ཞི་ཅིན་ཕིང༢༠༢༢ལོའི་འཛམ་གླིང་དཔལ་འབྱོར་གླེང་སྟེགས་ཀྱི་བརྙན་ལམ་གྲོས་ཚོགས་སུ་ཞུགས་པ་མ་ཟད་གསུང་བཤད་གནང་།

  ཚེས་བཅུ་བདུན་ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་པེ་ཅིན་དུ༢༠༢༢ལོའི་འཛམ་གླིང་དཔལ་འབྱོར་གླེང་སྟེགས་ཀྱི་བརྙན་ལམ་གྲོས་ཚོགས་སུ་ཞུགས་པ་མ་ཟད་ཡིད་ཆེས་བརྟན་པོས་མདུན་དུ་བསྐྱོད་ནས་རིམས་ནད་འཇགས་རན་པའི་སྐྱིད་པའི་མ་འོངས་བསུ་ཞེས་པའི་གསུང་བཤད་གནང་བ་རེད།

  ཞི་ཅིན་ཕིང་གིས་ཐོག་མར་གཟའ་འཁོར་གཉིས་ཀྱི་རྗེས་ལ་ཀྲུང་གོའི་ཆུ་ཕོ་སྟག་ལོ་ལོ་སར་ཤར་རྒྱུ་རེད། ཀྲུང་གོའི་རིག་གནས་ནང་། སྟག་ནི་སྤོབས་པ་དང་སྟོབས་ཤུགས་ཀྱི་མཚོན་བྱེད་ཡིན་པས། ཀྲུང་གོ་བས་དུས་རྒྱུན་པར་སྟག་འདྲ་གཟིག་འདྲ་དང་། སྟག་སེང་ཁྱུང་འབྲུག་ཅེས་ཟེར།

  མིག་སྔར་མིའི་རིགས་ལ་འཕྲད་པའི་འགྲན་སློང་དྲག་པོར་ཁ་གཏད་ནས། ང་ཚོས་སྟག་མོར་གཤོག་པ་ཐོགས་པ་དང་། སྟག་འདྲ་གཟིག་འདྲའི་སྤོབས་པར་བརྟེན་ནས་མདུན་སྐྱོད་ལམ་བུའི་ཐོག་གི་འགྲན་སློང་སྣ་ཚོགས་སེལ་བ་དང་། ཏོག་གསར་གློ་ཚད་རིམས་ནད་ཀྱི་གནོད་པ་སེལ་གང་ཐུབ་དང་། དཔལ་འབྱོར་དང་སྤྱི་ཚོགས་སླར་གསོ་འཕེལ་རྒྱས་བཏང་ནས། མིའི་རིགས་ལ་རེ་བ་སྟེར་དགོས་ཞེས་གསུངས་པ་རེད།

  ཞི་ཅིན་ཕིང་གིས། མིག་སྔར་འཛམ་གླིང་ལ་ལོ་བརྒྱའི་ནང་འཕྲད་མ་མྱོང་བའི་འགྱུར་ལྡོག་བྱུང་བཞིན་ཡོད། འགྱུར་ལྡོག་འདི་ནི་གནས་སྐབས་དང་དོན་དག་གཅིག