བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་ནས་ལོ་63འཁོར་བའི་དྲན་གསོའི་ཉིན་མོ།
| 2022-03-28 来源：ཀྲུང་གོའི་བོད་སྐད་རླུང་འཕྲིན་དྲ་བ། | 分享： |
སྤྱི་ཟླ་3པའི་ཚེས་28ཉིན་གྱི་སྔ་དྲོ། ཕོ་བྲང་པོ་ཏ་ལའི་ཐང་ཆེན་ཐོག་བོད་ཀྱི་ཞིང་བྲན་ཁྲི་ཚོ་བརྒྱར་ཡར་ལངས་བཅིངས་འགྲོལ་ཐོབ་ནས་ལོ་ངོ་63འཁོར་བར་དྲན་གསོ་ཞུ་བའི་རྒྱལ་དར་སྒྲེང་བ་དང་རྒྱལ་གླུ་གཏོང་བའི་མཛད་སྒོ་གཟབ་རྒྱས་ཤིག་འཚོགས་པ་རེད།
དེ་རིང་ནི་བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་ནས་ལོ་63འཁོར་བའི་སྐལ་བཟང་གི་ཉིན་མོ་ཞིག་ཡིན་ཞིང་། དེ་ནི་རླབས་ཆེན་གྱི་འཕོ་འགྱུར་ལ་དྲན་གསོ་ཞུ་བ་དང་། འོད་སྟོང་འཕྲོ་བའི་ལོ་རྒྱུས་ལ་ཕྱིར་མིག་ལྟ་བ། འབད་འབུངས་ཡར་བརྩོན་གྱིས་རྒྱང་སྐྱོད་ལམ་བུ་གསར་རྐྱང་ཐོག་སྐྱོད་པ་བཅས་ཡིན་པས་བོད་ལྗོངས་མི་རིགས་ཁག་གི་མི་དམངས་ཚོས་ནམ་ཡང་བློ་ལ་ངེས་པའི་ཉིན་མོ་ཞིག་རེད།
ལོ་ངོ་63གྱི་ཡར་སྔོན་དུ། རླབས་ཆེན་གྱི་ཀྲུང་གོའི་གུང་ཁྲན་ཏང་གི་འགོ་ཁྲིད་འོག ཟིལ་རླབས་དགུང་འཕྱུར་གྱི་དམངས་གཙོའི་བཅོས་སྒྱུར་གྱིས་མངའ་བདག་ཆེན་པོ་གསུམ་གྱི་མུན་ནག་དབང་སྒྱུར་རྦད་དེ་རྩ་སློག་བཏང་བ་དང་། ཆོས་སྲིད་ཟུང་འབྲེལ་གྱི་བཀས་བཀོད་རྒྱུད་འཛིན་ཞིང་བྲན་ལམ་ལུགས་རྦད་དེ་རྩ་གཏོར་བཏང་བས་ཞིང་བྲན་ཁྲི་ཚོ་བརྒྱ་སྐད་ཆ་ཤོད་ཤེས་ཙམ་གྱི་རྟ་ཟོག་དང་རང་ཉིད་ཀྱི་གྲིབ་མ་མ་གཏོགས་གཞན་ཅི་ཡང་དབང་མེད་པའི་བྲན་གཡོག་ནས་རང་ལུས་རང་དབང་དང་ལ་རྒྱ་ཐོབ་ནས་རྒྱལ་ཁབ་དང་། བོད་ལྗོངས། རང་ཉིད་བཅས་ཀྱི་ལས་དབང་གི་བདག་པོ་ངོ་མར་གྱུར། དུས་དེ་ནས་བཟུང་བོད་ལྗོངས་འདི་ཉིད་སྤྱི་ཚོགས་རིང་ལུགས་ཀྱི་ཡངས་ཤིང་རྒྱ་ཆེ་བའི་འགྲོ་ལམ་ཐོག་གོམ་ཞེན་ཆེན་པོས་སྐྱོད་འགོ་ཚུགས་ཡོད།
ལོ་ངོ་63རིང་། ཏང་གིས་བོད་ལྗོངས་མི་རིགས་ཁག་གི་མི་དམངས་ལ་མཐུན་སྒྲིལ་སྣེ་ཁྲིད་མཛད་དེ་གནམ་ས་བླ་འོག་ཏུ་འགྱུར་བ་ལྟ་བུའི་སྒོ་ནས་བོད་རང་སྐྱོང་ལྗོངས་བཙུགས་པ་དང་། སྤྱི་ཚོགས་རིང་ལུགས་ཀྱི་ལམ་ལུགས་བཙུགས་པ། སྤྱི་ཚོགས་རིང་ལུགས་འཛུགས་སྐྲུན་བྱས་པ། སྒྱུར་བཅོས་སྒོ་དབྱེར་སྐུལ་འདེད་བཏང་བ། དུས་རབས་གསར་པར་སྐྱོད་པ་བཅས་བྱས་ནས་མི་ཡུལ་གྱི་ངོ་མཚར་གཅིག་རྗེས་གཉིས་མཐུད་ངང་བཏོད་ཅིང་ནམ་ཡང་མི་ནུབ་པའི་མཛད་རྗེས་རྡོ་རིང་མང་པོ་ཞིག་བཏོད་ཡོད། ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་ངོ་མས་བོད་ལྗོངས་ཀྱི་ལས་དོན་ལ་ཁ་ཕྱོགས་གཏན་འཁེལ་དང་བཀོད་སྒྲིག་གནང་བ་དང་། བོད་དུ་ཕེབས་ནས་གཟིགས་ཞིབ་དང་མཛུབ་སྟོན་གནང་བ། སྐུ་ངོ་མས་མཛེས་སྡུག་བདེ་སྐྱིད་ལྡན་པའི་བོད་ལྗོངས་བསྐྲུན་ནས་རླབས་ཆེན་བསྐྱར་དར་གྱི་ཕུགས་འདུན་མངོན་འགྱུར་བྱེད་ཅེས་པའི་ཕྱག་བྲིས་ཕྱག་བསྟར་མ་གནང་ནས། བྱ་སྤྱོད་ཀྱི་རྩ་འཛིན་དང་འཐབ་ཇུས་ཀྱི་འཆར་འགོད་ལྟར་བོད་ལྗོངས་ཀྱི་བྱ་གཞག་ཁག་ལ་ཕྱོགས་ཡོངས་ནས་ཡར་རྒྱས་དང་ལོ་རྒྱུས་རང་བཞིན་གྱི་གྲུབ་འབྲས་ཐོབ་རྒྱུར་སྐུལ་འདེད་བཏང་གནང་བ་རེད།
