང་ལོ་རྒྱས་རང་བཞིན་གྱི་འཕོ་འགྱུར་བྱུང་གང་ཐུབ་བྱེད་པ། ཁྱད་པར་དུ་མཐའ་གཅིག་ཏུ་དབུལ་ཕོངས་ཡིན་པའི་གནད་དོན་མེད་པར་བཟོས་ནས། ཁྱོན་ཡོངས་ནས་སྤྱི་ཚོགས་རིང་ལུགས་ཀྱི་འབྱོར་འབྲིང་སྤྱི་ཚོགས་འཛུགས་སྐྱོང་བྱེད་པ་དང་། ཀྲུང་གོའི་ལུགས་ཀྱི་དེང་རབས་ཅན་ལ་ལམ་ལུགས་ཀྱི་ཁག་ཐེག་སྔར་ལས་འཐུས་ཚང་དང་དངོས་པོའི་རྨང་གཞི་སྔར་ལས་བརྟན་པོ། བསམ་པའི་སྟོབས་ཤུགས་སྔར་ལས་རང་རྟོག་བཅས་མཁོ་སྤྲོད་བྱས་ཡོད་ཞེས་ནན་གསུངས་གནང་བ་རེད།

  ཞི་ཅིན་ཕིང་གིས། ཏང་གི་སྣེ་ཁྲིད་ནི་ཀྲུང་གོའི་ལུགས་ཀྱི་དེང་རབས་ཅན་གྱི་ཁ་ཕྱོགས་དང་མ་འོངས་མདུན་ལམ་དང་། ཆེས་མཐའ་མཇུག་གི་རྒྱལ་ཕམ་བཅས་ལ་ཐད་ཀར་འབྲེལ་བ་ཡོད། ཏང་གི་སྣེ་ཁྲིད་ཀྱིས་ཀྲུང་གོའི་ལུགས་ཀྱི་དེང་རབས་ཅན་གྱི་རྩ་བའི་ངོ་བོ་གཏན་འཁེལ་བྱེད་ཅིང་། བློ་བརྟན་འགྱུར་མེད་ཀྱིས་ཏང་གི་སྣེ་ཁྲིད་མཐའ་འཁྱོངས་བྱས་ན། ཀྲུང་གོའི་ལུགས་ཀྱི་དེང་རབས་ཅན་ལ་ད་གཟོད་མདུན་ལམ་འོད་སྟོང་འབར་བ་དང་། དར་ཞིང་རྒྱས་ཐུབ། དེ་མིན་ན་ཡང་དག་པའི་ཁ་ཕྱོགས་དང་འགལ་ཞིང་། རྩ་བའི་སྲོག་ཤིང་འབོ་སྲིད། ཐ་ན་མགོ་རྟིང་སློག་པའི་ནོར་འཁྲུལ་ཡང་བཟོ་སྲིད། ཏང་གི་སྣེ་ཁྲིད་ཀྱིས་ཀྲུང་གོའི་ལུགས་ཀྱི་དེང་རབས་ཅན་གྱི་འབད་བརྩོན་དམིགས་འབེན་དང་ཕུགས་འདུན་ཆེན་པོ་གཏན་འཁེལ་ཐུབ་པར་འགན་སྲུང་བྱེད་ཅིང་། ང་ཚོའི་ཏང་གི་འབད་བརྩོན་དམིགས་འབེན་ནི་མི་རབས་ནས་མི་རབས་ཤུགས་བཏོན་ཏེ། ཚང་མས་དོ་སྣང་ཐོབ་པ་དང་ལོ་རྒྱུས་སུ་འགོད་ཆོག་པའི་འོད་སྟོང་འབར་བའི་གྲུབ་འབྲས་ཐོབ་ཡོད། ཏང་གི་སྣེ་ཁྲིད་ཀྱིས་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་གྱི་སྒུལ་ཤུགས་སློང་ཐུབ། ང་ཚོའི་ཏང་གིས་བཅོས་བསྒྱུར་གསར་གཏོད་བྱེད་ཕོད་པ་དང་། རྒྱུན་ཆད་མེད་པར་སྒྲིག་གཞི་དང་ལམ་ལུགས་ཀྱི་བཀག་རྒྱ་དཀྲོལ་ནས། ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་ཐད་སྟོབས་ཤུགས་ཆེན་པོ་བཏོན་ཡོད། ཏང་གི་སྣེ་ཁྲིད་ལ་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་བྱེད་པའི་སྟོབས་ཤུགས་འཛོམས་ཡོད། ང་ཚོའི་ཏང་གིས་མང་ཚོགས་ལམ་ཕྱོགས་མཐའ་འཁྱོངས་དང་། མི་དམངས་ལྟེ་བར་འཛིན་པའི་འཕེལ་རྒྱས་བསམ་བློ་མཐའ་འཁྱོངས། བརྒྱུད་རིམ་ཧྲིལ་བོར་མི་དམངས་དམངས་གཙོ་འཕེལ་རྒྱས་བཏང་བ། མི་དམངས་ཡོངས་ཀྱི་བདག་པོའི་སྙིང་སྟོབས་དར་སྤེལ་བཏང་ཡོད་ཅེས་གསུངས།

