ཞི་ཅིན་ཕིང་གིས་ཧུའུ་ནན་དུ་གཟིགས་ཞིབ་གནང་།

  ཉེ་ཆར། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གིས་ཧུའུ་ནན་ལ་རྟོག་ཞིབ་གནང་དུས། ཧུའུ་ནན་གྱིས་རང་ཉིད་འཕེལ་རྒྱས་གསར་པ་འཛུགས་སྐྱོང་བྱེད་རིང་གི་འཐབ་ཇུས་དམིགས་གནད་ཡང་དག་བཟུང་ནས་བརྟན་ཐོག་ཡར་འཕེལ་གྱི་ལས་ཀའི་སྤྱི་འགྲོས་རྒྱུན་འཁྱོངས་ཤིང་། སྤུས་མཐོའི་འཕེལ་རྒྱས་གཡོ་བ་མེད་པ་རྒྱུན་འཁྱོངས། བཅོས་བསྒྱུར་གསར་གཏོད་དང་བདེན་འཚོལ་དངོས་གཉེར་རྒྱུན་འཁྱོངས་བྱས་ནས། རྒྱལ་ཁབ་ཀྱི་སྔོན་ཐོན་བཟོ་བསྐྲུན་ལས་རིགས་ཀྱི་མཐོ་གནས་གལ་ཆེན་དང་སྲོག་ཤིང་གི་འགྲན་རྩོད་ནུས་པ་ཡོད་པའི་ཚན་རྩལ་གསར་གཏོད་ཀྱི་མཐོ་གནས་གསར་པ། ནང་ལོགས་ས་ཁུལ་གྱི་བཅོས་བསྒྱུར་སྒོ་འབྱེད་ཀྱི་མཐོ་གནས་བསྐྲུན་པའི་ཐད་མུ་མཐུད་དུ་ཤུགས་འདོན་ཞིང་། དབུས་རྒྱུད་ས་ཁུལ་དར་རྒྱས་དང་འབྲི་ཆུའི་དཔལ་འབྱོར་རྒྱུད་འཕེལ་རྒྱས་ཁྲོད་འབད་བརྩོན་ལྷོད་མེད་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་ཧུའུ་ནན་གྱི་ལེའུ་རྩོམ་དགོས་ཞེས་ནན་གསུངས་གནང་།

  ཟླ་བ་གསུམ་པའི་ཚེས་བཅོ་བརྒྱད་ཉིན་ནས་ཚེས་ཉེར་གཅིག་ཉིན་གྱི་བར། ཞི་ཅིན་ཕིང་གིས་ཧུའུ་ནན་ཞིང་ཆེན་ཏང་ཨུའི་ཧྲུའུ་ཅི་ཧྲེན་ཞའོ་མེན་དང་ཞིང་ཆེན་སྲིད་གཞུང་གི་འགོ་འཛིན་མའོ་ཝེ་མེན་གྱི་ཕེབས་རོགས་འོག སྔ་རྗེས་སུ་ཁྲང་ཧྲ་དང་ཁྲང་ཏེ་སོགས་སུ་ཕེབས་ནས། སློབ་གྲྭ་དང་ཁེ་ལས། ལོ་རྒྱུས་རིག་གནས་སྲང་ཁུལ། གྲོང་ཡུལ་སོགས་སུ་ཕེབས་ཏེ་གཟིགས་ཞིབ་གནང་བ་རེད། 

  ཚེས་བཅོ་བརྒྱད་ཉིན་གྱི་ཕྱི་དྲོར། ཞི་ཅིན་ཕིང་ཧུའུ་ནན་དགེ་འོས་སློབ་གླིང་དང་པོའི་མཁར་ལྷོའི་དཔེ་གླིང་སློབ་ཁུལ་དུ་ཕེབས་ནས་གཟིགས་ཞིབ་གནང་། སློབ་གྲྭ་འདི་ཉིད་སྔོན་ཆད་སུང་རྒྱལ་རབས་སྐབས་བཙུགས་པའི་མཁར་ལྷོའི་དཔེ་གླིང་ནས་མཆེད་པ་ཡིན་ལ། ཉེ་རབས་ནས་རྒན་རབས་པའི་འབྱོར་མེད་གྲལ་རིམ་གྱི་གསར་བརྗེ་པ་དང་མཁས་པ་སྐད་གྲགས་ཅན་དུ་མ་གསོ་སྐྱོང་བྱས་ཡོད། ཞི་ཅིན་ཕིང་གིས་ན་གཞོན་སྐབས་ཀྱི་མའོ་ཙེ་ཏུང་གི་བརྗོད་དོན་འགྲེམས་སྟོན་ལ་གཟིགས་ཤིང་། སློབ་གླིང་གི་གསར་བརྗེ་འཕེལ་རྒྱས་ཀྱི་བརྒྱུད་རིམ་དང་གསར་བརྗེའི་ཐོན་ཁུངས་བེད་སྤྱོད་ཡག་པོ་བཏང་ཚུལ་སོགས་ལ་རྒྱུས་ལོན་གནང་བ་རེད། སློབ་གླིང་གི་ཚོམས་ཆེན་དུ། ཞི་ཅིན་ཕིང་གིས་དགེ་སློབ་ཀྱི་སྐུ་ཚབ་དང་སྙིང་ཉེ་བས་བཀའ་འདྲི་གནང་བ་རེད། ཁོང་གིས་རྒྱལ་ཁབ་སྟོབས་ལྡན་དུ་འགྱུར་དགོས་ན། ངེས་པར་དུ་སློབ་གསོ་གཉེར་སྐྱོང་ཡག་མོ་བྱེད་དགོས། དགེ་འོས་སློབ་གླིང་དང་པོ་འདི་ནི་རྒྱལ་གཅེས་རིང་ལུགས་ཀྱི་སློབ་གསོ་དང་གསར་བརྗེའི་སྙིང་སྟོབས་འཛིན་སྐྱོང་བྱེད་སའི་གནས་མཆོག་ཡིན་པས། གསར་བརྗེའི་ཐོན་ཁུངས་འདི་ཉིད་སྲུང་སྐྱོབ་དང་བེད་སྤྱོད་ཡག་པོ་བྱེད་དགོས།

