ཀྲུང་གོ་གུང་ཁྲན་ཏང་གི་སྐབས་ཉི་ཤུ་པའི་ཀྲུང་དབྱང་ཨུ་ལྷན་གྱི་ཚང་འཛོམས་གྲོས་ཚོགས་ཐེངས་གཉིས་པ་པེ་ཅིན་དུ་འཚོགས།

  ཉིས་སྟོང་ཉེར་གསུམ་ལོའི་ཟླ་བ་གཉིས་པའི་ཚེས་ཉེར་དྲུག་ཉིན་ནས་ཚེས་ཉེར་བརྒྱད་ཉིན་གྱི་བར། ཀྲུང་གོ་གུང་ཁྲན་ཏང་གི་སྐབས་ཉི་ཤུ་པའི་ཀྲུང་དབྱང་ཨུ་ལྷན་གྱི་ཚང་འཛོམས་གྲོས་ཚོགས་ཐེངས་གཉིས་པ་པེ་ཅིན་དུ་འཚོགས་པ་རེད། འདི་ནས་ཀྲུང་གོ་གུང་ཁྲན་ཏང་གི་སྐབས་ཉི་ཤུ་པའི་ཀྲུང་དབྱང་ཨུ་ལྷན་གྱི་ཚང་འཛོམས་གྲོས་ཚོགས་ཐེངས་གཉིས་པའི་སྤྱི་བསྒྲགས་བཀོད་པ་ཡིན།

 ཀྲུང་གོ་གུང་ཁྲན་ཏང་གི་སྐབས་ཉི་ཤུ་པའི་ཀྲུང་དབྱང་ཨུ་ལྷན་གྱི་ཚང་འཛོམས་གྲོས་ཚོགས་ཐེངས་གཉིས་པའི་སྤྱི་བསྒྲགས།

  ཉིས་སྟོང་ཉེར་གསུམ་ལོའི་ཟླ་བ་གཉིས་པའི་ཚེས་ཉེར་བརྒྱད་ཉིན་ཀྲུང་གོ་གུང་ཁྲན་ཏང་གི་སྐབས་ཉི་ཤུ་པའི་ཀྲུང་དབྱང་ཨུ་ལྷན་གྱི་ཚང་འཛོམས་གྲོས་ཚོགས་ཐེངས་གཉིས་པའི་ཐོག་གྲོས་འཆམ་བྱུང་བ་བརྒྱུད།ཀྲུང་གོ་གུང་ཁྲན་ཏང་གི་སྐབས་ཉི་ཤུ་པའི་ཀྲུང་དབྱང་ཨུ་ལྷན་གྱི་ཚང་འཛོམས་གྲོས་ཚོགས་ཐེངས་གཉིས་པ་དེ་ཉིས་སྟོང་ཉེར་གསུམ་ལོའི་ཟླ་བ་གཉིས་པའི་ཚེས་ཉེར་དྲུག་ཉིན་ནས་ཚེས་ཉེར་བརྒྱད་ཉིན་གྱི་བར་པེ་ཅིན་དུ་འཚོགས་པ་རེད།

  ཐེངས་འདིའི་ཚང་འཛོམས་གྲོས་ཚོགས་ཐོག་ཀྲུང་དབྱང་ཨུ་ཡོན་ཉིས་བརྒྱ་བཅུ་མེད་གསུམ་དང་། རྗེས་སྣོན་ཀྲུང་དབྱང་ཨུ་ཡོན་བརྒྱ་དང་བདུན་ཅུ་ཞུགས་ཡོད། ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ལྷན་གྱི་ཧྲུའུ་ཅི་གཞོན་པ་དང་འབྲེལ་ཡོད་སྡེ་ཁག་གི་འགན་ཁུར་བློ་མཐུན་གྲོས་ཚོགས་ནང་ཟུར་ཞུགས་བྱས་པ་རེད།

ཚང་འཛོམས་གྲོས་ཚོགས་ཉིད་ཀྲུང་དབྱང་ཆབ་སྲིད་ཅུས་ཀྱིས་གཙོ་སྐྱོང་གནང་ཞིང་། ཀྲུང་དབྱང་ཨུ་ལྷན་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གསུང་བཤད་གལ་ཆེན་གནང་།