  ཞི་ཅིན་ཕིང་གིས། རྒྱལ་ཁབ་ཅིག་དེང་རབས་ཅན་དུ་སྐྱོད་དགོས་ན་དེང་རབས་ཅན་གྱི་རྩ་བའི་ཆོས་ཉིད་བརྩི་སྲུང་བྱ་དགོས་པར་མ་ཟད། དེ་བས་ཀྱང་རང་གི་རྒྱལ་ཁབ་ཀྱི་དངོས་ཡོད་གནས་ཚུལ་དང་བསྟུན་ཞིང་། རང་གི་རྒྱལ་ཁབ་ཀྱི་ཁྱད་ཆོས་ལྡན་དགོས། ཀྲུང་གོའི་ལུགས་ཀྱི་དེང་རབས་ཅན་ལ་རྒྱལ་ཁབ་ཁག་གི་དེང་རབས་ཅན་གྱི་ཐུན་མོང་ཁྱད་ཆོས་ལྡན་པར་མ་ཟད། རང་གི་རྒྱལ་ཁབ་ཀྱི་དངོས་ཡོད་གནས་ཚུལ་ལ་གཞིགས་པའི་ཁྱད་ཆོས་མངོན་གསལ་ལྡན། ཏང་གི་ཚོགས་ཆེན་ཉི་ཤུ་པའི་སྙན་ཞུའི་ནང་དུ། ཀྲུང་གོའི་ལུགས་ཀྱི་དེང་རབས་ཅན་ནི་མི་འབོར་ཆེས་ཆེ་བའི་དེང་རབས་དང་། མི་དམངས་ཡོངས་མཉམ་དུ་ཕྱུག་འགྱུར་བྱུང་བའི་དེང་རབས་ཅན། དངོས་པོའི་དཔལ་ཡོན་དང་བསམ་པའི་དཔལ་ཡོན་ཕན་ཚུན་མཐུན་སྦྱོར་བྱེད་པའི་དེང་རབས་ཅན། མི་དང་རང་བྱུང་ཁམས་འཆམ་མཐུན་མཉམ་གནས་ཀྱི་དེང་རབས་ཅན། ཞི་བས་འཕེལ་རྒྱས་ཀྱི་ལམ་དུ་སྐྱོད་པའི་དེང་རབས་ཅན་བཅས་ཕྱོགས་ལྔའི་ཀྲུང་གོའི་ཁྱད་ཆོས་ལྡན་པ་ཞིག་ཡིན་ཞེས་ཕྱོགས་བསྡོམས་བྱས་ཡོད། ཀྲུང་གོའི་ལུགས་ཀྱི་དེང་རབས་ཅན་གྱི་ཚན་རིག་དང་མཐུན་པའི་ནང་དོན་འགྲེལ་བཤད་ཟབ་མོ་བྱས་ཡོད། དེ་ནི་གཞུང་ལུགས་ཀྱི་སྤྱི་བསྡོམས་ཞིག་ཡིན་པར་མ་ཟད། ལག་ལེན་གྱི་དགོས་མཁོ་ཞིག་ཀྱང་ཡིན། ཁྱོན་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་སྟོབས་ལྡན་རྒྱལ་ཁབ་བསྐྲུན་པ་དང་། ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེར་བགྲོད་ལམ་ཆེན་པོ་བསྟན་ཡོད།

ཀྲུང་གོ་གསར་པ་དབུ་བརྙེས་པ་དང་ཁྱད་པར་དུ་བཅོས་བསྒྱུར་སྒོ་འབྱེད་བྱེད་པའི་ཚུན་དུ། ང་ཚོ་ལོ་ངོ་བཅུ་ཕྲག་ལྷག་གི་རིང་ལ་དར་རྒྱས་ཆེ་བའི་ནུབ་ཕྱོགས་རྒྱལ་ཁབ་ཀྱི་ལོ་ངོ་བརྒྱ་ཕྲག་མང་པོའི་རིང་གི་བཟོ་ལས་ཅན་གྱི་བརྒྱུད་རིམ་མཇུག་རྫོགས་ནས། དཔལ་འབྱོར་མགྱོགས་མྱུར་དུ་འཕེལ་རྒྱས་དང་སྤྱི་་ཚོགས་ཡུན་རིང་གོང་འཕེལ་ཡོང་བའི་ངོ་མཚར་བསྐྲུན་ཡོད། ཀྲུང་ཧྭ་མི་རིགས་བསྐྱར་དར་རླབས་པོ་ཆེར་མདུན་ལྗོངས་རྒྱ་ཆེན་པོ་བཏོད་ཡོད།ལག་ལེན་ལས་ར་སྤྲོད་ཐུབ་པ་ལྟར་ན། ཀྲུང་གོའི་ལུགས་ཀྱི་དེང་རབས་ཅན་ལག་ལེན་བསྟར་ཐུབ་པ་དང་བརྟན་པོ་ཡིན་པས། སྟོབས་ལྡན་རྒྱལ་ཁབ་ཀྱི་མི་རིགས་བསྐྱར་དར་ཡོང་བའི་ཐབས་ལམ་ཡང་དག་ཁོ་ན་ཡིན་པ་རེད་ཅེས་གསུངས།ཞི་ཅིན་ཕིང་གིས་ཀྲུང་གོའི་ལུགས་ཀྱི་དེང་རབས་ཅན་ནི་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ལ་བརྟེན་པ་དང་།ཚན་རིག་དང་མཐུན་པའི་སྤྱི་ཚོགས་རིང་ལུགས་ཀྱི་སྔོན་ཐོན་རང་བཞིན་མཚོན་ཡོད། འགྲོ་བའི་མིའི་ཕུལ་བྱུང་དཔལ་ཡོན་གྱི་གྲུབ་འབྲས་ཡོད་ཚད་བསྡུ་ལེན་བྱས་ཡོད། དེ་ནི་འགྲོ་བ་མིའི་རིགས་ཡར་རྒྱས་གོང་འཕེལ་ཡོང་བའི་ཁ་ཕྱོགས་དང་། ནུབ་ཕྱོགས་དེང་རབས་ཅན་གྱི་རྣམ་པ་དང་མི་འདྲ་བའི་ཐབས་ལམ་གསར་པ་མཚོན་པ་དང་། དེ་ནི་འགྲོ་བ་མིའི་རིགས་ཀྱི་དཔལ་ཡོན་རྣམ་པ་གསར་པ་ཞིག་རེད། ཀྲུང་གོའི་ལུགས་ཀྱི་དེང་རབས་ཅན་གྱིས་དེང་རབས་ཅན་ནི་ནུབ་ཕྱོགས་ཅན་མིན་པ་གསལ་འབྱེད་བྱས་ནས།དེང་རབས་ཅན་གྱི་ཐབས་ལམ་གཞན་ཞིག་བཏོད་ཡོད། འཕེལ་རྒྱས་འགྲོ་བཞིན་པའི་རྒྱལ་ཁབ་དེང་རབས་ཅན་དུ་བསྒྱུར་བའི་ཐབས་ལམ་གདམ་ག་རྒྱ་སྐྱེད་བཏང་ཡོད། འགྲོ་བ་མིའི་རིགས་ཀྱིས་ལམ་ལུགས་སྔར་ལས་ཡག་པོ་འཚོལ་ཞིབ་བྱེད་པར་ཀྲུང་གོའི་ཇུས་གཞི་བཏོན་ཡོད། ཀྲུང་གོའི་ལུགས་ཀྱི་དེང་རབས་ཅན་གྱིས་མཚོན་པའི་ཁྱད་དུ་འཕགས་པའི་འཇིག་རྟེན་ལྟ་བ་དང་རིན་ཐང་ལྟ་བ། ལོ་རྒྱུས་ལྟ་བ། དཔལ་ཡོན་ལྟ་བ།དམངས་གཙོའི་ལྟ་བ།སྐྱེ་ཁམས་ལྟ་བ་བཅས་དང་རླབས་ཆེན་ལག་ལེན་གྱིས་འཛམ་གླིང་དེང་རབས་ཅན་གྱི་རིགས་གཞུང་དང་ལག་ལེན་ལ་གསར་གཏོད་ཆེན་པོ་བྱས་ཡོད།ཀྲུང་གོའི་ལུགས་ཀྱི་དེང་རབས་ཅན་གྱིས་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་རང་རྐྱ་འཕེར་བའི་སྒོ་ནས་དེང་རབས་ཅན་དུ་སྐྱོད་པར་དཔེ་སྟོན་བྱས་ཡོད་པར་མ་ཟད། གདམ་ག་གསར་པ་བཏོན་ཡོད་ཅེས་ནན་གསུང་གནང་།ཞི་ཅིན་ཕིང་གིས་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྱོང་བྱེད་པ་ནི་མ་ལག་ཚང་བའི་ལས་གཞི་ཞིག