  སློབ་གྲྭས་ཀུན་སྤྱོད་ལ་བརྟེན་ནས་མི་སྣ་གསོ་སྐྱོང་བྱེད་ཅིང་དགེ་རྒན་གྱིས་སློབ་དཔོན་ཡག་མོ་བྱ་དགོས་ལ། སློབ་མའི་ཤེས་བྱ་རིག་གནས་བྱང་ཚད་ཇེ་མཐོར་གཏོང་བར་མ་ཟད་བསམ་བློ་ཆབ་སྲིད་སློབ་ཚན་ཡག་མོ་ཁྲིད་པ་དང་། སློབ་མས་ཡ་རབས་སྤྱོད་ལྡན་དང་ངོ་ཚ་ཁྲེལ་ཡོད་ཤེས་པའི་སློབ་གསོ་དང་སྣེ་ཁྲིད་དེ། སྤྱི་ཚོགས་རིང་ལུགས་ཀྱི་སྲོག་ཤིང་གི་རིན་ཐང་ལྟ་བ་ཆགས་པ་དང་། རྒྱལ་ཁབ་ལ་དྲིན་ལན་འཇལ་བ་དང་རྒྱལ་ཁབ་སྟོབས་ལྡན་དུ་འགྱུར་བའི་འདུན་པ་ཆེན་པོ་བསྐྱེད་དེ་སྟོབས་ལྡན་རྒྱལ་ཁབ་འཛུགས་སྐྱོང་དང་མི་རིགས་བསྐྱར་དར་གཏོང་བའི་འགན་ཆེན་ཁུར་བའི་འཇོན་ཐང་ཅན་ཞིག་བྱེད་དགོས་ཞེས་གསུངས།

  དེའི་རྗེས་སུ་ཞི་ཅིན་ཕིང་པ་སི་ཧྥ་ཧྲན་ཧྲན་གློག་རྫས་རྒྱུ་ཆ་ཚད་ཡོད་སྤྱི་གཉེར་ཁང་དུ་གཟིགས་ཞིབ་ཕེབས་ཤིང་། འདི་ནི་ལིས་གྱེས་རྡུལ་གློག་རྫས་ཕོ་སྣེའི་རྒྱུ་ཆ་ཞིབ་འཇུག་གསར་སྤེལ་དང་ཐོན་སྐྱེད། ཉོ་ཚོང་བྱེད་པའི་ཀྲུང་གོ་དང་འཇར་མན་གཉིས་ཀྱི་མ་དངུལ་གཏོང་བའི་ཁེ་ལས་ཤིག་རེད། ཞི་ཅིན་ཕིང་གིས་ས་གནས་དེ་གའི་སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་མགྱོགས་པོར་གཏོང་བ་དང་། ཆུ་ཚད་མཐོ་བའི་ཕྱི་ཕྱོགས་སྒོ་འབྱེད་རྒྱ་བསྐྱེད་པ་སོགས་ཀྱི་གནས་ཚུལ་མཚམས་སྦྱོར་ལ་གསན། ཁེ་ལས་ཀྱི་ཐོན་རྫས་འགྲེམ་སྟོན་ལ་གཟིགས་ཏེ་རྒྱུ་ཆ་ནུས་པ་ཚོད་ལྟ་གནས་ཚུལ་དང་གློག་རྫས་ཐོན་སྐྱེད་བརྒྱུད་རིམ་ལ་རྒྱུས་ལོན་གནང་སྟེ། ཁོང་གིས་ཚན་རྩལ་གསར་གཏོད་དང་སྤུས་མཐོའི་འཕེལ་རྒྱས་ནི་ཁེ་ལས་རྒྱུན་མི་ཆད་པར་འཕེལ་རྒྱས་དང་ཕམ་ཁ་མི་འབྱུང་བའི་གནད་འགག་ཡིན་ལ། དམངས་གཉེར་ཁེ་ལས་དང་མ་དངུལ་མཉམ་བསྲེས་ཁེ་ལས་ལ་འདིའི་ཐད་ལ་བྱས་རྗེས་ཆེན་པོ་འཇོག་ཐུབ། ཀྲུང་གོའི་སྒོ་འབྱེད་ཀྱི་སྒོ་ཆེན་ཇེ་ཆེ་ནས་ཇེ་ཆེ་ཡིན། ང་ཚོས་འཛམ་གླིང་རྒྱལ་ཁབ་སོ་སོ་དང་མཉམ་དུ་སྤེལ་རེས་མཉམ་ལས་ཇེ་དྲག་གཏོང་འདོད་ཡོད་པས། ཕྱི་རྒྱལ་གྱི་ཁེ་ལས་སྔ་ལས་མང་པོ་ཀྲུང་གོ་རུ་མ་གཏོང་འཕེལ་རྒྱས་ཡོང་བར་དགའ་བསུ་ཡོད་ཅེས་ནན་གསུང་གནང་། 