  ཚང་འཛོམས་གྲོས་ཚོགས་ཐོག་ཞི་ཅིན་ཕིང་གིས་ཀྲུང་དབྱང་ཆབ་སྲིད་ཅུས་ཀྱི་མངག་བཅོལ་ལྟར་ཕུལ་བའི་ལས་ཀའི་སྙན་ཞུར་གསན་པར་མ་ཟད་གྲོས་བསྡུར་བྱས་ཤིང་། ཀྲུང་དབྱང་ཆབ་སྲིད་ཅུས་ཀྱིས་ཏང་ཕྱི་ནང་གི་བསམ་འཆར་བསྡུ་ལེན་བྱེད་པ་དང་། ཨ་ནས་ཡང་དུ་གྲོས་མོལ་བྱས་ཐོག་བཏོན་པའི་སྐབས་བཅུ་བཞི་པའི་རྒྱལ་ཡོངས་དམངས་ཆེན་གྱི་གྲོས་ཚོགས་ཐེངས་དང་པོར་འོས་སྦྱོར་བྱས་པའི་རྒྱལ་ཁབ་ལས་ཁུངས་ཀྱི་འགོ་ཁྲིད་མི་སྣ་འདེམ་པའི་གྲོས་འགོའི་མིང་ཐོ་དང་རྒྱལ་ཡོངས་སྲིད་གྲོས་ཀྱི་སྐབས་བཅུ་བཞི་པའི་གྲོས་ཚོགས་ཐེངས་དང་པོར་འོས་སྦྱོར་བྱས་པའི་རྒྱལ་ཡོངས་སྲིད་གྲོས་ཀྱི་འགོ་ཁྲིད་མི་སྣ་འདེམ་པའི་གྲོས་འགོའི་མིང་ཐོ་ལ་གྲོས་ཞིབ་བྱས་ནས་གྲོས་འཆམ་བྱུང་བ་རེད། གྲོས་འགོ་མིང་ཐོ་འདི་གཉིས་སྐབས་བཅུ་བཞི་པའི་རྒྱལ་ཡོངས་དམངས་ཆེན་གྱི་གྲོས་ཚོགས་ཐེངས་དང་པོའི་ཀྲུའུ་ཞི་ཚོགས་པ་དང་རྒྱལ་ཡོངས་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་དང་པོའི་ཀྲུའུ་ཞི་ཚོགས་པར་འོས་སྦྱོར་བྱ་རྒྱུའི་གྲོས་ཐག་བཅད། བསམ་འཆར་བསྡུ་ལེན་ཞིབ་མོ་བྱས་ཐོག་བཏོན་པའི་ཏང་དང་རྒྱལ་ཁབ་ལས་ཁུངས་ཀྱི་བཅོས་བསྒྱུར་འཆར་འགོད་གྲོས་ཞིབ་བྱས་ནས་གྲོས་འཆམ་བྱུང་ཡོད་ལ། ཞི་ཅིན་ཕིང་གིས་ཏང་དང་རྒྱལ་ཁབ་ལས་ཁུངས་བཅོས་བསྒྱུར་འཆར་འགོད་ཀྱི་མ་ཟིན་སྐོར་ནས་ཚང་འཛོམས་གྲོས་ཚོགས་ཐོག་གསལ་བཤད་གནང་། ཚང་འཛོམས་གྲོས་ཚོགས་ཐོག ཏང་དང་རྒྱལ་ཁབ་བཅོས་བསྒྱུར་འཆར་འགོད་ཀྱི་ནང་དོན་ཁ་ཤས་ཁྲིམས་བཀོད་གོ་རིམ་ལྟར་སྐབས་བཅུ་བཞི་པའི་རྒྱལ་ཡོངས་དམངས་ཆེན་གྲོས་ཚོགས་ཐེངས་དང་པོར་གྲོས་ཞིབ་བྱ་རྒྱུར་འབུལ་བའི་མོས་མཐུན་བྱུང་ཡོད།

  ཚང་འཛོམས་གྲོས་ཚོགས་ཐོག་ཏང་གི་སྐབས་ཉི་ཤུ་པའི་ཚང་འཛོམས་གྲོས་ཚོགས་ཐེངས་དང་པོ་ནས་ད་བར་གྱི་ཀྲུང་དབྱང་ཆབ་སྲིད་ཅུས་ཀྱི་ལས་དོན་ལ་གདེང་འཇོག་གང་ལེགས་གནང་སྟེ། ཚང་མས་རྒྱལ་སྤྱིའི་ཁོར་ཡུག་རྙོག་འཛིང་ཆེ་བ་དང་རྒྱལ་ནང་བཅོས་བསྒྱུར་འཕེལ་རྒྱས་བརྟན་བརླིང་གཏོང་བའི་ལས་འགན་ལྕི་མོ་ལ་དམིགས་ནས་ཀྲུང་དབྱང་ཆབ་སྲིད་ཅུས་ཀྱིས། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུའི་ཚང་འཛོམས་གྲོས་ཚོགས་ཐེངས་དང་པོའི་དགོངས་དོན་ཁྱོན་ཡོངས་ནས་ལག་བསྟར་བྱེད་ཅིང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རླབས་ཆེའི་དར་ཆ་མཐོན་པོས་བསྒྲེངས་པ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ཁྱོན་ཡོངས་ནས་ལག་བསྟར་བྱེད་པ། བརྟན་ཐོག་ཡར་འཕེལ་གྱི་ལས་ཀའི་སྤྱིའི་ཁ་ཕྱོགས་རྒྱུན་འཁྱོངས་བྱས་ནས། རྒྱལ་ནང་རྒྱལ་སྤྱིའི་གནས་བབ་ཆེན་པོ་གཉིས་ལ་སྔ་ལས་གཅིག་འགྱུར་འཆར་འགོད་ཡག་མོ་བྱེད་པ། རིམས་ནད་སྔོན་འགོག་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བར་གཅིག་འགྱུར་འཆར་འགོད་ཡག་མོ་བྱེད་པ། འཕེལ་རྒྱས་དང་བདེ་འཇགས་ལ་གཅིག་འགྱུར་འཆར་འགོད་ཡག་མོ་བྱེད་པ། ཏང་གི་ཚོགས་ཆེན་ཉི་ཤུ་པའི་སྙིང་དོན་སློབ་སྦྱོང་དང་དྲིལ་བསྒྲགས། དོན་འཁྱོལ་བྱེད་པའི་ཚ་རླབས་འཕྱུར་བ། བློ་མཐུན་ཅང་ཙེ་རྨིན་སྐུ་གཤེགས་པར་གདོང་བས་མྱ་ངན་ཞུས་པ། རྒྱལ་ཡོངས་དམངས་ཆེན་དང་རྒྱལ་ཡོངས་སྲིད་གྲོས་ཀྱི་སྐབས་བརྗེའི་གྲ་སྒྲིག་ལས་དོན་ཡག་མོ་བསྒྲུབས་པ་དང་། ཏོག་གསར་གློ་ཚད་རིམས་ནད་སྔོན་འགོག་ཚོད་འཛིན་གྱི་བྱེད་ཐབས་དུས་བསྟུན་ལེགས་སྒྲིག་དང་ལེགས་བཅོས་བྱས་ནས། དཔལ་འབྱོར་བརྟན་པོས་སླར་གསོ་བྱུང་བ་དང་སྤུས་མཐོའི་འཕེལ་རྒྱས་བཏང་བ། སྤྱི་ཚོགས་རིང་ལུགས་དམངས་གཙོ་ཁྲིམས་སྐྱོང་འཛུགས་སྐྱོང་དང་དྲིལ་བསྒྲགས་བསམ་བློ་རིག་གནས་ལས་དོན་ཡག་མོ་བསྒྲུབས་པ། དམངས་འཚོ་འགན་སྲུང་དང་ལེགས་བཅོས་བྱས། རྒྱལ་ཁབ་བདེ་འཇགས་དང་སྤྱི་ཚོགས་བརྟན་བརླིང་ཡོང་བར་སྲུང་སྐྱོང་བརྟན་པོ་བྱས་ཤིང་། ཀྲུང་གོའི་ཁྱད་ཆོས་ལྡན་པའི་རྒྱལ་ཁབ་ཆེན་མོའི་ཕྱི་འབྲེལ་གྱི་རྒྱང་སྐྱོད་གསར་པ་ཕྱེས་པ། ཁྱོན་ཡོངས་ནས་ཏང་ནན་གྱིས་སྐྱོང་བ་ཇེ་ཟབ་དང་། ལས་དོན་སོ་སོ་ལ་འཕེལ་རྒྱས་ཆེན་པོ་བྱུང་ཡོད་པར་གདེང་འཇོག་ཚད་མཐོ་གནང་ཡོད།