་ཡིན་པས།གཅིག་གྱུར་འཆར་འགོད་དང་།མ་ལག་ཚང་བའི་འཆར་འགོད།སྤྱི་ཡོངས་ནས་སྐུལ་འདེད་གཏོང་དགོས། ཇུས་འགོད་རྩེ་གྲ་དང་ལག་ལེན་འཚོལ་ཞིབ། འཐབ་ཇུས་དང་ཇུས་གཞི། དྲང་བདེན་དང་གསར་གཏོད།ལས་ཆོད་དང་འདྲ་མཉམ། བབ་བསྟུན་དང་སྒྲིག་ལམ། རང་གཅུན་སྒྲིག་ནན་དང་ཕྱི་ཕྱོགས་སྒོ་འབྱེད་སོགས་འབྲེལ་བ་རབ་དང་རིམ་པ་ཐག་གཅོད་ཡང་དག་བྱེད་དགོས།

  མཐོ་རིམ་ཇུས་འགོད་བྱེད་དགོས་ན། འཛམ་གླིང་གི་འཕེལ་ཕྱོགས་ཆེན་མོར་ཞིབ་འཇུག་ཟབ་མོ་བྱེད་པ་དང་མི་དམངས་མང་ཚོགས་ཀྱི་ཐུན་མོང་རེ་བ་དམ་འཛིན་ཡག་པོ་བྱེད་པ། དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཆོས་ཉིད་འཚོལ་ཞིབ་ཟབ་མོ་བྱེད་པ། གཏན་ལ་ཕབ་པའི་འཆར་འགོད་དང་མ་ལག་གིས་དུས་རབས་ཀྱི་རང་བཞིན་མཚོན་པ་དང་ཆོས་ཉིད་ཅན་དམ་དུ་འཛིན་པ། གསར་བསྐྲུན་ནུས་པ་བཏོན་ནས། ད་ལྟ་མ་འོངས་ཟུང་དུ་འབྲེལ་བ་དང་། གོང་འོག་གཅིག་མཐུན། ནང་དོན་མཐུན་སྦྱོར་ཡོང་བ་བཅས་བྱེད་དགོས། ཀྲུང་གོའི་ལུགས་ཀྱི་དེང་རབས་ཅན་གྱི་འཛུགས་བསྐྲུན་བྱེད་པ་ནི་འཚོལ་ཞིབ་ཅན་གྱི་བྱ་གཞག་ཅིག་ཡིན་པས། དཔོག་དཀའ་བའི་ཁྱབ་ཁོངས་ད་རུང་མང་པོ་ཡོད་པས། ང་ཚོས་ལག་ལེན་ཁྲོད་སྤོབས་པ་ཆེན་པོས་འཚོལ་ཞིབ་བྱེད་དགོས། བཅོས་བསྒྱུར་གསར་གཏོད་ལ་བརྟེན་ནས་བྱ་གཞག་འཕེལ་རྒྱས་གཏོང་དགོས། འགྱུར་མེད་མཁྲེགས་འཛིན་དང་ངལ་མེད་འབྲས་ལེན་གྱི་སྟོང་བསམ་བྱེད་མི་རུང་། འཐབ་ཇུས་ཀྱི་རྒྱང་ལྟའི་རང་བཞིན་ཇེ་དྲག་ཏུ་བཏང་ནས། བྱ་གཞག་འཕེལ་རྒྱས་གཏོང་བའི་དགོས་ངེས་ཀྱི་འཕེལ་ཕྱོགས་དམ་འཛིན་ཡག་པོ་བྱེད་དགོས། མདུན་སྐྱོད་ཀྱི་ལམ་བུའི་ཐོག་འབྱུང་སྲིད་པའི་གོ་སྐབས་དང་འགྲན་སློང་ལ་དབྱེ་ཞིབ་ཟབ་མོ་བྱས་ནས། ཚན་རིག་དང་མཐུན་པའི་འཐབ་ཇུས་ཀྱིས་མ་འོངས་ལ་སྔོན་དཔག་དང་སྣེ་ཁྲིད་དགོས། འཐབ་ཇུས་ཀྱི་སྤྱི་ཁོག་རང་བཞིན་ཇེ་དྲག་ཏུ་བཏང་ནས། འཐབ་ཇུས་དམིགས་འབེན་ཇུས་འགོད་བྱེད་པ་དང་འཐབ་ཇུས་བྱེད་ཐབས་གཏན་འབེབས་བྱེད་པ། འཐབ་ཇུས་འཆར་འགོད་བྱེད་པ་བཅས་ཀྱིས་ཏང་དང་རྒྱལ་ཁབ་དར་རྒྱས་རྒུད་དང་འབྲེལ་བའི་གནད་དོན་གལ་ཆེན་ཐག་གཅོད་དགོས། འཐབ་ཇུས་ཀྱི་བརྟན་བརླིང་རང་བཞིན་ཇེ་དྲག་ཏུ་བཏང་ནས། འཐབ་ཇུས་ཆགས་པ་ཙམ་གྱིས་ཡུན་རིང་པོར་རྒྱུན་འཁྱོངས་བྱེད་པ་དང་དམ་འཛིན་མཐའ་འཁྱོལ་བྱེད་པ། ལས་ཕོད་པ་དང་སྒྲུབ་ཕོད་པ་བྱེད་དགོས་པ་ལས། གང་མོས་འགྱུར་ལྡོག་གཏོང་མི་ཆོག