  ཚེས་བཅུ་དགུ་ཉིན་ལ་ཞི་ཅིན་ཕིང་གིས་ཁྲང་ཏི་གྲོང་ཁྱེར་དུ་རྟོག་ཞིབ་ཞིབ་འཇུག་གནང་། ཡོན་ཅང་གཙང་འགྲམ་དུ་ཡོད་པའི་ཁྲང་ཏི་ཧོ་སྲང་ལམ་ལ་ལོ་རྒྱུས་ཡུན་རིང་ལྡན་ལ། ༡༩༤༣ལོའི་ཁྲང་ཏི་དམག་འཁྲུག་ནང་གཏོར་བརླག་ཐེབས་ཡོད། ཉེ་བའི་ལོ་ཁ་ཤས་ནང་ལ་ཁྲང་ཏི་གྲོང་ཁྱེར་གྱིས་ཆུ་འགྲམ་སྲང་ལམ་གྱི་རྣམ་པ་སླར་གསོ་དང་། གནས་དེ་ཉིད་ལོ་རྒྱུས་རིག་གནས་སྲང་ཁུལ་དུ་བསྐྲུན་ཡོད། ཉིན་དེའི་སྔ་དྲོར་ཞི་ཅིན་ཕིང་ཁྲང་ཏི་ཧོ་སྲང་ལམ་དུ་ཕེབས་ནས། ཁྱད་ལྡན་སིལ་ཟས་དང་ཁྱད་ལྡན་ཐོན་རྫས། ཁྱད་ལྡན་བཟོ་རྩལ་ཐོན་རྫས་ལ་གཟིགས་ཞིབ་གནང་ཞིང་།ཚོང་བདག་དང་ཡུལ་སྐོར་བ་དང་ཁ་བརྡ་ཞིབ་མོ་གནང་ཞོར།དངོས་མེད་ཤུལ་བཞག་རིག་གནས་ལག་རྩལ་འགྲེམ་སྟོན་ལ་གཟིགས་ཤིང་། ཁྲང་ཏི་གྲོང་རྙིང་སྲང་ལམ་ཞིག་གསོ་བེད་སྤྱོད་དང་། གྲོང་ཁྱེར་འཆར་འགོད། ཆུའི་ཁོར་ཡུག་ཕྱོགས་བསྡུས་བཅོས་སྐྱོང་སོགས་གནས་ཚུལ་ལ་རྒྱུས་ལོན་ཞིབ་མོ་གནང་སྟེ། ཞི་ཅིན་ཕིང་གིས་ངོ་མཚར་ཆེ་བའི་ས་གནས་ཁྱད་ལྡན་སྲོལ་རྒྱུན་རིག་གནས་ཡོད་པས་འོད་སྟོང་འབར་བའི་ཀྲུང་གོའི་དཔལ་ཡོན་མཉམ་དུ་བསྐྲུན་པར་མ་ཟད། དཔལ་འབྱོར་སྤྱི་ཚོགས་འཕེལ་རྒྱས་ལ་རམ་འདེགས་བྱེད་ཅིང་མཆིས། ཁྲང་ཏི་ནི་རིག་གནས་རྒྱུན་འཛིན་ཡོད་པའི་ས་གནས་རེད། འདི་ནའི་སྒྲ་སྙན་དང་རྒྱང་གཞས། ལས་གཞས་སོགས་འོས་ཤིང་འཚམས་པོའི་སྒོས་རྒྱུན་འཛིན་དང་བེད་སྤྱོད་ཡག་མོ་བྱེད་ཅིང་དུས་བབ་དང་བསྟུན་ནས་འཕེལ་རྒྱས་ཡག་མོ་གཏོང་དགོས་ཞེས་གསུངས་པ་རེད།

  ཧུའུ་ནན་ནི་རྒྱལ་ཡོངས་ཀྱི་འབྲུ་རིགས་ཐོན་ཁུལ་གཙོ་བོའི་ཞིང་ཆེན་བཅུ་གསུམ་གྱི་ཡ་གྱལ་ཡིན་ལ། ཆུ་འབྲས་རྨོ་རྒྱ་དང་ཐོན་ཚད་ ཚང་མ་རྒྱལ་ཡོངས་ཐོག་ཨང་དང་པོར་ཟིན། ཉིན་དེའི་ཕྱི་དྲོར། ཞི་ཅིན་ཕིང་ཁྲང་ཏེ་གྲོང་ཁྱེར་ཏེང་ཁྲེང་ཆུས་ཞེ་ཅ་ཕུའུ་གྲོང་རྡལ་ཀང་ཀྲུང་ཕིང་གྲོང་ཚོར་འབྱོར་ནས། ས་གནས་ཀྱི་འབྲུ་རིགས་ཐོན་སྐྱེད་མུའུ་ཁྲི་ཡི་ཕྱོགས་བསྡུས་དཔེ་སྟོན་ཡན་ལག་ཁུལ་ལ་ཕེབས་ནས། འབྲས་མྱུག་གསོ་སྤེལ་དང་། དཔྱིད་འདེབས་དང་སོ་ནམ་གྲ་སྒྲིག་གནས་ཚུལ་ལ་གཟིགས་ཞིབ་གནང་ཞིང་། སྤུས་མཐོའི་ཞིང་ལས་དེང་རབས་ཅན་གོང་དུ་སྤེལ་བའི་གནས་ཚུལ་མཚམས་སྦྱོར་ལ་གསན་ཞོར། འབྲུ་རིགས་འདེབས་པའི་དུད་ཆེན་དང་ཞིང་ལས་ལག་རྩལ་མི་སྣ། གཞི་རིམ་ལས་བྱེད་པ་དང་མཉམ་དུ་དངུལ་གཏོང་དང་ཐོན་འབབ་སྐོར་རྩིས་ཞིབ་མོ་བརྒྱབ་པ་རེད། ཞི་ཅིན་ཕིང་གིས་རང་རྒྱལ་ལ་མི་འབོར་དུང་ཕྱུར་བཅུ་བཞི་ལྷག་ཡོད་པས། འབྲུ་རིགས་བདེ་འཇགས་ངེས་པར་ཏུ་རང་གིས་འགན་ཁྱོག་དགོས་ལ། ཀྲུང་གོ་བའི་ཁ་ཕོར་ནང་གཙོ་བོ་ཀྲུང་གོའི་འབྲུ་རིགས་ཡིན་དགོས། ཚད་གཞི་མཐོ་བའི་ཞིང་ཁ་འཛུགས་བསྐྲུན་དང་། གཞི་ཁྱོན་ཅན་གྱི་འོས་འཚམ་ཚོང་གཉེར་བྱེད་པ། སྲིད་ཇུས་ཀྱི་རྒྱབ་སྐྱོར་དང་དཔེ་སྟོན་སྣེ་ཁྲིད་ཇེ་དྲག་གཏོང་བ། སོན་བཟང་དང་འཕྲུལ་ཆས་བཟང་པོ། བྱེད་ཐབས་བཟང་པོ་བཅས་ཁྱབ་གདལ་རྒྱ་ཆེར་གཏོང་དགོས། རྨོ་འདེབས་ཞིབ་ཚགས་བྱེད་ཐུབ་དགོས་ལ། འབྲུ་རིགས་མུའུ་རེའི་ཐོན་ཚད་དང་སྤུས་ཀ་མཐོ་རུ་བཏེགས་ནས། འབྲུ་རིགས་བཏབ་ནའང་ཕྱུག་པོར་འགྱུར་ཞིང་། ཞིང་པའི་ཁྱིམ་དུད་སྔར་བས་མང་པོ་དེང་རབས་ཅན་གྱི་ཞིང་ལས་ནང་ཞུགས་པར་བྱེད་དེ། ཀྲུང་གོའི་ཁྱད་ཆོས་ཀྱི་ཞིང་ལས་དེང་རབས་ཅན་གྱི་ལམ་བུའི་ཐོག་གོམ་པ་བརྟན་པོས་མདུན་དུ་སྐྱོད་དགོས་ཞེས་ནན་གསུང་གནང་།

  དེའི་རྗེས་ཞི་ཅིན་ཕིང་འབྲུ་རིགས་འདེབས་མཁན་དུད་ཆེན་ཏའེ་ཧུང་ཁྱིམ་ཚང་ལ་ཕེབས་ནས། ཞིང་ལས་འཕྲུལ་ཆས་དང་དཔྱིད་འདེབས་དངོས་རྫས་གྲ་སྒྲིག་ལ་གཟིགས་ཞིབ་གནང་ཞིང་། གྲོང་སྡེའི་ཏང་དང་མང་ཚོགས་ཞབས་ཞུ་ལྟེ་གནས་ལ་ཕེབས་ནས་ས་གནས་ཀྱི་གཞི་རིམ་ཁུར་པོ་ཇེ་ཡང་གཏོང་བ་དང་། གཞི་རིམ་བཅོས་སྐྱོང་ཕན་འབྲེས་ཇེ་ཆེར་གཏོང་བ་སོགས་ཀྱི་གནས་ཚུལ་ལ་རྒྱུས་ལོན་མཛད། ཁོང་གིས་ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ཀྱི་གནད་དོན་མཐའ་གཅིག་ཏུ་དག་ཐེར་བྱེད་དགོས་ལ། དམག་ཧྲག་སྲིད་བསྡུ་དང་ནམ་རྒྱུན་ལྷོད་ལྷོད་མེད་པར་ལས་ཀ་འདི་དམ་འཛིན་བྱེད་དགོས་ཞེས་གསུངས། ཁོང་གིས་གཞི་རིམ་ལས་བྱེད་པས་ཐོན་ལས་འཕེལ་རྒྱས་དང་གྲོང་ཚོ་བཅོས་སྐྱོང་ཐད་ཀུན་གྱིས་ཐབས་འབུལ་ཤུགས་འདོན་བྱས་ནས། ཞིང་པ་མི་སེར་གྱིས་ཁས་ལེན་པའི་འབྲས་བུ་རྒྱུན་མི་ཆད་པར་ཐོབ་པར་འབད་དགོས་པའི་ཞལ་གདམས་གནང་བ་རེད།