རྒྱལ་ཁབ་དང་ས་ཁུལ་གཅིག་ཙམ་གྱི་མིན་ལ། དུས་རབས་ཀྱི་འགྱུར་བ་ཆེན་པོ་རེད། དུས་རབས་ཀྱི་འགྱུར་ལྡོག་དང་དུས་རིམ་རིམས་ནད་མཉམ་དུ་འབྲེལ་བས། འཛམ་གླིང་ལ་ཟིང་ཆ་དང་འགྱུར་ལྡོག་འཕྲད་ཡོད། རིམས་ནད་ལས་ཇི་ལྟར་རྒྱལ་དགོས་པ་དང་། རིམས་ནད་རྗེས་ཀྱི་འཛམ་གླིང་འཛུགས་སྐྱོང་ཇི་ལྟར་བྱེད་དགོས་ཟེར་ན། འདི་ནི་འཛམ་གླིང་རྒྱལ་ཁབ་ཁག་གི་མི་དམངས་ཀྱིས་ཐུན་མོང་སེམས་ཁུར་བྱེད་པའི་གནད་དོན་ཆེན་པོ་ཞིག་ཡིན་པ་དང་། ང་ཚོས་ངེས་པར་དུ་ཐག་གཅོད་དགོས་པའི་ཛ་དྲག་ཆེ་བའི་གནད་དོན་ཡང་རེད་ཅེས་ནན་གསུངས་གནང་བ་རེད།

  ཞི་ཅིན་ཕིང་གིས། འཛམ་གླིང་བྱ་གཞག་མ་དར་ན་རྒུད་པ་དང་། འཛམ་གླིང་བཅོས་སྐྱོང་མ་སྤེལ་ན་ཉམས་འགྲོ། འཛམ་གླིང་དེ་འགལ་བའི་ཁྲོད་དུ་འཕེལ་རྒྱས་སོང་ནས། འགལ་བ་མེད་ན་འཛམ་གླིང་མེད། ལོ་རྒྱུས་ལ་ཞིབ་ལྟ་བྱེད་དུས་འགྲོ་བ་མིའི་རིགས་དེ་ཉམས་སད་ལས་རྒྱལ་ཏེ་འཕེལ་རྒྱས་བྱུང་བ་དང་། ཉམས་ཉེན་རེ་རེ་བསལ་ནས་འཕེལ་རྒྱས་བྱུང་བ་རེད། ང་ཚོས་ལོ་རྒྱུས་ཀྱི་མདུན་སྐྱོད་ཀྱི་ཆོས་ཉིད་ཁྲོད་མདུན་དུ་འཕེལ་རྒྱས་འགྲོ་བ་དང་། དུས་རབས་ཀྱི་འཕེལ་རྒྱས་ཁྲོད་འཕེལ་རྒྱུས་བྱུང་བ་རེད། ལོ་རྒྱུས་ཀྱི་དུས་ཡུན་རིང་མོའི་ཁྲོད་ཞིབ་བསྡུར་དང་དབྱེ་ཞིབ་བྱས་ནས་བསམ་བློ་གཏོང་མཁས་པ་དང་། ཞིབ་ཕྲ་ནས་བྱ་དངོས་ཀྱི་འགྱུར་ལྡོག་ལ་གསལ་རྟོགས་བྱེད་མཁས་པ། ཉམས་ཉེན་ཁྲོད་གོ་སྐབས་གསར་པ་བཙལ་བ་དང་། འགྱུར་ལྡོག་ཁྲོད་རྣམ་པ་གསར་པ་གཏོད་དེ། དཀའ་ཁག་ལས་རྣམ་པ་རྒྱལ་བ་དང་། འགྲན་སློང་གི་སྟོབས་ཤུགས་ཆེན་པོ་གཅིག་ཏུ་བསྡུ་དགོས།

  དང་པོ་ནི་མཐུན་སྒྲིལ་མཉམ་ལས་བྱས་ནས། རིམས་ནད་ལས་རྣམ་པར་རྒྱལ་བ་དང་། དོན་དངོས་ལས་འཛམ་གླིང་རང་བཞིན་གྱི་ཉམས་ཉེན་ཀྱི་དཀའ་སྡུག་ཁྲོད། རྒྱལ་ཁབ་སོ་སོ་ནི་རང་རང་སོ་སོར་གནས་པ་ཞིག་མིན་ལ། ཚེ་སྲོག་གཅིག་པའི་ལས་དབང་ཐུན་མོང