བོད་ལྗོངས་ཡོངས་ཀྱི་སྤྱི་བདེའི་ཁོངས་གཏོགས་ཀྱིས་བྱ་འགུལ་སྣ་ཚོགས་སྤེལ་ནས་ཀྲུང་གོ་མི་དམངས་ཉེན་རྟོག་པའི་དུས་ཆེན་ཐེངས་དྲུག་པར་རྟེན་འབྲེལ་ཞུས།

  འདི་ནི་ཉིང་ཁྲི་གྲོང་ཁྱེར་སྤྱི་བདེ་ཅུས་ཀྱིས་ཁྲིམས་སྐྱོང་དྲིལ་སྒྲོག་བྱ་འགུལ་སྤེལ་སྐབས་མི་དམངས་ཉེན་རྟོག་པས་བྱིས་པ་ཞིག་ལ་བཅའ་ཁྲིམས་ཀྱི་ཤེས་བྱ་ངོ་སྤྲོད་བྱེད་བཞིན་པའི་རྣམ་པ་རེད།

  ཀྲུང་གོ་བོད་ཀྱི་དྲ་བའི་འཕྲིན། ཀྲུང་གོ་མི་དམངས་ཉེན་རྟོག་པའི་དུས་ཆེན་ཐེངས་དྲུག་པ་སླེབས་ལ་ཉེ་བའི་མཚམས་སུ་ལྗོངས་ཡོངས་ཀྱི་ས་གནས་ཁག་གི་སྤྱི་བདེ་ལས་ཁུངས་ཀྱིས་བརྗོད་དོན་གཙོ་བོའི་བྱ་འགུལ་རབ་དང་རིམ་པ་ཇུས་འགོད་ཞིབ་ཚགས་བྱས་ཤིང་། དངོས་སྒྲུབ་ལ་བརྟེན་ནས་འགན་འཁྲི་མངོན་པ་དང་། བརྩེ་བ་ཟབ་མོར་བརྟེན་ནས་དམངས་དང་ཉེ་བཅར་བྱེད་པ། ཁྲིམས་སྐྱོང་ལ་བརྟེན་ནས་བདེ་འཇགས་སྲུང་སྐྱོང་བཅས་བྱས་ཏེ། དུས་རབས་གསར་པའི་བོད་ལྗོངས་ཀྱི་སྤྱི་བདེའི་དཔུང་ཁག་གི་ལྷག་བསམ་རྣམ་དག་གི་རང་མདངས་དང་འབད་འབུངས་ཡར་བརྩོན་གྱི་རྣམ་པ་ཕྱོགས་ཡོངས་ནས་མངོན་པར་བྱས་ཤིང་། མི་དམངས་ཉེན་རྟོག་པ་ཡོངས་ལ་འགན་འཁྲི་གསར་པ་འཁུར་བ་དང་། བྱས་རྗེས་གསར་པ་འཇོག་པ། རྣམ་པ་གསར་པ་མངོན་པ་བཅས་བྱ་རྒྱུའི་སྐུལ་ལྕག་བྱས་ཏེ། ཉེན་རྟོག་པ་དང་མི་དམངས་ཀྱི་སེམས་པ་གཅིག་མཐུན་གྱི་སེམས་སྦྲེལ་ཟམ་པ་བསྐྲུན་ཡོད།