  ཚང་འཛོམས་གྲོས་ཚོགས་ཐོག་སྐབས་བཅུ་བཞི་པའི་རྒྱལ་ཡོངས་དམངས་ཆེན་གྲོས་ཚོགས་ཐེངས་དང་པོ་དང་རྒྱལ་ཡོངས་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་དང་པོ་ཡག་མོ་འཚོག་པ་དེས་ཏང་ཡོངས་དང་རྒྱལ་ཡོངས་མི་རིགས་སོ་སོའི་མི་དམངས་ཀྱིས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཁྱོན་ཡོངས་ནས་འཛུགས་སྐྱོང་དང་། ཀྲུང་ཧྭ་མི་རིགས་བསྐྱར་དར་རླབས་པོ་ཆེར་མཐུན་སྒྲིལ་འབད་བརྩོན་བྱེད་པར་དོན་སྙིང་གལ་ཆེན་ལྡན་ཞེས་ནན་གྱིས་བསྟན།

  ཚང་འཛོམས་གྲོས་ཚོགས་ཐོག ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་མཛད་པའི་ཏང་ཀྲུང་དབྱང་གིས་ཏང་དང་རྒྱལ་ཁབ་ལས་ཁུངས་བཅོས་སྒྱུར་ཟབ་སྤེལ་བྱེད་པ་དེ་རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་བར་སྐུལ་འདེད་གཏོང་བའི་ལས་འགན་གལ་ཆེན་དུ་བརྩིས་ནས། ཏང་གི་ཁྱོན་ཡོངས་འགོ་ཁྲིད་རྒྱུན་འཁྱོངས་དང་མི་དམངས་གཙིགས་སུ་འཛིན་པ་རྒྱུན་འཁྱོངས། མཐུན་སྦྱོར་ནུས་མཐོ་ལེགས་བསྒྱུར་རྒྱུན་འཁྱོངས། ཁྱོན་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བའི་རྩ་དོན་རྒྱུན་འཁྱོངས་བྱེད་པ་བཅས་གཞིར་བཟུང་ནས། ཏང་དང་རྒྱལ་ཁབ་ལས་ཁུངས་བཅོས་སྒྱུར་ཟབ་སྤེལ་དང་ཏང་དང་རྒྱལ་ཁབ་ལས་ཁུངས་ཀྱི་འགན་ནུས་ལ་མ་ལག་རང་བཞིན་དང་ཧྲིལ་པོ་ཅན་གྱི་བསྐྱར་སྒྲིག་བྱས་ནས། ཏང་དང་རྒྱལ་ཁབ་ཀྱི་བྱ་གཞག་ལ་ལོ་རྒྱུས་རང་བཞིན་གྱི་གྲུབ་འབྲས་དང་ལོ་རྒྱུས་རང་བཞིན་གྱི་འཕོ་འགྱུར་འབྱུང་བར་འགན་སྲུང་ནུས་ལྡན་བྱས་ཐུབ་པར་མ་ཟད། མུ་མཐུད་དུ་ཏང་དང་རྒྱལ་ཁབ་ལས་ཁུངས་བཅོས་སྒྱུར་ལ་ཉམས་མྱོང་རྩ་ཆེན་གསོག་ཐུབ་པར་བསྟན།

  ཚང་འཛོམས་གྲོས་ཚོགས་ཐོག ཏང་གི་ཚོགས་ཆེན་ཉི་ཤུ་པས་ལས་ཁུངས་བཅོས་སྒྱུར་ཟབ་སྤེལ་ལ་བཀོད་སྒྲིག་གལ་ཆེན་གནང་ཡོད་ལ། ཁྱོན་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྱོང་དང་ཁྱོན་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེར་དོན་སྙིང་གལ་ཆེན་ལྡན་པས། ངེས་པར་དུ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པས་མཛུབ་སྟོན་བྱེད་པ་དང་ཏང་ཀྲུང་དབྱང་གི་གཅིག་བསྡུས་གཅིག་གྱུར་འགོ་ཁྲིད་ཀྱིས་སྣེ་ཁྲིད་ཇེ་དྲག་བཏང་ནས། རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་བའི་འཕེལ་ཕྱོགས་རྒྱུན་འཁྱོངས་དང་བརྟན་ཐོག་ཡར་འཕེལ་གྱི་ལས་ཀའི་སྤྱིའི་བྱེད་ཕྱོགས་རྒྱུན་འཁྱོངས་བྱས་ནས། གནས་ལྔ་ཕུང་གཅིག་གི་སྤྱིའི་བཀོད་པ་གཅིག་གྱུར་འཆར་འགོད་བྱེད་པ་དང་ཁྱོན་ཡོངས་བཞིའི་འཐབ་ཇུས་བཀོད་པ་མཐུན་སྦྱོར་ངང་ལག་བསྟར་བྱེད་པའི་བླང་བྱ་དང་འོས་འཚམ་བྱེད་པ།  འཕེལ་རྒྱས་ཀྱི་བཀོད་པ་གསར་པ་སྒྲིག་འཛུགས་དང་སྤུས་ཚད་མཐོ་བའི་འཕེལ་རྒྱས་ཀྱི་དགོས་མཁོ་དང་འོས་ཤིང་འཚམ་པ་དང་། གནད་དོན་ཁྲིད་ཕྱོགས་རྒྱུན་འཁྱོངས་དང་ཏང་ཀྲུང་དབྱང་གི་ལས་ཁུངས་དང་རྒྱལ་ཡོངས་དམངས་ཆེན་གྱི་ལས་ཁུངས། རྒྱལ་སྲིད་སྤྱི་ཁྱབ་ཁང་གི་ལས་ཁུངས། རྒྱལ་ཡོངས་སྲིད་གྲོས་ཀྱི་ལས་ཁུངས་བཅས་གཅིག་གྱུར་འཆར་འགོད་བྱེད་པ་དང་། ཀྲུང་དབྱང་དང་ས་གནས་གཅིག་གྱུར་འཆར་འགོད་བྱེད་པ། ཁྱབ་ཁོངས་གལ་ཆེན་ལས་ཁུངས་བཅོས་སྒྱུར་ཟབ་སྤེལ་བྱེད་པ། ཏང་གིས་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་བྱེད་པ་ལ་སྣེ་ཁྲིད་པ་དེ་ལས་ཁུངས་སྒྲིག་འཛུགས་ཁྲོད་དུ་དེ་བས་ཚན་རིག་དང་མཐུན་ཞིང་། འགན་ནུས་ཐད་ནས་དེ་བས་ལེགས་བསྒྱུར་དང་ལམ་ལུགས་སྒྲིག་ལམ་ཐད་ནས་དེ་བས་འཐུས་སྒོ་ཚང་ཞིང་། ལས་གཉེར་དོ་དམ་ཁྲོད་ནས་དེ་བས་ནུས་ཕྱོད་མཐོ་བར་བྱས་ཡོད་ཅེས་བསྟན་པ་རེད།

  ཚང་འཛོམས་གྲོས་ཚོགས་ཐོག ས་གནས་སོ་སོའི་ལས་ཁུངས་ཁག་གིས་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་ཀྱི་ཁྱོན་ཡོངས་ལ་གཞིགས་ནས། ཏང་དང་རྒྱལ་ཁབ་ཀྱི་ལས་ཁུངས་བཅོས་སྒྱུར་གྱི་གལ་ཆེའི་རང་བཞིན་དང་ཁ་ཚ་དགོས་གཏུག་རང་བཞིན་ལ་ངོས་ཟིན་ཟབ་མོ་ཡོད་དགོས་པ་དང་། གཏན་འཁེལ་གཉིས་ཀྱི་ཐག་གཅོད་རང་བཞིན་ལ་གོ་བ་གཏིང་ཟབ་ལེན་པ་དང་འདུ་ཤེས་བཞི་ཇེ་དྲག་གཏོང་བ།ཡིད་ཆེས་བཞི་ཇེ་བརྟན། སྲུང་སྐྱོང་གཉིས་སྒྲུབ་ཐུབ་པ།  རང་རྟོགས་སྒོས་བསམ་སྦྱོར་གཉིས་དེ་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཐོག་གཅིག་གྱུར་བྱེད་པ་དང་། བློ་བརྟན་འགྱུར་མེད་ཀྱིས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་གི་དབང་གྲགས་རང་བཞིན་དང་གཟབ་ནན་རང་བཞིན་ལ་སྲུང་སྐྱོང་བྱེད་པ། བཅོས་བསྒྱུར་གྱི་ཡིད་ཆེས་དང་ཆོད་སེམས་ཇེ་བརྟན་དུ་གཏོང་བ། རྩ་འཛུགས་དང་འགོ་ཁྲིད་ཇེ་དྲག་བཏང་ནས། འཕྲི་ལྷག་མེད་པར་ལས་ཁུངས་བཅོས་བསྒྱུར་གྱི་ལས་འགན་དོན་ཐོག་ཏུ་འཁྱོལ་དགོས་ཞེས་ནན་བསྟན་གནང་།

  ཚང་འཛོམས་གྲོས་ཚོགས་ཐོག ཏང་གི་ཚོགས་ཆེན་ཉི་ཤུ་པའི་སྙིང་དོན་སློབ་སྦྱོང་དང་དྲིལ་བསྒྲགས། དོན་འཁྱོལ་ཟབ་མོ་བྱེད་པ་ནི་མིག་སྔ་དང་རྗེས་མའི་དུས་ཡུན་ནང་ཏང་ཡོངས་ཀྱི་ཆབ་སྲིད་ཀྱི་ལས་འགན་གཙོ་བོ་ཡིན་ཏེ། སྙིང་དོན་སློབ་སྦྱོང་དང་དྲིལ་བསྒྲགས། དོན་འཁྱོལ་ཟབ་མོ་བྱེད་པ་དེ་གཏིང་ཟབ་ཅིང་དོན་དམ་གཉེར་བར་སྐུལ་འདེད་གཏོང་དགོས་ལ། བསྒྲགས་ཐབས་ཕུན་སུམ་ཇེ་ཚོགས་དང་བྱེད་ཐབས་གསར་གཏོད་བྱེད་དགོས་པ་དང་། མི་དམངས་མང་ཚོགས་ཀྱིས་ལྟ་འདོད་ཉན་འདོད་ཀྱི་རྣམ་པར་བརྟེན་ནས་ཏང་གི་ཚོགས་ཆེན་ཉི་ཤུ་པའི་དགོངས་དོན་དེ་ལས་ཁུངས་དང་ཁེ་ལས། དོན་ལས་ལས་ཁུངས། གྲོང་ཁྱེར་དང་གྲོང་གསེབ། འདུས་ཁུལ།  སློབ་གྲྭ། དམག་སྒར། རིགས་སོ་སོའི་དཔལ་འབྱོར་རྩ་འཛུགས་གསར་པ་དང་སྤྱི་ཚོགས་ཀྱི་རྩ་འཛུགས་གསར་པ། དྲྭ་ཚིགས་བཅས་སུ་དྲིལ་བསྒྲགས་བྱས་ནས། ཏང་གི་ཚོགས་ཆེན་ཉི་ཤུ་པའི་དགོངས་དོན་དེ་མིའི་སེམས་སུ་ཟུག་འཇུག་དགོས། འགོ་ཁྲིད་ལས་བྱེད་པས་མུ་མཐུད་དུ་ཁྱོན་ཡོངས་ནས་སློབ་སྦྱོང་དང་ཁྱོན་ཡོངས་ལ་ཁོང་དུ་ཆུད་པ། ཁྱོན་ཡོངས་ནས་དོན་འཁྱོལ་བྱེད་པ་བཅས་ལ་དཔེ་སྟོན་བྱས་ནས། དུས་རབས་གསར་པའི་ལོ་བཅུའི་རླབས་ཆེའི་འཕོ་འགྱུར་གྱི་དོན་སྙིང་གལ་ཆེན་ལ་ངོས་འཛིན་ཟབ་མོ་བྱེད་དགོས་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པའི་འཛམ་གླིང་ལྟ་བ་དང་བརྟག་ཐབས་སྨྲ་བ། དེའི་ནང་ཁྱབ་པའི་ལངས་ཕྱོགས་དང་ལྟ་བ། ཐབས་ཤེས་བཅས་ཁོང་དུ་ཡག་མོ་ཆུད་དེ། སྤྱི་ཁོག་ནས་དུས་རབས་གསར་པ་དང་རྒྱང་སྐྱོད་གསར་པའི་ནང་ཏང་དང་རྒྱལ་ཁབ་བྱ་གཞག་འཕེལ་རྒྱས་ཀྱི་དམིགས་འབེན་དང་ལས་འགན། འཐབ་ཇུས་བཀོད་སྒྲིག བྱེད་ཐབས་གལ་ཆེན་བཅས་ཁོང་དུ་ཆུད་པ། རང་གི་ས་ཁུལ་དང་རང་ཉིད་སྡེ་ཁག་གི་དོན་དངོས་ལ་གཞིགས་ནས་བྱེད་ཐབས་ཞིབ་ཕྲ་གཏན་འབེབས་དང་ལག་བསྟར་དོན་འཁྱོལ་ཡག་པོ་བྱས་ནས། ཏང་གི་ཚོགས་ཆེན་ཉི་ཤུ་པའི་དགོངས་དོན་དོན་ཐོག་ཏུ་འཁྱོལ་བར་བྱེད་དགོས་ཞེས་པའི་ངོས་འཛིན་བྱུང་ཡོད།

