ཞི་ཅིན་ཕིང་གིས་ཕེ་རུ་ལ་ཕེབས་ནས་ཧྥ་རན་སིར་རྒྱལ་དོན་འཚམས་འདྲི་གནང་འགོ་བརྩམས།

ཞི་ཅིན་ཕིང་གིས་ཕེ་རུ་ལ་ཕེབས་ནས་ཧྥ་རན་སིར་རྒྱལ་དོན་འཚམས་འདྲི་གནང་འགོ་བརྩམས། 

  ས་གནས་དེ་གའི་དུས་ཚོད་ཟླ་བ་ལྔ་པའི་ཚེས་ལྔ་ཉིན་གྱི་ཕྱི་དྲོར།  རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་ཆེད་གཏོང་གནམ་གྲུར་བཞུགས་ནས་ཧྥ་རན་སིའི་རྒྱལ་ས་ཕེ་རུའི་ཨོ་ལི་གནམ་ཐང་དུ་ཕེབས་ཏེ། ཧྥ་རན་སི་ལ་རྒྱལ་དོན་འཚམས་འདྲི་གནང་འགོ་བརྩམས། འཚམས་འདི་ནི་ཀྲུང་གོའི་རྒྱལ་ཁབ་གཙོ་བདག་གིས་ལོ་ངོ་ལྔའི་རྗེས་སུ་ཡང་བསྐྱར་ཧྥ་རན་སི་ལ་རྒྱལ་དོན་འཚམས་འདྲི་གནང་བ་རེད། དེ་ལའང་ཀྲུང་གོ་དང་ཧྥ་རན་སིའི་བར་ཕྱི་འབྲེལ་བཙུགས་ནས་ལོ་འཁོར་དྲུག་ཅུ་དང་འཕྲད་པས་ཕྱོགས་གཉིས་ཀས་ཀྲུང་གོ་དང་ཧྥ་རན་སིའི་ཕྱི་འབྲེལ་བཙུགས་དུས་ཀྱི་ཀུན་སློང་ལ་ཕྱིར་དྲན་བྱས་ནས། ལོ་རྒྱུས་ཀྱི་ལངས་ཕྱོགས་དང་འཐབ་ཇུས་ཀྱི་མཐོ་ཚད་ནས་ཀྲུང་གོ་དང་ཧྥ་རན་སིའི་བར་གྱི་འབྱུང་འགྱུར་གྱི་འབྲེལ་བ་གཏོད་རྒྱུ་རེད། 

  ཀྲུའུ་ཞི་ཞི་ཅིན་ཕིང་ཆེད་གཏོང་གནམ་གྲུར་བཞུགས་ནས་ཧྥ་རན་སིའི་རྒྱལ་ས་ཕེ་རུའི་ཨོ་ལི་གནམ་ཐང་དུ་ཕེབས་དུས། ཧྥ་རན་སིའི་ཙུང་ལི་ཨ་ཐ་ཨེར་སོགས་ཧྥ་རན་སིའི་སྲིད་གཞུང་གི་མཐོ་རིམ་སྐུ་ཚབ་ཀྱིས་དགའ་སྤྲོ་ཆེན་པོས་བསུ་མ་གནང་ཞིང་། 

  ཞི་ཅིན་ཕིང་གིས་ཡིག་ཐོག་ནས་གསུང་བཤད་གནང་སྟེ། ཁོང་གིས་ང་ཧྥ་རན་སི་ལ་རྒྱལ་དོན་འཚམས་འདྲི་ཐེངས་གསུམ་པ་ཡིན་པས་དགའ་སྤྲོ་ཆེན་པོ་བསྐྱེད་བྱུང་། ཧྥ་རན་སིའི་མི་དམངས་དང་མཉམ་དུ་ཀྲུང་གོ་དང་ཧྥ་རན་སིའི་བར་ཕྱི་འབྲེལ་བཙུགས་ནས་ལོ་དྲུག་ཅུ་འཁོར་བར་རྟེན་འབྲེལ་ཞུ། ཤར་ཕྱོགས་དང་ནུབ་ཕྱོགས་དཔལ་ཡོན་གྱི་མཚོན་བྱེད་གལ་ཆེན་ཡིན་པའི་ཆ་ནས་ཀྲུང་གོ་དང་ཧྥ་རན་སིས་དུས་ཡུན་རིང་པོའི་ནང་ཕན་ཚུན་ཡི་རངས་དང་ཕན་ཚུན་ཡིད་འགུགས་བྱེད་ཀྱིན་ཡོད་ལ། ལོ་དྲུག་ཅུའི་སྔོན་ཀྲུང་གོ་དང་ཧྥ་རན་སིའི་རྒྱལ་ཁབ་གཉིས་ཀྱི་བར་འཇམ་འཐབ་ཀྱི་བཀག་རྒྱ་ལས་གྲོལ་ཞིང་གཞུང་ཚབ་ཆེན་པོ་རིམ་པའི་ཕྱི་འབྲེལ་བཙུགས་ཡོད། ལོ་དྲུག་ཅུའི་རིང་ལ་ཀྲུང་གོ་དང་ཧྥ་རན་སིའི་འབྲེལ་བ་དེ་ཀྲུང་གོ་དང་ནུབ་ཕྱོགས་རྒྱལ་ཁབ་བར་གྱི་འབྲེལ་བའི་ནང་གི་མདུན་གྲལ་དུ་ཕྱིན། ཀྲུང་གོ་དང་ཧྥ་རན་སིའི་འབྲེལ་བ་འཕེལ་རྒྱས་བྱུང་ནས་རྒྱལ་ཁབ་གཉིས་ཀྱི་མི་དམངས་ལ་ཕན་བདེ་བསྐྲུན་ཡོད་པར་མ་ཟད། ཟིང་ཆ་ཆེ་བའི་འཛམ་གླིང་ལའང་བརྟན་བརླིང་དང་དགེ་མཚན་ལྡན་པའི་ནུས་པ་འདོན་བཞིན་ཡོད། 