་ཚོགས་པ་རེ་ཡོད། རྒྱལ་ཁབ་གཅིག་པུས་དཀའ་སྡུག་མི་ཐེག་ལ། མཉམ་ལས་བྱས་ན་དཀའ་སྡུག་སེལ་ཐུབ། བློ་བརྟན་འགྱུར་མེད་ཀྱིས་ཡིད་ཆེས་ཇེ་བརྟན་དང་། དཀའ་སྡུག་མཉམ་མྱོང་བྱེད་པ་ནི་རིམས་ནད་ལས་རྣམ་པར་རྒྱལ་བའི་ཡང་དག་པའི་ལམ་བུ་ཁོ་ན་དེ་ཡིན། ཕན་ཚུན་བཀག་སྡོམ་དང་མ་ཉེས་ཁ་གཡོགས་བྱེད་པའི་བྱ་སྤྱོད་གང་རུང་གིས་གོ་སྐབས་ལ་བཀག་འགོག་དང་ཡོངས་ཁྱབ་ལ་གནོད་པ་བཟོ་རྒྱུ་རེད། འཛམ་གླིང་གི་རྒྱལ་ཁབ་སོ་སོས་རྒྱལ་སྤྱིའི་རིམས་འགོག་མཉམ་ལས་ཇེ་དྲག་ཏུ་བཏང་ནས། སྨན་རྫས་ཞིབ་འཇུག་གསར་སྤེལ་མཉམ་ལས་གང་ཐུབ་བྱེད་པ་དང་། མཉམ་དུ་རིམས་ནད་ཀྱི་མ་མཐའི་ཚད་གཞི་སྲུང་ནས། འགྲོ་བ་མིའི་རིགས་ཀྱི་འཕྲོད་བསྟེན་བདེ་ཐང་ལས་དབང་གཅིག་པའི་ཐུན་མོང་ཚོགས་པ་འཛུགས་སྐྱོང་ཇེ་མགྱོགས་སུ་གཏོང་དགོས། ཁྱད་པར་དུ་འགོག་ཁབ་བེད་ཡག་པོ་སྤྱད་དེ། འགོག་ཁབ་འདྲ་མཉམ་བགོ་བཤའ་ལ་ཁག་ཐེག་དང་། འགོག་ཁབ་རྒྱག་པའི་མྱུར་ཚད་ཇེ་མགྱོགས་སུ་གཏོང་བ། རྒྱལ་སྤྱིའི་འགལ་བ་བསལ་ནས། ཚེ་སྲོག་བདེ་ཐང་སྲུང་སྐྱོང་ཡག་པོ་དང་མི་དམངས་ཀྱི་འཚོ་བ་འགན་སྲུང་ཡག་པོ་བྱེད་དགོས།

  གཉིས་པ་ནི་ཉེན་ཁ་སྣ་ཚོགས་བསལ་ནས་འཛམ་གླིང་དཔལ་འབྱོར་གཏན་འཇགས་སླར་གསོར་སྐུལ་འདེད་གཏོང་དགོས། འཛམ་གླིང་དཔལ་འབྱོར་ཉམས་རྒུད་ནས་སླར་གསོ་འབྱུང་བཞིན་ཡོད་མོད། ཚོད་འཛིན་རྒྱུ་རྐྱེན་གྱི་ཚོད་འཛིན་དང་འཕྲད་ཡོད། ང་ཚོས་རྒྱུན་རྣམ་ཅན་གྱི་རིམས་ནད་སྔོན་འགོག་དང་ཚོད་འཛིན་གྱི་ཆ་རྐྱེན་འོག་གི་དཔལ་འབྱོར་འཕེལ་རྒྱས་ཀྱི་སྒུལ་ནུས་གསར་པ་དང་སྤྱི་ཚོགས་འཚོ་བའི་རྣམ་པ་གསར་པ། མི་སྣ་འགྲོ་འོང་གི་ལམ་བུ་གསར་པ་འཚོལ་ཞིབ་བྱས་ཏེ། རྒྱལ་ཁོངས་བརྒལ་བའི་ཉོ་ཚོང་སྟབས་བདེ་ཅན་བཟོ་བ་དང་།  