འཐབ་ཇུས་ཀྱི་རྩ་དོན་རང་བཞིན་དང་ཐབས་ཇུས་ཀྱི་གང་ལ་གང་འཚམ་རང་བཞིན་ཟུང་འབྲེལ་ཡག་པོ་བྱས་ནས། གང་ལ་ཅི་འོས་དང་སྐབས་བསྟུན་འགྱུར་ལྡོག བློ་ཐག་རྦད་ཆོད། ཡུལ་བབ་དང་འཕེལ་ཕྱོགས་ལ་བསྟུན་ནས་བྱེད་ཐབས་སྤེལ་བ་དང་། གནས་བབ་དང་བསྟུན་ནས་ལས་སྒྲུབ་བྱེད་པའི་གོ་རིམ་ཁྲོད། འཐབ་ཇུས་ཀྱི་རང་རྟོགས་དམ་དུ་འཛིན་དགོས། ཀྲུང་གོའི་ལུགས་ཀྱི་དེང་རབས་ཅན་གྱི་གཞི་རྩ་དང་འབྱུང་ཁུངས། རྩ་བ་དང་སྙིང་དོན་བཅས་སྲུང་སྐྱོང་ཡག་པོ་བྱས་ནས། བློ་བརྟན་འགྱུར་མེད་ཀྱིས་ཀྲུང་གོའི་ལུགས་ཀྱི་དེང་རབས་ཅན་གྱི་ཀྲུང་གོའི་ཁྱད་ཆོས་དང་ངོ་བོའི་བླང་བྱ། རྩ་དོན་གལ་ཆེན་བཅས་རྒྱུན་འཁྱོངས་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་ཡང་དག་པའི་ཁ་ཕྱོགས་ཁག་ཐེག་བྱེད་དགོས། གསར་གཏོད་དེ་རྒྱལ་ཁབ་འཕེལ་རྒྱས་སྤྱི་ཁོག་གི་འབུར་དུ་ཐོན་པའི་གནས་སུ་འཇོག་པ་དང་། དུས་རབས་འཕེལ་རྒྱས་ཀྱི་རེ་བ་དང་བསྟུན་པ་དང་རིགས་གཞུང་དང་ལག་ལེན་ཐད་ཀྱི་གནད་དོན་གལ་ཆེན་ཐག་གཅོད་རྒྱུ་དམིགས་སུ་བཀར་ནས། འགྱུར་ལྡོག་ལ་ངོས་འཛིན་དང་ཁ་གཏད་འཇལ་བ། འཚོལ་ཞིབ་བྱེད་དགོས། བཅོས་བསྒྱུར་གསར་གཏོད་གང་ཐུབ་བྱས་ནས། རྒྱུན་ཆད་མེད་པར་འཕེལ་རྒྱས་ཀྱི་སྒུལ་ཤུགས་དང་ལེགས་ཆ་བསྐྲུན་ནས། སྤྱི་ཚོགས་ཡོངས་ཀྱི་གསར་གཏོད་ནུས་པ་སྐུལ་གང་ཐུབ་བྱེད་དགོས།

  མ་རྩ་རིང་ལུགས་ལས་མཐོ་བའི་ནུས་ཕྱོད་སྐུལ་སྤེལ་གཏོང་དགོས་པར་མ་ཟད། སྤྱི་ཚོགས་འདྲ་མཉམ་ལ་སྲུང་སྐྱོང་ནུས་ལྡན་བྱེད་དགོས། ནུས་ཕྱོད་དང་འདྲ་མཉམ་གཉིས་ཀ་དམ་འཛིན་ཡག་པོ་བྱས་ཏེ། ཕན་ཚུན་སྐུལ་འདེད་དང་ཕན་ཚུན་གཅིག་གྱུར་བྱེད་དགོས། འཕེལ་རྒྱས་དང་བདེ་འཇགས་གཅིག་གྱུར་བཀོད་འདོམས་བྱས་ཏེ། རྒྱལ་ཁབ་ཀྱི་སྤྱིའི་བདེ་འཇགས་ལྟ་བ་ལག་བསྟར་དོན་འཁྱོལ་བྱེད་པ་དང་། རྒྱལ་ཁབ་ཀྱི་བདེ་འཇགས་མ་ལག་འཐུས་ཚང་གཏོང་བ་དང་། རྒྱལ་ཁབ་ཀྱི་བདེ་འཇགས་སྲུང་སྐྱོང་བྱེད་པའི་ནུས་པ་ཇེ་དྲག་གཏོང་དགོས། བློ་བརྟན་འགྱུར་མེད་ཀྱིས་རྒྱལ་ཁབ་ཀྱི་སྲིད་ཏང་བདེ་འཇགས་དང་ལམ་ལུགས་བདེ་འཇགས། འདུ་ཤེས་འཛིན་སྟངས་བདེ་འཇགས། ཁྱབ་ཁོངས་གལ་ཆེན་གྱི་བདེ་འཇགས་སྲུང་སྐྱོང་བྱེད་དགོས། རང་བདག་རང་རྐྱ་དང་རང་སྟོབས་རང་ཚུགས་རྒྱུན་འཁྱོངས་བྱེད་པ་དང་། རྒྱལ་ཁབ་དང་མི་རིགས་ཀྱི་འཕེལ་རྒྱས་རང་ཉིད་ཀྱི་ནུས་པའི་གཞི་རུ་འཛིན་པ་རྒྱུན་འཁྱོངས། རང་རྒྱལ་འཕེལ་རྒྱས་ཀྱི་ལས་དབང་རང་ཉིད་ཀྱི་ལག་ཏུ་དམ་པོར་འཛིན་པ་རྒྱུན་འཁྱོངས་བྱེད་དགོས། མུ་མཐུད་དུ་ཆུ་ཚད་དེ་བས་མཐོ་བའི་ཕྱི་ཕྱོགས་སྒོ་འབྱེད་བྱེད་པ་དང་། འཛམ་གླིང་ཐོན་ལས་ལས་བགོས་དང་མཉམ་ལས་ཁྲོད་ཟབ་ཞུགས་བྱེད་པ་དང་། རྒྱལ་ནང་དང་རྒྱལ་སྤྱིའི་ཐོན་ཁུངས་མི་འདྲ་བ་གཉིས་བེད་སྤྱོད་ཡག་པོ་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་འཕེལ་རྒྱས་ཀྱི་ཁྱབ་ཁོངས་རྒྱ་བསྐྱེད་དགོས་ཞེས་གསུངས་པ་རེད།

  ཞི་ཅིན་ཕིང་གིས། ཀྲུང་གོའི་ལུགས་ཀྱི་དེང་རབས་ཅན་སྐུལ་འདེད་གཏོང་བ་ནི་སྔ་བྱུང་མ་མྱོང་བའི་གསར་གཏོད་ཀྱི་བྱ་གཞག་ཅིག་ཡིན་པས། སྔོན་དཔག་ཐུབ་པ་དང་ལྐོག་གྱུར་གྱི་ཉེན་ཁ་དང་དཀའ་ཉེན་དང་འཇིགས་རུང་གི་འགྲན་སློང་མང་པོ་དང་འཕྲད་ངེས་ཡིན། ངེས་པར་དུ་ཉམས་ཉེན་གྱི་འདུཤེས་ཇེ་དྲག་བཏང་ནས། མ་མཐའི་འདུ་ཤེས་རྒྱུན་འཁྱོངས་བྱེད་པ་དང་། བདེ་བར་སྡོད་སྐབས་ཉེན་ཁ་མི་བརྗེད་པ་དང་ཆུ་མ་ཡོང་གོང་ལ་ཆུ་རགས་དང་། འཐབ་རྩོད་བྱེད་ཕོད་པ་དང་འཐབ་རྩོད་བྱེད་མཁས་པ་བྱེད་དགོས་ལ། འཐབ་རྩོད་ནན་མོ་ལ་བརྟེན་ནས། བྱ་གཞག་འཕེལ་རྒྱས་ཀྱི་རྣམ་པ་གསར་པ་གཏོད་དགོས། འཐབ་ཇུས་དྭངས་གསལ་རྒྱུན་འཁྱོངས་བྱས་ཏེ། ཉེན་ཁ་དང་དཀའ་ཁག་ཅི་དང་འཕྲད་ཀྱང་ནམ་རྒྱུན་འཆར་གཞི་ཡོད་པ་བྱེད་དགོས། འཐབ་ཇུས་རང་རྟོན་རྒྱུན་འཁྱོངས་བྱས་ཏེ་འཐབ་རྩོད་སྤོབས་པ་ཇེ་དྲག་གཏོང་བ། འཐབ་ཇུས་རང་སྒུལ་རྒྱུན་འཁྱོངས་བྱས་ཏེ་འཐབ་རྩོད་རྩལ་ནུས་ཇེ་དྲག་གཏོང་དགོས། ནུས་པ་མཐོར་འདེགས་ཇེ་དྲག་བཏང་ནས། འགོ་ཁྲིད་ལས་བྱེད་དང་ལྷག་པར་དུ་ན་གཞོན་འགོ་ཁྲིད་ལས་བྱེད་ལ་བསམ་བློའི་ཐད་ཀྱི་སྦྱོང་བརྡར་དང་ཆབ་སྲིད་སྦྱོང་བརྡར། ལག་ལེན་སྦྱོང་བརྡར། ཆེད་ལས་སྦྱོང་བརྡར་བྱས་ཏེ། རྙོག་འཛིང་གི་ཉེན་ཁ་ཆེ་བའི་འཐབ་རྩོད་ཁྲོད་ནས་མིག་རྒྱང་བསྐྱེད་པ་དང་ཉམས་མྱོང་གསོག་པ། རང་ཉིད་སྟོབས་ལྡན་དུ་གཏོང་བ་དང་འཇོན་ནུས་བསྐྱེད་དགོས། འཐབ་རྩོད་ཉེན་ཅན་དང་རྙོག་འཛིང་ཅན་གྱི་ཁྲོད་ནས་ལས་བྱེད་དཔྱད་དཔོག་དང་ངོས་ལེན་གཙིགས་སུ་བཟུང་ནས། འཐབ་རྩོད་བྱེད་ཕོད་པ་དང་འཐབ་རྩོད་བྱེད་མཁས་པ་དང་། འགན་ཁུར་ཕོད་པ། དོ་དམ་བྱེད་ཕོད་པ་དང་བྱེད་མཁས་པ། མི་ལ་ཕོག་ཐུག་གཏོང་བར་མི་སྐྲག་པའི་ལས་བྱེད་པར་རྒྱབ་རྟེན་དང་བེད་སྤྱོད་བྱ་དགོས། ལས་བྱེད་པ་ཡག་མོ་ཡོད་ན་བེད་ཡག་མོ་སྤྱོད་དགོས་ཞེས་གསུངས།

  ཞི་ཅིན་ཕིང་གིས་མཐའ་མར་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྱོང་བྱེད་པར་ངེས་པར་དུ་ལོ་དང་པོའི་ལས་དོན་ཡག་མོ་བསྒྲུབ་དགོས། ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཁྱོན་ཡོངས་ནས་ལག་བསྟར་དོན་འཁྱོལ། བརྟན་པོར་ཡོང་བ་རྒྱུན་འཁྱོངས། བརྟན་ཐོག་ལེགས་བརྩོན། རྒྱལ་ནང་དང་རྒྱལ་སྤྱིའི་གནས་བབ་ཆེན་མོ་གཉིས་ལ་གཅིག་འགྱུར་འཆར་འགོད་བྱེད་པ། རིམས་ནད་སྔོན་འགོག་དང་དཔལ་འབྱོར་སྤྱི་ཚོགས་འཕེལ་རྒྱས་གཉིས་ལ་གཅིག་འགྱུར་འཆར་འགོད་ཡག་མོ་བྱེད་པ། འཕེལ་རྒྱས་དང་བདེ་འཇགས་ལ་གཅིག་འགྱུར་འཆར་འགོད་ཡག་མོ་བྱེད་པ། བཅོས་བསྒྱུར་སྒོ་འབྱེད་ཁྱོན་ཡོངས་ནས་ཟབ་སྤེལ་དང་། སྤུས་མཐོའི་འཕེལ་རྒྱས་གཏོང་བ། ཚོང་གཉེར་བྱེད་མཁན་གྱི་ཡིད་ཆེས་ཇེ་དྲག སྤྱི་ཚོགས་སྔོན་དཔག་བརྟན་པོ་གཏོང་བ། དཔལ་འབྱོར་འཁོར་སྐྱོད་སྤྱིའི་ཆ་ནས་ལེགས་བསྒྱུར་ཡོང་བར་བྱ་དགོས་ཞེས་ནན་གསུངས་གནང་།

  ལི་ཆང་གིས་འགོ་ཚུགས་མཛད་སྒོ་གཙོ་སྐྱོང་གནང་དུས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གསུང་བཤད་གལ་ཆེན་གནང་ནས། ཀྲུང་གོའི་ལུགས་ཀྱི་དེང་རབས་ཅན་གྱི་རིགས་གཞུང་དང་ལག་ལེན་རབ་དང་རིམ་པ་ལ་གསལ་བཤད་ཟབ་མོ་གནང་། ཀྲུང་གོའི་ལུགས་ཀྱི་དེང་རབས་ཅན་གྱི་རིགས་གཞུང་གི་ནང་དོན་ཕུན་སུམ་ཇེ་ཚོགས་དང་འཕེལ་རྒྱས་བཏང་ཡོད། ཆབ་སྲིད་རང་བཞིན་དང་རིགས་གཞུང་རང་བཞིན། དམིགས་གཏད་རང་བཞིན། མཛུབ་སྟོན་རང་བཞིན་བཅས་ཀྱི་ནུས་པ་དྲག་པོ་ལྡན། ཏང་ཡོངས་ཀྱིས་ཀྲུང་གོའི་ལུགས་ཀྱི་དེང་རབས་ཅན་ལ་གོ་བ་ཡང་དག་ལེན་པ། ཏང་གི་ཚོགས་ཆེན་ཉི་ཤུ་པའི་དགོངས་དོན་ཁྱོན་ཡོངས་ནས་སློབ་སྦྱོང་དང་། ཁྱོན་ཡོངས་ནས་ཁོང་དུ་ཆུད་པ། ཁྱོན་ཡོངས་ནས་ལག་བསྟར་བྱེད་པ། གཏན་ཁེལ་གཉིས་ཀྱི་ཐག་གཅོད་ཀྱི་དོན་སྙིང་ལ་གོ་བ་ཟབ་མོ་ལེན་པ། རྒྱལ་ཁབ་ཆེན་མོའི་འགན་འཁྲི་སེམས་སུ་བཟུང་པ། འདུ་ཤེས་བཞི་ཇེ་དྲག་གཏོང་བ།  ཡིད་ཆེས་བཞི་བརྟན་པོ། སྲུང་སྐྱོང་གཉིས་བྱེད་པ། རྒྱང་སྐྱོད་གསར་པའི་ཐོག་ཏང་དང་རྒྱལ་ཁབ་ཀྱི་བྱ་བ་འཕེལ་རྒྱས་ཆེན་པོ་གཏོང་བ་བཅས་ལ་དོན་སྙིང་གལ་ཆེན་ལྡན་པས། ང་ཚོས་སློབ་སྦྱོང་བྱས་ནས་གོ་བ་ལེན་པ་དང་། བསམ་བློ་དང་བྱ་སྤྱོད་གཉིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་དང་གཅིག་འགྱུར་བྱེད་པ། ཏང་ཀྲུང་དབྱང་གི་འཐབ་ཇུས་བཀོད་སྒྲིག་དང་གཅིག་འགྱུར་བྱེད་པ། ས་གནས་དེ་ག་དང་ལས་ཁུངས་དེའི་ལས་དོན་སོ་སོ་ཡག་པོ་བསྒྲུབས་ནས། ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་ཇེ་ཡག་བྱ་དགོས་ཞེས་གསུངས་པ་རེད།

  ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན། ཀྲུང་དབྱང་ཧྲུའུ་ཅི་ཁྲུའུ་ཡི་ཧྲུའུ་ཅི། སྐབས་ཉི་ཤུ་པའི་ཀྲུང་དབྱང་ཨུ་ཡོན་གྱི་ཏང་དང་རྒྱལ་ཁབ་ཀྱི་དབུ་ཁྲིད་བློ་མཐུན་གཞན་དག ཀྲུང་དབྱང་དམག་ཨུའི་ཨུ་ཡོན་གྲོས་ཚོགས་ནང་ཞུགས།

  གསར་དུ་བདམས་བསྐོས་ཐོབ་པའི་ཀྲུང་དབྱང་ཨུ་ལྷན་གྱི་ཨུ་ཡོན། རྗེས་སྣོན་ཨུ་ཡོན། ཞིང་ཆེན་དང་གྲོང་ཁྱེར། རང་སྐྱོང་ལྗོངས་སོ་སོ། ཞིན་ཅང་ཐོན་སྐྱེད་འཛུགས་སྐྲུན་དཔུང་ཚོགས། ཀྲུང་དབྱང་དང་རྒྱལ་ཁབ་ཀྱི་འབྲེལ་ཡོད་ལས་ཁུངས། འབྲེལ་ཡོད་མི་དམངས་ཚོགས་པའི་འགན་ཁུར་བློ་མཐུན་གཙོ་བོ། བཅིངས་འགྲོལ་དམག་གི་ལས་ཁུངས་སོ་སོ། དྲག་ཆས་ཉེན་རྟོག་དམག་དཔུང་གི་འགན་ཁུར་བློ་མཐུན་གཙོ་བོ་བཅས་བགྲོ་གླེང་ཚོགས་འདུའི་ནང་ཞུགས། ཀྲུང་དབྱང་ཏང་གཙོ་ཏང་ཤོག་ཁག་གི་ཀྲུང་དབྱང་། རྒྱལ་ཡོངས་བཟོ་ཚོང་མཉམ་འབྲེལ་ལྷན་ཚོགས་དང་འབྲེལ་ཡོད་ཕྱོགས་ཀྱི་འགན་ཁུར་བློ་མཐུན་འགོ་ཚུགས་མཛད་སྒོའི་ནང་ཟུར་ཞུགས་བྱས།