  ཚང་འཛོམས་གྲོས་ཚོགས་ཐོག མིག་སྔར། འཛམ་གླིང་ལ་ལོ་བརྒྱར་བྱུང་མ་མྱོང་བའི་འཕོ་འགྱུར་ཆེན་པོ་བྱུང་བཞིན་ཡོད་ལ། འཛམ་གླིང་ཟང་ཟིང་གི་འཕོ་འགྱུར་དུས་རིམ་གསར་པར་སླེབས་ཡོད། རང་རྒྱལ་གྱི་འཕེལ་རྒྱས་དེ་འཐབ་ཇུས་གོ་སྐབས་དང་ཉེན་ཁ་འགྲན་རྩོད་མཉམ་གནས། ངེས་མ་མཆིས་ཤིང་སྔོན་དཔོག་དཀའ་བའི་རྒྱུ་རྐྱེན་མང་བའི་དུས་རིམ་དུ་སླེབས་ཡོད་པས། ངེས་པར་དུ་འགྱུར་ལྡོག་ཚབས་ཆེན་དང་ཐ་ན་གནམ་ས་བླ་འོག་བསྒྱུར་བ་ལྟ་བུའི་ཉམས་སད་ཐེབས་རྒྱུར་ཁ་གཏད་འཐུབ་པའི་གྲ་སྒྲིག་བྱེད་དགོས། རང་རྒྱལ་གྱི་བཅོས་བསྒྱུར་འཕེལ་རྒྱས་བརྟན་བརླིང་ཐད་ལ་སྔར་བཞིན་འགལ་བ་ཆེན་པོ་དུ་མ་དང་འཕྲད་ཡོད་དེ། དགོས་མཁོ་ཉུང་འགྱུར་དང་མཁོ་འདོན་དོ་སྙོམས་མིན་པ། སྔོན་དཔོག་ཉམས་ཞན་ཕྱོགས་ཀྱི་དཀའ་ངལ་སྔར་བཞིན་ཅུང་ཆེ་བ། དཔལ་འབྱོར་སླར་གསོའི་རྨང་གཞི་ད་རུང་བརྟན་པོ་མིན་པས།རིགས་སོ་སོའི་སྔོན་དཔོག་ལས་བརྒལ་བའི་རྒྱུ་རྐྱེན་དུ་མ་ཞིག་དུས་དང་རྣམ་པ་ཀུན་ཏུ་འབྱུང་སྲིད།

  ཏང་ཡོངས་ཀྱི་བློ་མཐུན་ཚོས་ངེས་པར་དུ་ཡིད་ཆེས་བརྟན་པོ་དང་འཐབ་ཇུས་རིག་ལམ་གསལ་པོ་རྒྱུན་འཁྱོངས་དགོས་ལ། འཐབ་འཛིང་གི་སྙིང་སྟོབས་དར་སྤེལ་དང་། གཅིག་འགྱུར་འཆར་འགོད་ཡག་པོ་གསུམ་ལག་བསྟར་བྱས་ནས་ད་ལོའི་དམིགས་འབེན་ལས་འགན་ཁག་འགྲུབ་གང་ཐུབ་བྱ་དགོས། ཁྱོན་ཡོངས་ནས་འཕེལ་རྒྱས་ཀྱི་འདུ་ཤེས་གསར་པ་ལག་ལེན་ཆ་ཚང་ཞིང་གནད་ལ་ཁེལ་པ་དང་། འཕེལ་རྒྱས་ཀྱི་རྣམ་པ་གསར་པ་འཛུགས་སྐྱོང་ཇེ་མགྱོགས་གཏོང་དགོས་ལ།སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས།  ཏང་ཀྲུང་དབྱང་གི་དུས་རིམ་གསར་པའི་རིམས་ནད་འགོག་བཅོས་ཀྱི་ཆོད་དོན་བཀོད་སྒྲིག་ལག་ལེན་ནན་མོ་དང་རིམས་ནད་རིགས་ཁ་པར་ཚོད་འཛིན་དོ་དམ་བྱེད་ཐབས་ཁ་པ་སྤྱོད་པའི་བྱེད་ཐབས་ཁག་དོན་འཁྱོལ་ཡག་པོ་བྱེད་དགོས། ནང་མཁོ་རྒྱ་བསྐྱེད་ཧུར་ཐག་བཏང་ནས། ཐོན་ལས་མ་ལག་དང་མཁོ་འདོན་མ་ལག་གི་ནུས་པ་དང་བདེ་སྲུང་ཆུ་ཚད་མཐོར་འདེགས་གཏོང་དགོས་ལ། མུ་མཐུད་དུ་ཚོང་ར་ཅན་དང་ཁྲིམས་སྐྱོང་ཅན། རྒྱལ་སྤྱི་ཅན་གྱི་ཚོང་གཉེར་ཁོར་ཡུག་ཇེ་ལེགས་གཏོང་བ། དཔལ་འབྱོར་དངུལ་རྩའི་ཉེན་ཁ་ཆེན་པོ་འགོག་སེལ་ནུས་ལྡན་བཏང་ནས་མ་ལག་ཅན་གྱི་ཉེན་ཁ་མི་འབྱུང་བའི་མ་མཐའ་གཏན་བསྲུང་བྱ་དགོས། དམངས་འཚོ་ཁག་ཐེག་དང་ལེགས་སྒྱུར་ལས་དོན་ཁག་ཇེ་དྲག་གཏོང་བ་དང་། ལས་ཞུགས་དམིགས་སུ་བཀར་བའི་སྲིད་ཇུས་དོན་འཁྱོལ་ཞིབ་ཕྲ་བྱེད་པ། དཀའ་ངལ་ཡོད་པའི་མི་སེར་གྱི་འཚོ་རྟེན་འགན་སྲུང་ཡག་པོ་བྱེད་པ། སྤྱི་ཚོགས་འགན་སྲུང་མ་ལག་འཛུགས་སྐྱོང་བརྟན་པོ་བྱེད་ཅིང་། སྨན་བཅོས་འཕྲོད་བསྟེན་དང་ནང་སྒོས་སུ་གྲོང་ཁྱེར་དང་གྲོང་གསེབ་ཀྱི་གཞི་རིམ་སྨན་བཅོས་འཕྲོད་བསྟེན་གྱི་སྤྱི་པའི་ཞབས་ཞུའི་ཞན་ཆ་ཁ་གསབ་ནས། བུ་བཙའི་རྒྱབ་སྐྱོར་སྲིད་ཇུས་དང་མ་ལག་འཐུས་ཚང་གཏོང་དགོས། ཁྱོན་ཡོངས་ནས་གྲོང་གསེབ་དར་རྒྱས་དང་དབུལ་བྲལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་བསྐྱེད་བཏང་ནས་གཞི་རྒྱ་ཆེ་བའི་དབུལ་ཕོངས་བསྐྱར་ལོག་གཏན་འགོག་བྱེད་དགོས་པ་བཅས་བསྟན།