  ཉེན་རྟོག་པའི་དུས་ཆེན་གྱི་སྔ་ནུབ་ཏུ་ཀརྨ་དགོན་གསར་སྲང་ལམ་གྱི་ཏང་གི་ལས་དོན་ཨུ་ལྷན་དང་དོན་གཅོད་ཁྲུའུ་ཡི་ལས་དོན་པ་ཁོངས་གཏོགས་ཁུལ་གྱི་ཉེན་རྟོག་ཁང་དང་། ཉེན་རྟོག་ལས་སྒྲུབ་ས་ཚིགས། མཁར་ཤར་དང་མཁར་ལྷོའི་འགྲིམ་འགྲུལ་ཉེན་རྟོག་རུ་ཆེན་བཅས་སུ་བསྐྱོད་ནས་འཐབ་ས་དང་པོའི་ཉེན་རྟོག་པར་འཚམས་འདྲིའི་དངོས་པོ་སྤྲད་པ་རེད། ཁྱོད་ཚོས་སྔ་ཕྱི་བར་གསུམ་དུ་མི་དམངས་ལ་ཞབས་འདེགས་སྒྲུབ་ནས་ཁོངས་གཏོགས་ཁུལ་གྱི་བདེ་འཇགས་བརྟན་པོར་སྲུང་ཡོད་ཅེས་ཀརྨ་དགོན་གསར་སྲང་ལམ་དོན་གཅོད་ཁྲུའུ་ཡི་འགན་འཁུར་བས་ཉེན་རྟོག་པ་ཚོར་ཁ་བཏགས་འབུལ་ཞོར་དུ་དེ་ལྟར་བཤད། མི་དམངས་ཉེན་རྟོག་པ་ཚོས་སླད་ཕྱིན་སྤྲོ་སེམས་ཆེན་པོས་འདི་གའི་ཞི་བདེ་སྲུང་སྐྱོང་གང་ལེགས་བྱས་ཏེ་ཉེན་རྟོག་པ་དང་ས་གནས་མཉམ་སྐྲུན་ལས་དོན་གཏིང་ཟབ་གཏོང་བའི་གསོན་ཉམས་དོད་པའི་ལག་ལེན་དེ་གནའ་གྲོང་གི་གང་སར་མཐོང་ཐུབ་པར་བྱེད་བསམ་ཡོད་ཅེས་གཅིག་རྗེས་གཉིས་མཐུད་ངང་བཤད།

  ཚེས10ཉིན། ལེགས་རྩེ་རྒྱལ་མཚམས་འཛུལ་སྒྲོལ་མཐའ་སྲུང་ཞིབ་བཤེར་ས་ཚིགས་སུ་ཉེན་རྟོག་པའི་དར་ཆ་ལྷབ་ལྷུབ་ཏུ་གཡོ་བཞིན་ཡོད། ཀྲུང་གོའི་མི་དམངས་ཉེན་རྟོག་པའི་དུས་ཆེན་ཐེངས་དྲུག་པར་རྟེན་འབྲེལ་ཞུ་ཆེད། ས་གནས་མི་དམངས་ཉེན་རྟོག་པ་སྔོན་ལ་འབྲོང་པ་རྫོང་རྒྱལ་གཅེས་རིང་ལུགས་སློབ་གསོའི་རྟེན་གཞི་སྟེ། སྐྲ་བདུན་དམིགས་བསལ་ཨུ་ཡོན་ལྷན་ཁང་གི་གནས་རྙིང་དུ་བསྐྱོད་ནས་གསར་བརྗེའི་ལོ་རྒྱུས་ལ་ཕྱིར་དྲན་བྱས་པ་དང་། དེ་རྗེས་སྔོན་གཤེགས་དཔའ་བོའི་བང་སོར་བསྐྱོད་ནས་སྔོན་གཤེགས་དཔའ་བོ་ཚོར་རྗེས་དྲན་ཞུས་པ་རེད། གསར་དུ་ལས་ཀར་ཞུགས་པའི་མི་དམངས་ཉེན་རྟོག་པའི་ལས་སྒོའི་འཇོན་ཐང་ཆེ་རུ་གཏོང་ཆེད། ཉེན་རྟོག་པ་རྒན་གྲས་ཀྱིས་ཁོང་ཚོའི་སྣེ་ཁྲིད་དེ་ཁ་བའི་ཁྲོད་དུ་མཐའ་མཚམས་སྐོར་གཡེང་དང་། ལས་ཀའི་དོན་དངོས་དང་ཟུང་འབྲེལ་བྱས་ནས་མཐའ་མཚམས་སྐོར་གཡེང་གི་བརྒྱུད་རིམ་དང་། དོ་དམ་ཚོད་འཛིན་ཚད་དང་མཐུན་པ། ཐོལ་བྱུང་གནས་ཚུལ་ཐག་གཅོད་བྱེད་སྟངས་བཅས་ལ་འགྲེལ་བཤད་བརྒྱབ་པ་མ་ཟད། ད་དུང་ས་མཚམས་འབྱེད་རྟགས་དང་ཉེན་རྟོག་པའི་དར་ཆའི་མདུན་དུ་ཉེན་རྟོག་པར་ཞུགས་པའི་དམ་བཅའ་ཡང་བསྐྱར་དུ་བཞག་པ་རེད། གསར་བརྗེའི་བླ་སྲོག་གཏོད་པ་དང་དངོས་འཐབ་དམག་སྦྱོང་ཟུང་དུ་འབྲེལ་བའི་རྟེན་འབྲེལ་བྱ་འགུལ་འདིས་མཐའ་མཚམས་སུ་སྔར་བས་ལྷག་བསམ་རྣམ་དག་གི་རང་མདངས་མངོན་པར་བྱས་ཡོད།