ཐོན་ལས་མ་ལག་དང་མཁོ་འདོན་མ་ལག་བདེ་འཇགས་ཐོགས་མེད་འགན་སྲུང་བྱས་ཏེ། འཛམ་གླིང་དཔལ་འབྱོར་སླར་གསོ་བརྟན་པོ་ཡོང་བར་བྱེད་དགོས། འཛམ་གླིང་གི་རྒྱལ་ཁབ་སོ་སོའི་ཕྱོགས་མང་རིང་ལུགས་རྣལ་མ་རྒྱུན་འཁྱོངས་བྱས་ནས། གྱང་རགས་གཏོར་བ་ལས་མི་བསྐྲུན་པ་དང་། སྒོ་འབྱེད་བྱེད་པ་ལས་སྒོ་བཀག་མི་བྱེད་པ། མཉམ་འདྲེས་བྱེད་པ་ལས་འབྲེལ་ཐག་མི་གཅོད་པ་རྒྱུན་འཁྱོངས་བྱས་ནས། སྒོ་འབྱེད་ཅན་གྱི་འཛམ་གླིང་དཔལ་འབྱོར་འཛུགས་སྐྱོང་དང་དཔལ་འབྱོར་འཛམ་གླིང་ཅན་དེ་སྔར་བས་སྒོ་འབྱེད་དང་གུ་ཡངས། ཀུན་ཕན། དོ་སྙོམས། མཉམ་རྒྱལ་ཁ་ཕྱོགས་ཀྱི་འཕེལ་རྒྱས་བཏང་ནས། འཛམ་གླིང་དཔལ་འབྱོར་གྱི་གསོན་ཤུགས་འདོན་སྤེལ་གང་ལེགས་བྱེད་དགོས། འཛམ་གླིང་དཔལ་འབྱོར་ཉེན་ཁ་ལས་ཐར་ནས་སླར་གསོ་ཐུབ་དགོས་ན། ངེས་པར་དུ་སྤྱི་ཁོག་སྲིད་ཇུས་ཀྱི་མཐུན་སྦྱོར་བྱེད་དགོས། དཔལ་འབྱོར་ཚོགས་པ་གཙོ་བོས་ཐུན་མོང་ཚོགས་པའི་འདུ་ཤེས་བཙུགས་ནས་མ་ལག་འདུ་ཤེས་ཇེ་དྲག་དང་སྲིད་ཇུས་ཆ་འཕྲིན་གསལ་པོ་དང་མཉམ་སྦྱོད་བྱས་ཏེ། ནོར་སྲིད་དང་དངུལ་ལོར་སྲིད་ཇུས་ཀྱི་དམིགས་ཡུལ་དང་ཤུགས་ཚད། མྱུར་ཚད་སོགས་མཐུན་སྦྱོར་བྱེད་དགོས། དར་རྒྱས་ཆེ་བའི་རྒྱལ་ཁབ་ཁག་གིས་འགན་འཁྲི་ཁུར་བའི་དཔལ་འབྱོར་སྲིད་ཇུས་ལག་བསྟར་བྱས་ཏེ་སྲིད་ཇུས་ཁྱབ་བརྡལ་གྱི་ནུས་པར་ཚོད་འཛིན་དོ་དམ་ཡག་པོ་བྱས་ནས། འཕེལ་རྒྱས་འགྲོ་བཞིན་པའི་རྒྱལ་ཁབ་ལ་གནོད་པ་ཚབས་ཆེན་ཐེབས་པར་གཡོལ་དགོས། རྒྱལ་སྤྱིའི་དངུལ་རྩའི་ལས་ཁུངས་ཀྱིས་དགེ་མཚན་ལྡན་པའི་ནུས་པ་འདོན་སྤེལ་གང་ལེགས་བྱས་ནས། རྒྱལ་སྤྱིའི་ངོས་འཛིན་གཅིག་མཐུན་དང་སྲིད་ཇུས་མཐུན་སྦྱོར་ཇེ་དྲག མ་ལག་རང་བཞིན་གྱི་ཉེན་ཁ་འགོག་དགོས།