  ཚང་འཛོམས་གྲོས་ཚོགས་ཐོག  བློ་བརྟན་འགྱུར་མེད་ཀྱིས་བཅོས་སྒྱུར་སྒོ་འབྱེད་ཟབ་སྤེལ་དང་། སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཁྱོན་ཡོངས་ནས་འཛུགས་སྐྱོང་བྱེད་པའི་དམིགས་འབེན་ལ་གཞིགས་ནས། འཐབ་ཇུས་རང་བཞིན་དང་གསར་གཏོད་རང་བཞིན། སྣེ་ཁྲིད་རང་བཞིན་གྱི་བཅོས་སྒྱུར་བྱེད་ཐབས་ཁག་ཅིག་གཏན་འབེབས་བྱེད་ཅིང་། བཅོས་བསྒྱུར་མ་ལག་འདུས་གྲུབ་དང་མཐུན་སྦྱོར་ནུས་མཐོ་ཇེ་ཆེར་བཏང་ནས། ཁྱབ་ཁོངས་གཙོ་བོ་དང་གནད་འགག་དུས་རིམ་ནང་ཐོད་བརྒལ་གསར་པ་ཐོབ་འཐུབ་དགོས། སྤྱི་ཚོགས་རིང་ལུགས་ཀྱི་རྩ་བའི་དཔལ་འབྱོར་ལམ་ལུགས་རྒྱུན་འཁྱོངས་དང་འཐུས་ཚང་གཏོང་བ། ཀྲུང་གོའི་ཁྱད་ཆོས་ཀྱི་དེང་རབས་ཁེ་ལས་ལམ་ལུགས་འཐུས་ཚང་གཏོང་བ། དེང་རབས་དངུལ་རྩའི་ལྟ་སྐུལ་དོ་དམ་ཇེ་དྲག་དང་འཐུས་ཚང་གཏོང་བ། ཆུ་ཚད་མཐོན་པོའི་ཕྱི་ཕྱོགས་སྒོ་འབྱེད་འཕེལ་རྒྱས་སྐུལ་འདེད་གཏོང་བ་དང་ཁྱབ་ཁོངས་སོ་སོའི་བཅོས་སྒྱུར་ལ་གཅིག་འགྱུར་འཆར་འགོད་ཡག་པོ་བྱེད་དགོས། བཅོས་བསྒྱུར་དོན་འཁྱོལ་ནང་རྐྱེན་འཐུས་ཚང་ལ་དོ་སྣང་དང་། བཅོས་བསྒྱུར་བྱེད་ཐབས་དོན་དུ་འཁྱོལ་ནས་འབྲས་བུ་ཐོབ་དགོས་ལ། མུ་མཐུད་དུ་སྤྱི་ཚོགས་རིང་ལུགས་དེང་རབས་ཅན་འཛུགས་བསྐྲུན་ནུས་སྟོབས་དང་གསོན་ཤུགས་ཇེ་དྲག་བཏང་ནས། རང་རྒྱལ་གྱི་ལམ་ལུགས་ལེགས་ཆ་དེ་རྒྱལ་ཁབ་བཅོས་སྐྱོང་ཕན་ནུས་སུ་བསྒྱུར་་ལེགས་པར་བྱེད་དགོས་ཞེས་བཏོན་པ་རེད།