  ཞལ་གྱེས་ཁར། གྲོང་ཚོའི་མི་སེར་ཚོས་གཅིག་ཏུ་འཛོམས་ནས་སྤྱི་ཁྱབ་ཧྲུའུ་ཅི་ལ་སྐྱེལ་མ་ཞུས་ཤིང་། ཞི་ཅིན་ཕིང་གིས་ཐུགས་བརྩེ་བ་ཆེན་མོས་ཚང་མར་ཏང་ཀྲུང་དབྱང་གིས་ཞིང་གསུམ་ལས་ཀར་ཧ་ཅང་མཐོང་ཆེན་བྱེད་ཅིང་ཡོད་ལ། སྲིད་ཇུས་བྱེད་ཐབས་གང་ཡག་བཏོན་ནས་མི་སེར་གྱིས་དོ་ཁུར་བྱེད་ས་དང་དགོས་མཁོ་སྐོང་ཤག་ཤག་ཡིན། གྲོང་གསེབ་དར་རྒྱས་ཀྱི་འཆར་གཞི་ཡག་མོ་དངོས་སུ་འགྲུབ་ཐུབ་པར་བྱ་རྒྱུ་ཡིན་ཞེས་གསུང་བ་ཆིགས་ཅིག དགའ་བསུའི་ཐལ་མོ་བརྡབས་སྒྲས་ཀུན་ལ་ཁྱབ།

ཚེས་ཉེར་གཅིག་ཉིན་གྱི་སྔ་དྲོར། ཞི་ཅིན་ཕིང་གིས་ཧུའུ་ནན་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་ལས་ཀའི་སྙན་ཞུ་ལ་གསན་ནས། ཧུའུ་ནན་གྱི་ལས་དོན་ཁག་ལ་ཐོབ་པའི་གྲུབ་འབྲས་ལ་གདེང་འཇོག་གནང་སྟེ།

  ཞི་ཅིན་ཕིང་གིས། ཚན་རྩལ་གསར་གཏོད་ནི་སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་བའི་སྲོག་ཤིང་གི་རྒྱུ་རྐྱེན་རེད། ཚན་རྩལ་གསར་གཏོད་ཀྱིས་ཐོན་ལས་གསར་གཏོད་སྣེ་ཁྲིད་པའི་ཐད་ཤུགས་དེ་བས་ཆེན་པོ་བརྒྱབ་ནས། རང་མོས་སྒོས་རྒྱལ་ཁབ་འཐབ་ཇུས་ཚན་རྩལ་སྟོབས་ཤུགས་དང་སྦྲེལ་མཐུད་བྱས་ནས། རྒྱལ་ཁབ་ཕྱི་ནང་གི་ཞིབ་འཇུག་གསར་སྤེལ་ལས་ཁུངས་རྩེ་གྲལ་ནང་འདྲེན་གང་ལེགས་བྱས་ཏེ། གནད་འགག་ཁྱབ་ཁོངས་ཀྱི་རང་བདག་གསར་གཏོད་ནུས་པ་གོང་མཐོར་གཏོང་དགོས། ཁེ་ལས་ཀྱི་ཚན་རྩལ་གསར་གཏོད་བྱེད་མཁན་གྱི་གོ་གནས་ཇེ་དྲག་བཏང་ནས། གསར་གཏོད་མ་ལག་དང་ཐོན་ལས་མ་ལག མ་དངུལ་མ་ལག ཤེས་ལྡན་མི་སྣའི་མ་ལག་བཅས་མཉམ་འདྲེས་ཟབ་མོ་བྱས་ནས། ཚན་རྩལ་གྲུབ་འབྲས་མགྱོགས་མྱུར་དུ་ཐོན་སྐྱེད་ནུས་ཤུགས་དངོས་ལ་བསྒྱུར་དགོས། ལེགས་ཆའི་ཐོན་ལས་ལ་དམིགས་ནས། ཐོན་ལས་རྨང་གཞི་བསྐྱར་སྐྲུན་དང་ལག་རྩལ་སྒྲིག་ཆས་གལ་ཆེན་འགག་སྒྲོལ་ཇེ་དྲག་བཏང་སྟེ། མུ་མཐུད་དུ་སྔོན་ཐོན་བཟོ་སྐྲུན་ལས་རིགས་ཆེན་པོ་དང་སྟོབས་ལྡན་གཏོང་བ་དང་། ཐོན་ལས་མཐོ་རིམ་ཅན་དང་རིག་ནུས་ཅན། འབག་མེད་ཅན་འཕེལ་རྒྱས་བཏང་ནས། རྒྱལ་ཁབ་རིམ་པའི་ཐོན་ལས་ཚོགས་པ་འཛུགས་སྐྱོང་བྱེད་དགོས་ཞེས་གསུངས།

  ཞི་ཅིན་ཕིང་གིས། སྔར་ལས་ལྷག་པའི་སྒོ་ནས་བཅོས་སྒྱུར་ཟབ་སྤེལ་ལ་གནད་དོན་ཁྲིད་ཕྱོགས་འབུར་ཐོན་བྱེད་པ་དང་། འཕེལ་རྒྱས་ཀྱི་བཀོད་པ་གསར་པ་དང་སྤུས་མཐོའི་འཕེལ་རྒྱས་ལ་ཚོད་འཛིན་བྱས་པའི་བཀག་རྒྱ་དང་གནད་དོན་སེལ་བ་དང་། ཁོར་ཡུག་དང་དམངས་འཚོ་འཕེལ་རྒྱས་གཏོང་བའི་དཀའ་ཁག་དང་གནད་དོན། སྤྱི་ཚོགས་འདྲ་མཉམ་དྲང་བདེན་དང་འགལ་བའི་ཀུན་གྱིས་དོ་སྣང་བྱས་པའི་གནད་དོན་བཅས་ཐག་གཅོད་བྱས་པར་མ་ཟད། ཉེན་ཁ་ཆེན་པོ་སྔོན་འགོག་ནུས་ལྡན་བྱས་ནས་རྒྱུན་ཆད་མེད་པར་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྒུལ་ནུས་དང་གསོན་ཤུགས་སྣོན་དགོས། ཧུའུ་ནན་གྱིས་བཅོས་སྒྱུར་མ་ལག་གཅིག་བསྡུས་ཇེ་དྲག་བཏང་ནས། རྒྱལ་ཁབ་གཅིག་གྱུར་གྱི་ཚོང་ར་ཆེན་པོ་འཛུགས་སྐྱོང་ནང་ཞུགས་པ་དང་ཁྱོན་ཡོངས་ནས་དབུས་རྒྱུད་ས་ཁུལ་དར་རྒྱས་དང་འབྲི་ཆུའི་དཔལ་འབྱོར་ཁུལ་འཕེལ་རྒྱས་ཀྱི་འཐབ་ཇུས་ནང་ཞུགས་པ་དང་། རྒྱུད་གཅིག་ལམ་གཅིག་མཉམ་སྐྲུན་དང་ཟབ་ཞུགས། ལམ་ལུགས་ཅན་གྱི་སྒོ་འབྱེད་བརྟན་ཐོག་རྒྱ་བསྐྱེད་དང་ཚད་གཞི་མཐོ་བའི་རང་མོས་ཉོ་ཚོང་ཚོད་ལྟ་ཁུལ་ཡག་པོ་འཛུགས་པ། ཀྲུང་གོ་དང་ཧྥེ་གླིང་དཔལ་འབྱོར་ཉོ་ཚོང་གི་མཉམ་ལས་ཟབ་སྤེལ་གྱི་སྔོན་སྐྱོད་ཁུལ་འཛུགས་སྐྱོང་བྱེད་དགོས་ཞེས་གསུངས།

  ཞི་ཅིན་ཕིང་གིས་གྲོང་གསེབ་ཁྱོན་ཡོངས་དར་རྒྱལ་གཏོང་བ་ནི་དུས་རབས་གསར་པ་དང་རྒྱང་སྐྱོད་གསར་པའི་ཐོག་ཞིང་གསུམ་ལས་ཀའི་གཞིར་འཛིན་ས་རེད། ཧུའུ་ནན་གྱིས་རྒྱལ་ཁབ་འབྲུ་རིགས་བདེ་འཇགས་ སྲུང་སྐྱོང་གི་འགན་འཁྲི་ཕྲག་ཏུ་ཁུར་བ་དང་། ས་བོན་དང་རྨོ་ཞིང་ཀྱི་གཙོ་གནད་གཉིས་དམ་དུ་བཟུང་ནས། འདེབས་འཛུགས་དང་ཞིང་ལས་འཕྲུལ་ཆས་ཀྱི་གནད་འགག་དང་ལྟེ་བའི་ལག་རྩལ་འགག་སྒྲོལ་ཇེ་མགྱོགས་སུ་གཏོང་དགོས། ཞིང་ལས་ལྟ་བ་དང་ཟས་རིགས་ལྟ་བ་གཙོ་བོ་རྒྱུན་འཁྱོངས་བྱས་ནས། ཁྱད་ལྡན་ཞིང་ལས་དང་ཞིང་ལས་ཐོན་རྫས་ཀྱི་བཟོ་སྣོན་ལས་རིགས་འཕེལ་རྒྱས་གང་ཐུབ་དང་། ཞིང་ལས་ཐོན་ལས་ཅན་གྱི་ཆུ་ཚད་མཐོར་འདེགས་གཏོང་དགོས། གྲོང་ཡུལ་མཉམ་བསྲེས་འཕེལ་རྒྱས་ཇེ་ཟབ་ལ་སྐུལ་འདེད་དང་། རྫོང་ཁོངས་དཔལ་འབྱོར་ཇེ་སྟོབས་བཏང་སྟེ། གྲོང་ཁྱེར་དང་གྲོང་གསེབ་རྒྱུ་ཆ་ཕྱོགས་གཉིས་འཁོར་རྒྱུག་བྱེད་པ་དང་། ཚན་རིག་དང་མཐུན་པའི་སྒོས་གྲོང་གསེབ་རྨང་གཞིའི་སྒྲིག་ཆས་དང་སྤྱི་པའི་ཞབས་ཞུ་བཀོད་པ་གཅིག་གྱུར་འཆར་འགོད་བྱེད་དགོས། གྲོང་གསེབ་བསམ་པའི་དཔལ་ཡོན་འཛུགས་སྐྱོང་དངོས་སུ་ཇེ་དྲག་ཏུ་བཏང་ནས། གོམས་སྲོལ་ཡག་པོ་ཆགས་པར་འབད་དགོས།  ཏང་རྩ་འཛུགས་ཀྱིས་དབུ་ཁྲིད་པའི་རང་སྐྱོང་དང་ཁྲིམས་སྐྱོང་།ཡ་རབས་སྐྱོང་བ་བཅས་ཟུང་དུ་འབྲེལ་བའི་གཞི་རིམ་བཅོས་སྐྱོང་མ་ལག་འཐུས་ཚང་བཏང་ནས། དུས་རབས་གསར་པའི་ཧྥང་ཆའོ་ཉམས་མྱོང་རྒྱུན་འཁྱོངས་དང་འཕེལ་རྒྱས་གཏོང་དགོས། ཡང་བསྐྱར་དབུལ་ལོག་འགོག་པའི་ལྟ་སྐུལ་ཚོད་ལེན་རོགས་སྐྱོར་ལམ་ལུགས་དོན་འཁྱོལ་བྱས་ནས། མཐའ་གཅིག་ཏུ་གཞི་ཁྱོན་ཅན་གྱི་ཡང་བསྐྱར་དབུལ་ཕོངས་སུ་མི་འགྱུར་བའི་མ་མཐའི་ཚད་གཞི་བརྟན་སྲུང་བྱེད་དགོས་ཞེས་གསུངས་པ་རེད།

  ཞི་ཅིན་ཕིང་གིས་ཧུའུ་ནན་གྱིས་རིག་གནས་འགན་འཁྲི་གསར་པ་སྔར་བས་ཕྲག་ཏུ་ཡག་པོ་ཁུར་ནས། ཀྲུང་ཧྭ་མི་རིགས་དེང་རབས་དཔལ་ཡོན་འཛུགས་སྐྱོང་ཁྲོད་བྱས་རྗེས་གསར་པ་འཇོག་དགོས། གསར་བརྗེའི་ཐོན་ཁུངས་སྲུང་སྐྱོང་དང་བེད་སྤྱོད་ཡག་པོ་བྱེད་ཅིང་། གསར་བརྗེའི་སྲོལ་རྒྱུན་དང་རྒྱལ་གཅེས་རིང་ལུགས་སློབ་གསོ་ཇེ་དྲག་ཏུ་གཏོང་བ། རྒྱ་ཆེའི་ལས་བྱེད་མང་ཚོགས་ཀྱིས་སྲོལ་བཟང་དར་སྤེལ་དང་། གསར་བརྗེའི་སྙིང་སྟོབས་རྒྱུན་འཛིན་བྱེད་པར་སྣེ་ཁྲིད་པ་དང་སྤྱི་ཚོགས་རིང་ལུགས་སྲོག་ཤིང་རིན་ཐང་ལྟ་བ་ལག་བསྟར་བྱས་ནས། དུས་རབས་གསར་པའི་རྣམ་པ་གསར་པ་གསོ་སྐྱོང་བྱེད་དགོས། རིག་གནས་དང་ཚན་རྩལ་མཉམ་བསྲེས་ཀྱི་ནུས་ལྡན་ལམ་ལུགས་འཚོལ་ཞིབ་བྱེད་པ་དང་། རིག་གནས་རྣམ་པ་གསར་པ་འཕེལ་རྒྱས་ཇེ་མགྱོགས་སུ་བཏང་ནས། རིག་གནས་ཐོན་ལས་ཀྱི་འཕར་སྣོན་གསར་པ་སྔར་བས་མང་པོ་ཆགས་པར་བྱེད་དགོས། རིག་གནས་དང་ཡུལ་སྐོར་མཉམ་བསྲེས་ཟབ་མོ་དང་། ཧུའུ་ནན་ས་གཞི་ཆེན་མོའི་རི་སྔོ་པོ་དང་ཆུ་དྭངས་མོ་དང་། གནམ་གཡའ་དྭངས་ཤིང་ས་གཙང་མ་སྲུང་སྐྱོང་ཡག་པོ་བྱས་ནས། རང་བྱུང་མཛེས་ལྗོངས་དང་མི་ཆོས་ཡུལ་སྲོལ་དེ་ཡུལ་སྐོར་ལས་རིགས་ཀྱི་རྒྱུན་མཐུད་ངོ་མཚར་ལ་བསྒྱུར་དགོས་ཞེས་ནན་གསུང་གནང་བ་རེད།