  གསུམ་པ་ནི་འཕེལ་རྒྱས་ཀྱི་འགལ་བ་བསལ་ནས། འཛམ་གླིང་འཕེལ་རྒྱས་ཀྱི་ལས་དོན་སླར་གསོ་བྱེད་དགོས། འཛམ་གླིང་འཕེལ་རྒྱས་ལ་གནོད་པ་ཆེན་པོ་ཐེབས་ནས་མིའི་རིགས་ཀྱི་འཕེལ་རྒྱས་སྟོན་གྲངས་དེ་ལོ་སུམ་ཅུའི་རིང་ཐེངས་དང་པོར་མར་ཆག འཕེལ་རྒྱས་འགྲོ་བཞིན་པའི་རྒྱལ་ཁབ་ཁ་ཤས་རིམས་ནད་ཀྱི་དབང་གིས་དབུལ་ལོག་དང་ཟིང་འཁྲུག་ལངས་ཤིང་། དར་རྒྱས་ཆེ་བའི་རྒྱལ་ཁབ་ཀྱི་མང་ཚོགས་མང་པོའི་འཚོ་བར་དཀའ་ཁག་བྱུང་། དཀའ་ཁག་ཅི་ཞིག་དང་འཕྲད་ཀྱང་ང་ཚོས་མི་དམངས་གཙིགས་སུ་འཛིན་པའི་འཕེལ་རྒྱས་བསམ་བློ་རྒྱུན་འཁྱོངས་བྱས་ནས་འཕེལ་རྒྱས་དང་དམངས་འཚོ་འགན་སྲུང་དེ་འཛམ་གླིང་སྤྱི་ཁོག་སྲིད་ཇུས་ཀྱི་འབུར་ཐོན་གནས་ལ་འཇོག་དགོས་པ་དང་། མཉམ་འབྲེལ་རྒྱལ་ཚོགས་ཀྱི་༢༠༣༠ལོའི་རྒྱུན་མཐུད་འཕེལ་རྒྱས་གྲོས་རིམ་ལག་བསྟར་དང་ད་ཡོད་འཕེལ་རྒྱས་མཉམ་ལས་ལམ་ལུགས་མཐུན་སྦྱོར་ནུས་མཐོར་བཏང་ནས། འཛམ་གླིང་འཕེལ་རྒྱས་དོ་སྙོམས་ཡོང་བར་བྱེད་དགོས། ང་ཚོས་ཐུན་མོང་དང་ཁྱད་པར་ཡོད་པའི་འགན་འཁྲིའི་རྩ་དོན་རྒྱུན་འཁྱོངས་བྱས་ནས། འཕེལ་རྒྱས་སྒྲོམ་གཞིའི་་ནང་ནས་ནམ་ཟླའི་འགྱུར་ལྡོག་གི་རྒྱལ་སྤྱིའི་མཉམ་ལས་བྱས་ནས། མཉམ་འབྲེལ་རྒྱལ་ཚོགས་ནམ་ཟླའི་འགྱུར་ལྡོག་སྒྲོམ་གཞིའི་སྤྱི་ཆིངས་ཀྱི་ཐེངས་ཉེར་དྲུག་པའི་ཆིངས་ཡིག་འཇོག་མཁན་ཕྱོགས་ཀྱི་ཚོགས་ཆེན་གྱི་གྲུབ་འབྲས་ལག་བསྟར་བྱེད་དགོས།

  དཔལ་འབྱོར་ཚོགས་པ་དར་རྒྱས་གཏོང་དགོས་ན་སྙིགས་འཕྲོ་འགན་འཁྲི་སྔོན་ལ་ལག་བསྟར་བྱེད་དགོས་པ་མ་ཟད། དངུལ་རྩ་དང་ལག་རྩལ་རྒྱབ་སྐྱོར་ཐད་ཀྱི་དམ་བཅའ་ལག་བསྟར་བྱས་ནས། འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱིས་ནམ་ཟླའི་འགྱུར་ལྡོག་ལ་ཁ་གཏད་འཇལ་བ་དང་རྒྱུན་མཐུད་འཕེལ་རྒྱས་ཐུབ་པའི་དགོས་ངེས་ཀྱི་ཆ་རྐྱེན་ཡིན་པ་རེད། འཛམ་གླིང་ཡོངས་ཀྱི་འཕེལ་རྒྱས་གྲོས་འགོ་ནི་འཛམ་གླིང་ལ་སྒོ་འབྱེད་པའི་སྤྱི་པའི་ཐོན་རྫས་ཤིག་རེད། ཀྲུང་གོས་ཕྱོགས་སོ་སོ་དང་མཉམ་ལས་བྱས་ཏེ། གྲོས་འགོ་ལག་བསྟར་ལ་མཉམ་དུ་སྐུལ་ནས། རྒྱལ་ཁབ་གཅིག་ཀྱང་མི་ལུས་པར་བྱེད་དགོས།

  བཞི་པ་ནི་རྗེས་ལུས་ཀྱི་བསམ་བློ་འདོར་བ་དང་། ཞི་བདེ་མཉམ་གནས་དང་གཉིས་ཁེ་མཉམ་ཕན་ཡོང་བར་བྱེད་དགོས། མིག་སྔར་འཛམ་གླིང་དེ་འདྲའི་ཞི་བདེ་མིན་པ་དང་། འཁོན་འཛིན་ངན་སྐུལ། ཕྱོགས་རིས་བཅས་ཀྱི་སྐད་ཆ་རྣ་བར་སུན་པས། དེ་ལས་བཟོས་པའི་མི་ལེགས་པའི་སྣང་ཚུལ་དང་ཐ་ན་འཛམ་གླིང་ཞི་བདེ་དང་ཉེན་མེད་ལ་ངོ་རྒོལ་བྱས་ན་གནོད་པ་ལས་ཕན་པ་ཅི་ཡང་མེད། ལོ་རྒྱུས་ཀྱིས་ཡང་དང་བསྐྱར་དུ། ངོ་རྒོལ་བྱས་ན་དོན་དག་གཅིག་ཀྱང་འགྲུབ་མི་སྲིད་ལ། དེ་ལས་ལྡོག་སྟེ་མཇུག་འབྲས་ངན་པ་བཟོ་སྲིད་པ་བདེན་དཔང་བྱེད་ཐུབ། སྲུང་སྐྱོང་རིང་ལུགས་དང་ཕྱོགས་ལྷུང་རིང་ལུགས་བྱས་ན། སུ་ཡིས་ཀྱང་སྲུང་སྐྱོབ་བྱེད་མི་ཐུབ་པ་མ་ཟད། གཞི་ནས་རང་ཉིད་ཕམ་པའི་རྒྱུ་རུ་འགྱུར་ངེས་རེད། བཙན་དབང་བཙན་རྒོད་བྱེད་པ་ནི་ལོ་རྒྱུས་ཀྱི་འཕེལ་ཕྱོགས་དང་ལྡོག་པ་ཞིག་རེད། རྒྱལ་ཁབ་ཕན་ཚུན་བར་འགལ་བ་དང་འགལ་ཟླ་ཡོད་སྲིད་མོད། རེད་དེ་ཕ་རོལ་པོར་ཕམ་པ་དང་རང་ཉིད་རྒྱལ་བའི་འགྲན་རྩོད་ནི་ཕན་ཐོགས་གང་ཡང་མེད། ཞི་བས་འཕེལ་རྒྱས་དང་མཉམ་ལས་གཉིས་ཁེ་ནི་ད་གཟོད་མི་ཡུལ་གྱི་བདེན་ལུགས་རེད།