  འཚམས་འདྲི་བྱེད་རིང་དུ། ངས་ཙུང་ཐུང་མའེ་ཁེ་ལུང་དང་གནས་བབ་གསར་པའི་འོག་ཀྲུང་གོ་དང་ཧྥ་རན་སི་དང་ཀྲུང་གོ་དང་ཡོ་རོབ་འབྲེལ་བ་འཕེལ་རྒྱས་གཏོང་བ། དེ་མིན་མིག་སྔའི་རྒྱལ་སྤྱི་དང་ས་ཁུལ་གནས་དོན་གལ་ཆེན་ཐད་བསམ་འཆར་བརྗེ་རེས་གང་མང་བྱ་རྒྱུ་ཡིན། ངས་ཐེངས་འདིའི་འཚམས་འདྲི་བརྒྱུད་ནས། རྒྱལ་ཁབ་གཉིས་ཀྱི་སྲོལ་རྒྱུན་མཛའ་མཐུན་ཇེ་ཟབ་དང་ཆབ་སྲིད་ཐད་ཕན་ཚུན་ཡིད་ཆེས་ཟབ་མོ། འཐབ་ཇུས་གཅིག་མཐུན་ལྟ་བ་གལ་ཆེན་གཅིག་བསྡུས། ཁྱབ་ཁོངས་སོ་སོའི་ནང་གི་སྤེལ་རེས་མཉམ་ལས་ཟབ་མོ། ལོ་རྒྱུས་ཀྱི་དཔལ་འབར་གྱིས་མདུན་སྐྱོད་ཀྱི་ལམ་བུ་སྟོན་ཞིང་། ཀྲུང་གོ་དང་ཧྥ་རན་སི་བར་གྱི་འབྱུང་འགྱུར་འབྲེལ་བ་སྔར་ལས་ཡག་པོ་བསྐྲུན་ནས། འཛམ་གླིང་ཞི་བདེ་དང་བརྟན་བརླིང་། འཕེལ་རྒྱས་འོང་བར་བྱས་རྗེས་ཆེན་པོ་འཇོག་བའི་རེ་བ་ཡོད་ཞེས་གསུངས།

  ཀྲུའུ་ཞི་ཞི་ཅིན་ཕིང་གི་ལྕམ་མོ་ཕེན་ལི་ཡོན་དང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ། ཀྲུང་དབྱང་གཞུང་ལས་ཐིང་གི་འགོ་འཛིན་ཚའེ་ཆིང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན། ཕྱི་འབྲེལ་པུའུ་ཡི་པུའུ་ཀྲང་ཝང་དབྱི་སོགས་ཕེབས་རོགས་མི་སྣ་རྣམས་གནམ་གྲུ་གཅིག་ནང་བསྡད་ནས་འབྱོར་བ་རེད། ཀྲུང་གོས་ཧྥ་རན་སི་ལ་བཅའ་སྡོད་བྱེད་པའི་གཞུང་ཚབ་ཆེན་མོ་ལུའུ་ཧྲ་ཡེ་ཡང་གནམ་ཐང་དུ་བསུ་མ་ཞུས་ཤིང་།

  ཞི་ཅིན་ཕིང་གནམ་ཐང་ནས་རླངས་འཁོར་བཞུགས་ཏེ་མགྲོན་ཁང་དུ་ཕེབས་པའི་ལམ་བར། ཕྱི་སྡོད་རང་མི་དང་ཀྲུང་གོའི་ཕྱི་སྦྱོང་སློབ་མ་རྣམས་རང་མོས་ཀྱིས་ལམ་འགྲམ་དུ་བསུ་སྒུག་བྱེད་ཅིང་། ཀྲུང་གོ་དང་ཧྥ་རན་སིའི་མཛའ་མཐུན་ཡུན་རིང་གནས་པར་ཤོག  ཀྲུའུ་ཞི་ཅིན་ཕིང་གིས་ཧྥ་རན་སིའི་འཚམས་འདྲི་གནང་བར་རྒྱལ་ཁ་ཐོབ་པར་ཤོག་ཅེས་པ་སོགས་སྦྱར་ཡིག་དམར་པོ་མཐོན་རུ་སྒྲེང་ཞིང་། ཀྲུང་གོ་དང་ཧྥ་རན་སི་རྒྱལ་ཁབ་གཉིས་ཀྱི་རྒྱལ་དར་གཡུགས་ཤིང་། རྔ་རྡུང་རོལ་དཀྲོལ་དང་སེང་འབྲུག་འཁྲབ་ནས། ཀྲུའུ་ཞི་ཞི་ཅིན་ཕིང་འཚམས་འདྲི་ཕེབས་པར་དགའ་བསུ་རྟེན་འབྲེལ་ཞུས་པ་རེད།