  ཞི་ཅིན་ཕིང་གིས། སྤུས་མཐོའི་འཕེལ་རྒྱས་དང་ཀྲུང་གོའི་ལུགས་ཀྱི་དེང་རབས་ཅན་དུ་འགྱུར་བར་སྐུལ་དགོས་ན་ངེས་པར་དུ་ཏང་གི་འཛུགས་སྐྱོང་ཇེ་དྲག་དང་ཇེ་ལེགས་གཏོང་དགོས། བརྗོད་དོན་གཙོ་བོའི་སློབ་གསོའི་གྲུབ་འབྲས་སྲ་བརྟན་དང་རྒྱ་ཆེར་གཏོང་བ་དང་། ཡུན་ཕན་ནང་རྐྱེན་འཐུས་སྒོ་ཇེ་ཚང་དུ་གཏོང་བ། ཡང་དག་པའི་ཆབ་སྲིད་གྲུབ་འབྲས་ལྟ་བ་འཛུགས་པ་དང་ལག་བསྟར་བྱས་ནས། ཕྱི་ཚུལ་རིང་ལུགས་དག་ཐེར་ཟབ་མོ་རྒྱུན་མཐུད་དེ་གཞི་རིམ་གྱི་ཁུར་པོ་ཇེ་ཡང་གཏོང་དགོས། ཏང་གི་སྒྲིག་ལམ་ལ་སློབ་སྦྱོང་བྱེད་པའི་སློབ་གསོ་སྤེལ་བ་དང་། ཏང་ཡོན་ལས་བྱེད་པས་སྒྲིག་ལམ་སློབ་སྦྱོང་དང་སྒྲིག་ལམ་ཤེས་པ། སྒྲིག་ལམ་གནད་ཆེར་འཛིན་པ། སྒྲིག་ལམ་སྲུང་བ་བཅས་ལ་སྣེ་ཁྲིད་པ། འགོ་ཁྲིད་ལས་བྱེད་པས་ཡང་དག་པའི་དབང་ཆའི་ལྟ་བ་འཛུགས་སྐྱོང་དང་ དབང་ཆ་དྲང་མོ་སྤྱོད་པ། ཁྲིམས་ལྟར་དབང་ཆ་སྤྱོད་པ། དམངས་ཀྱི་ཆེད་དུ་དབང་ཆ་སྤྱོད་པ།  དབང་ཆ་གཙང་མ་སྤྱོད་པ་བཅས་ལ་ལྟ་སྐུལ་བྱེད་དགོས་ཞེས་གསུངས།

ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ། ཀྲུང་དབྱང་གཞུང་ལས་ཐིང་གི་ཀྲུའུ་རེན་ཚའེ་ཆི་ཡིས་རྟོག་ཞིབ་ལ་ཕེབས་རོགས་བྱས།

  ལི་ཀན་ཅེ་དང་ཧོ་ལི་ཧྥུང་། ཀྲུང་དབྱང་དང་རྒྱལ་ཁབ་ལས་ཁུངས་ཀྱི་འབྲེལ་ཡོད་སྡེ་ཁག་འགན་ཁུར་བློ་མཐུན་གྱིས་རྟོག་ཞིབ་ཕེབས་རོགས་བྱས་ཤིང་། ཟླ་བ་གསུམ་པའི་ཚེས་ཉི་ཤུ་ཉིན་གྱི་སྔ་དྲོར། ཞི་ཅིན་ཕིང་གིས་ཁྲང་ཧྲ་ནས་ཁྲང་ཧྲ་རུ་བཅའ་སྡོད་བྱས་པའི་དམག་དཔུང་གི་ཧྲང་ཞའོ་དམག་དཔོན་ཡན་གྱི་འགོ་ཁྲིད་ལས་བྱེད་ལ་སྙིང་ཉེ་བས་ཐུག་འཕྲད་གནང་ཞིང་། ཏང་ཀྲུང་དབྱང་དང་ཀྲུང་དབྱང་དམག་ཨུའི་ཚབ་མཛད་ནས་ཁྲང་ཧྲ་རུ་བཅའ་སྡོད་བྱས་པའི་དམག་དཔུང་གི་དཔོན་དམག་ཡོངས་ལ་ལྷག་བསམ་རྣམ་དག་གིས་འཚམས་འདྲི་གནང་ཞིང་མཉམ་པར་བསྒྲོན་པ་རེད། 

ཀྲང་ཡིའུ་ཞྭ་ཡིས་ཐུག་འཕྲད་ཕེབས་རོགས་བྱས།