  རྒྱལ་ཁབ་མི་འདྲ་བ་དང་རིག་གནས་མི་འདྲ་བས་ཕན་ཚུན་བརྩི་འཇོག་བྱེད་པའི་ཁྲོད་ནས་མཉམ་དུ་འཕེལ་རྒྱས་གཏོང་བ་དང་། མཐུན་པ་ཡོང་ཐབས་དང་མི་མཐུན་པ་སོར་འཇོག་བྱེད་དགོས། ང་ཚོ་ལོ་རྒྱུས་ཀྱི་འཕེལ་ཕྱོགས་ཆེན་མོ་དང་བསྟུན་པ་དང་། དེ་ལྟར་བྱས་ན་རྒྱལ་སྤྱིའི་སྒྲིག་ལམ་བརྟན་པོ་དང་མིའི་རིགས་ཡོངས་ཀྱི་ཐུན་མོང་གི་རིན་ཐང་དར་སྤེལ། མིའི་རིགས་ཀྱི་ལས་དབང་གཅིག་པའི་ཐུན་མོང་ཚོགས་པ་འཛུགས་སྐྱོང་བཅས་ལ་ཕན་པ་ཡོད། གླེང་མོལ་ལས་ངོ་རྒོལ་མི་བྱེད་པ་དང་ཁོག་ཡངས་ལས་ཕྱིར་འབུད་མི་བྱེད་པ་རྒྱུན་འཁྱོངས་བྱས་ཏེ། རྣམ་པ་གང་རུང་གི་ཕྱོགས་ལྷུང་རིང་ལུགས་དང་སྲུང་སྐྱོང་རིང་ལུགས་ཡོད་ཚད་ལ་ངོ་རྒོལ་བྱེད་པ་དང་། ཕྱི་ཚུལ་རིང་ལུགས་ཀྱི་བཙན་དབང་རིང་ལུགས་དང་ཆབ་སྲིད་བཙན་དབང་ཡོད་ཚད་ལ་ངོ་རྒོལ་བྱེད་དགོས་ཞེས་གསུངས།

  ཞི་ཅིན་ཕིང་གིས། ན་ནིང་ནི་ཀྲུང་གོ་གུང་ཁྲན་ཏང་བཙུགས་ནས་ལོ་བརྒྱ་འཁོར་བའི་ལོ་རེད། ཀྲུང་གོ་གུང་ཁྲན་ཏང་གིས་ཀྲུང་གོའི་མི་དམངས་མཐུན་སྒྲིལ་སྣེ་ཁྲིད་བྱས་ཏེ་དཀའ་ཁག་ཁྱད་གསོད་བྱས་ཤིང་། རྒྱལ་ཁབ་འཛུགས་སྐྲུན་འཕེལ་རྒྱས་དང་མི་དམངས་ཀྱི་འཚོ་བ་ལེགས་བཅོས་གཏོང་བའི་ཐད་ནས་ཀུན་གྱིས་དོ་སྣང་བྱས་པའི་གྲུབ་འབྲས་བླངས་ཡོད། ཁྱོན་ཡོངས་ནས་འབྱོར་འབྲིང་སྤྱི་ཚོགས་འཛུགས་སྐྱོང་གི་དམིགས་འབེན་དུས་ལྟར་འགྲུབ་པ་དང་། དུས་ལྟར་དབུལ་བྲལ་འགག་སྒྲོལ་ལས་རྣམ་པར་རྒྱལ་བ་མ་ཟད། ལོ་རྒྱུས་རང་བཞིན་གྱི་སྒོ་ནས་དབུལ་ཕོངས་དབུལ་ནག་བསལ་ཡོད། ད་ལྟ་ཁྱོན་ཡོངས་ནས་འབྱོར་འབྲིང་སྤྱི་ཚོགས་འཛུགས་སྐྱོང་བྱེད་པའི་དེང་རབས་ཅན་གྱི་རྒྱལ་ཁབ་ཀྱི་བགྲོད་ལམ་གསར་པའི་ཐོག་སྐྱོད་བཞིན་ཡོད།