  ཚང་འཛོམས་གྲོས་ཚོགས་ཐོག  ཏང་གི་ཚོགས་ཆེན་ཉི་ཤུ་པས་ཏང་གི་འཛུགས་སྐྱོང་ཐད་གནང་བའི་འཐབ་ཇུས་བཀོད་སྒྲིག་ལག་བསྟར་ཟབ་མོ་བྱེད་དགོས་པ་དང་། ཏང་ཆེན་པོ་ཁོ་ན་ལ་ཡོད་པའི་དཀའ་ཁག་སེལ་བའི་བློ་རིག་གསལ་པོ་དང་ཡིད་ཆེས་བརྟན་པོ་ནམ་ཡང་ཡོད་དགོས། ཕྱོགས་ཡོངས་ནས་ཏང་ནན་གྱིས་སྐྱོང་བའི་མ་ལག་འཐུས་ཚང་གཏོང་བ། ཏང་གི་ཆབ་སྲིད་འཛུགས་སྐྱོང་རྩ་གནད་བྱེད་དེ། ཏང་གི་ཕྱོགས་སོ་སོའི་འཛུགས་སྐྱོང་ལ་སྐུལ་འདེད་གཏོང་བ། དུས་རབས་གསར་པའི་ཏང་གི་འཛུགས་སྐྱོང་གི་རླབས་ཆེན་ལས་གཞི་ལ་སྐུལ་འདེད་བྱེད་དགོས། ཏང་ཡོངས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དགོངས་པའི་བརྗོད་དོན་གཙོ་བོའི་སློབ་གསོ་ལ་སློབ་སྦྱོང་ཟབ་མོ་དང་། ཚན་རིག་དང་མཐུན་པའི་འཆར་འགོད་དང་རྩ་འཛུགས་ཞིབ་ཕྲ། རིགས་གཞུང་སློབ་སྦྱོང་དང་བཀོལ་སྤྱོད་ཇེ་དྲག་གཏོང་བའི་ཐད་མིག་མཐོང་ལག་ཟིན་ཐུབ་པའི་གྲུབ་འབྲས་ཐོབ་ཡོད། སྐབས་བརྗེའི་འགོ་ཁྲིད་ཚན་ཁག་གི་བསམ་བློ་ཆབ་སྲིད་འཛུགས་སྐྱོང་ཡག་པོ་དང་། དམངས་གཙོ་གཅིག་བསྡུས་ལམ་ལུགས་ལག་བསྟར་ནན་མོ་བྱེད་པ། སྤྱོད་གཙང་སྲིད་གཙང་གི་ཆབ་སྲིད་ཁོར་ཡུག་སྐྲུན་ཞིང་། མཐུན་བསྒྲིལ་མཐུན་སྦྱོར་དང་འགན་འཁྲི་འཁུར་ཕོད་པ། ལེགས་པས་བསྒྲུབས་ན་ལེགས་འགྲུབ་ཐུབ་པའི་སྙིང་སྟོབས་ཡོད་དགོས། སྤྱོད་གཙང་སྲིད་གཙང་་རྒྱུན་འཁྱོངས་ནན་མོ་བྱེད་པ་དང་། སྤྱོད་ངན་བཞི་རྒྱུན་མཐུད་དུ་དག་ཐེར་བྱེད་པ། བརྟག་དཔྱད་ཞིབ་འཇུག་གི་སྲོལ་བཟང་དར་སྤེལ་གཏོང་བ། དམ་པ་དོན་གཉེར་དང་དོན་དངོས་གཉེར་སྒྲུབ་ཀྱི་བྱ་སྤྱོད་དར་སྤེལ་བཏང་ནས། ལོ་རྒྱུས་དང་མི་དམངས་ཀྱི་ཉམས་ཟད་ཐེབས་ཐུབ་པའི་གྲུབ་འབྲས་ཐོབ་བཅུག་དགོས། རུལ་སུངས་མི་ཕོད་པ་དང་རུལ་སུངས་མི་རུང་པ། རུལ་སུངས་མི་ཉན་པ། རུལ་སུངས་མི་བསམ་པ་གཅིག་ཏུ་སྐུལ་ནས། རུལ་སུངས་ལ་རྒོལ་བ་ལས་རྣམ་པ་རྒྱལ་འཐུབ་དགོས་ཞེས་ནན་གྱིས་བཏོན།

  ཚང་འཛོམས་གྲོས་ཚོགས་ཐོག  ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་རྣམས་བློ་མཐུན་ཞི་ཅིན་ཕིང་གིས་སྲོག་ཤིང་མཛད་པའི་ཏང་ཀྲུང་དབྱང་གི་མཐའ་འཁོར་དུ་མཐུན་སྒྲིལ་ཟབ་མོ་དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རླབས་ཆེན་དར་ཆ་མཐོན་པོར་བསྒྲེངས་པ། རླབས་ཆེན་ཏང་འཛུགས་ཀྱི་སྙིང་སྟོབས་དར་སྤེལ་གཏོང་བ། ངེས་པར་གསུམ་བརྟན་སྲུང་། རང་རྟོན་རང་དར་དང་དྲང་སྲུང་གསར་གཏོད། ཡར་ཐོན་འབད་འབུངས། འབད་པ་ལྷོད་མེད་བཅས་བྱས་ནས། ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྱོང་ལ་སྐུལ་འདེད་བཏང་སྟེ། ཏང་གི་ཚོགས་ཆེན་ཉི་ཤུ་པས་གཏན་འཁེལ་བྱས་པའི་དམིགས་འབེན་ལས་འགན་འགྲུབ་ཆེད་མཉམ་དུ་འབད་བརྩོན་བྱེད་དགོས་ཞེས་སྐུལ་མའང་བཏང་ཡོད།