  དུས་ཡུན་རིང་བོར་སྤྱི་བདེའི་མི་དམངས་ཉེན་རྟོག་པ་བགྲང་མེད་ཀྱིས་ལོ་བཅུ་ཕྲག་ཁ་ཤས་རིང་ཉིན་གཅིག་ནང་བཞིན་ལས་གནས་བརྟན་སྲུང་དང་ལྷག་བསམ་ཟོལ་མེད་ཀྱིས་འགན་སྒྲུབ། ཚེ་སྲོག་བློས་གཏོང་ཕོད་པ་སོགས་ཡོད་ཚད་མི་དམངས་ལ་ཞབས་འདེགས་སྒྲུབ་པ་ཞེས་པའི་དམ་ཚིག་ཁོ་ནའི་ཆེད་ཡིན།  དེ་རིང་། ང་ཚོས་མི་དམངས་ཉེན་རྟོག་པའི་དུས་ཆེན་གྱི་དམིགས་བསལ་ཉིན་མོ་འདིར་བརྒྱུད་ནས་ཉེན་རྟོག་པ་རྒན་གྲས་ལ་མི་དམངས་ཉེན་རྟོག་པར་ཞུགས་ནས་ལོ་འཁོར་ངེས་ཅན་འགོར་བའི་གཟི་བརྗིད་དྲན་གསོའི་རྟགས་མ་སྤྲད་ཡོད། དེ་ཁོང་ཚོར་མཚོན་ན་ཁས་ལེན་དང་གཟེངས་བསྟོད་ཅིག་ཡིན་པ་མ་ཟད། ན་གཞོན་ཉེན་རྟོག་པ་ཚོས་ཉེན་རྟོག་པ་རྒན་གྲས་ལ་སློབ་སྦྱོང་བྱས་ནས་ཁོང་ཚོའི་ཡོད་ཚད་འབུལ་ཕོད་པའི་སྙིང་སྟོབས་རྒྱུན་འཛིན་ཐུབ་རྒྱུའི་རེ་བ་ཡོད་ཅེས་ཆབ་མདོ་གྲོང་ཁྱེར་སྤྱི་བདེ་ཅུས་ཀྱི་འབྲེལ་ཡོད་འགན་འཁུར་བས་བཤད།

ཉེ་བའི་ལོ་འགའི་རིང་། བོད་ལྗོངས་ཀྱིས་ཉེན་རྟོག་པར་གཟིགས་སྐྱོང་བྱེད་པའི་སྲིད་ཇུས་ཁག་ལག་ལེན་ཡག་པོ་བསྟར་ཞིང་། འགན་སྲུང་རྣམ་པ་ནས་སེམས་དྲོན་པོ་རྣམ་པའི་སྲིད་ཇུས་ལག་ལེན་བསྟར་བས། མཐོ་སྒང་གི་ལས་འགན་སྒྲུབ་པའི་གནོན་ཤུགས་ཇེ་ཆུང་དུ་བཏང་བ་མ་ཟད། མི་དམངས་ཉེན་རྟོག་པ་ཚོས་རྩ་འཛུགས་ཀྱི་ཐུགས་ཁུར་སྔར་བས་ཚོར་ནས་ཉེན་རྟོག་པའི་སེམས་སུ་དྲོ་སྐྱིད་སྦྱིན་པའི་བྱེད་ཐབས་དེ་གངས་ལྗོངས་མཐོ་སྒང་དུ་རྩ་བ་ཚུགས་པའི་སྒུལ་ཤུགས་སྟོབས་ཆེན་ཞིག་ཏུ་གྱུར་ཡོད།

  ཟླ་དང་པོའི་ཚེས10ཉིན། ཉིང་ཁྲིར་མི་དམངས་ཉེན་རྟོག་པ་ཚོས་ཁྲིམས་ལུགས་ཁྱབ་གདལ་དྲིལ་སྒྲོག་ལས་སྟེགས་བཙུགས་ཏེ་ཁྱིམ་མཚེས་དབར་གྱི་རྩོད་གཞི་ཇི་ལྟར་ཐག་གཅོད་བྱེད་པ་ནས་དྲ་རྒྱའི་ཁེ་དབང་སྲུང་སྐྱོང་བྱེད་པར་ཐབས་ལམ་གང་དག་ཡོད་པའི་བར་དང་། དེ་ནས་འགྲིམ་འགྲུལ་དོན་རྐྱེན་ཐག་གཅོད་ཡང་དག་ཇི་ལྟར་བྱེད་པ་ནས་དྲ་རྒྱའི་ཁ་བསླུས་འགོག་ཟོན་ཇི་ལྟར་བྱེད་པའི་བར་མང་ཚོགས་ཀྱིས་བཏོན་པའི་བཅའ་ཁྲིམས་ཀྱི་གནད་དོན་མང་པོར་ཉེན་རྟོག་པས་ངང་རྒྱུད་རིང་པོས་རེ་རེ་བཞིན་ལན་བཏབ།

  དུས་ཆེན་ལ་རྟེན་འབྲེལ་ཞུ་བའི་རྣམ་པ་མཐོ་སྒང་གི་གང་སར་ཁྱབ་པ་དང་གུས་བཀུར་མཚོན་པའི་སྙིང་གཏམ་གྱིས་མི་སེམས་དྲོ་བར་བྱས་ཡོད། འོན་ཀྱང་བོད་ལྗོངས་ཀྱི་སྤྱི་བདེ་མི་དམངས་ཉེན་རྟོག་པ་ཚོའི་ངོས་ནས་བརྗོད་ན། ཟླ་དང་པོའི་ཚེས10ཉིན་ནི་ཁོང་ཚོའི་ནམ་རྒྱུན་ལས་ཀའི་ཁྲོད་ཀྱི་སྤྱིར་བཏང་གི་ཉིན་མོ་ཞིག་རེད།

  སྲང་འགྲམ་གྱི་ལྟ་སྲུང་དང་མཚན་མོའི་སྐོར་གཡེང་། སྟེགས་ཐོག་གི་བརྟན་སྲུང་བཅས་ན་ཁོ་ཚོའི་འགྱུར་མེད་ཀྱི་ནམ་རྒྱུན་རེད། མང་ཚོགས་ཀྱི་སྨོན་འདུན་དང་རེ་སྒུག་གི་མདུན་དུ་ལྗོངས་ཡོངས་ཀྱི་སྤྱི་བདེ་མི་དམངས་ཉེན་རྟོག་པས་དུས་ཆེན་གྱི་གཟི་བརྗིད་དང་ཐུགས་ཁུར་དེ་རང་འགན་གཙང་སྒྲུབ་ཀྱི་རྫོགས་མཐའ་མེད་པའི་སྒུལ་ཤུགས་སུ་བསྒྱུར་བར་བྱས་ཏེ། ཏང་ལ་ལྷག་བསམ་རྣམ་དག་དང་། མི་དམངས་ལ་ཞབས་འདེགས་སྒྲུབ་པ། ཁྲིམས་འཛིན་དྲང་གཞག སྒྲིག་ཁྲིམས་དམ་པོ་བཅས་ཀྱི་དམ་བཅའ་ཐོག་མཐའ་བར་གསུམ་དུ་བློ་ལ་བརྟན་པོར་ངེས་པར་བྱས་ནས། དད་སེམས་བརྟན་པོ་དང་སྤྲོ་སེམས་ཆེན་པོས་གངས་ལྗོངས་མཐོ་སྒང་དུ་རྩ་བ་ཚུགས་པ་དང་། བརྟན་སྲུང་ལ་བརྟེན་ནས་བདེ་འཇགས་ཀྱི་རྨང་གཞི་བརྟན་དུ་གཏོང་བ། བྱ་སྤྱོད་དངོས་ལ་བརྟེན་ནས་མི་དམངས་ལ་ལྷག་བསམ་རྣམ་དག་གིས་ཞབས་འདེགས་སྒྲུབ་པའི་ཐོག་མའི་བསམ་འདུན་དང་འགན་འཁྲིར་གསལ་འགྲེལ་བཅས་བྱས་ཏེ། མཐོ་སྒང་གི་ཁྱིམ་ཚང་ཁྲི་སྟོང་མང་པོ་བདེ་འཇགས་ཡོང་བར་བྱེད་དགོས་ཞེས་གཅིག་རྗེས་གཉིས་མཐུད་ངང་བཤད།  །