  ཀྲུང་གོས་བློ་བརྟན་འགྱུར་མེད་ཀྱིས་སྤུས་ཀ་མཐོ་བའི་འཕེལ་རྒྱས་གཏོང་རྒྱུ་རེད། ཀྲུང་གོའི་དཔལ་འབྱོར་སྤྱིའི་ཐོག་ནས་འཕེལ་རྒྱས་གནས་བབ་ཡག་པོ་རེད།ན་ནིང་ཀྲུང་གོའི་རྒྱལ་ནང་ཐོན་སྐྱེད་རིན་ཐང་བསྡོམས་འབོར་བརྒྱ་ཆའི་བརྒྱད་ཡས་མས་འཕར་བ་དང་།འཕར་ཚད་ཅུང་མཐོ་བ་དང་དངུལ་ལོར་འགྲེམ་ཐལ་ཤོར་ཚད་ཅུང་དམའ་བའི་དམིགས་འབེན་གཉིས་འགྲུབ་ཡོད། རྒྱལ་ནང་དཔལ་འབྱོར་གྱི་ཁོར་ཡུག་ཐད་གནོན་ཤུགས་ཆེན་པོར་འཕྲད་ནའང་།ཀྲུང་གོའི་དཔལ་འབྱོར་གྱི་བབ་བསྟུན་ནུས་པ་དང་གཏིང་ཤུགས་ཡོད་པ། ཡུན་རིང་ཇེ་ལེགས་འགྲོ་བའི་གཞི་རྩའི་ངོ་བོ་འགྱུར་མེད།  ང་ཚོ་ཀྲུང་གོའི་དཔལ་འབྱོར་འཕེལ་རྒྱས་ཀྱི་མདུན་ལྗོངས་ལ་ཡིད་ཆེས་ཀྱིས་ཁེངས་ཡོད། ཀྲུང་གོས་མི་སྒོ་ཀུན་ནས་འཕེལ་རྒྱས་གཏོང་བ་དང་།མི་དམངས་མཉམ་དུ་ཕྱུག་འགྱུར་ཡོང་བའི་ཐད་དོན་དངོས་རང་བཞིན་གྱི་གྲུབ་འབྲས་ཐོབ་ཡོད་པ་དང་།དེའི་ཐད་ནས་ཕྱོགས་སོ་སོས་ཧུར་བརྩོན་བྱེད་དགོས་ཞེས་བཏོན་ཡོད།

  ཀྲུང་གོའི་བློ་བརྟན་འགྱུར་མེད་ཀྱིས་བཅོས་བསྒྱུར་སྒོ་འབྱེད་བྱེད་རྒྱུ་རེད། ཀྲུང་གོའི་བཅོས་བསྒྱུར་སྒོ་འབྱེད་ནམ་ཡང་བྱེད་བཞིན་ཡོད། རྒྱལ་སྤྱིའི་གནས་བབ་ལ་འགྱུར་ལྡོག་ཅི་བྱུང་ཡང་། ཀྲུང་གོས་བཅོས་བསྒྱུར་སྒོ་འབྱེད་ཀྱི་དར་ཆ་མཐོན་པོར་བསྒྲེངས་ངེས་རེད། ཀྲུང་གོས་མུ་མཐུད་དེ་ཚོང་རའི་ཐོན་ཁུངས་བཀོད་སྒྲིག་ཁྲོད་ཀྱི་ཐག་གཅོད་རང་བཞིན་གྱི་ནུས་པ་བཏོན་ནས། བློ་བརྟན་འགྱུར་མེད་ཀྱིས་སྤྱི་ལ་དབང་བའི་ལམ་ལུགས་ཀྱི་དཔལ་འབྱོར་ཇེ་བརྟན་དང་འཕེལ་རྒྱས་གཏོང་བ། བློ་བརྟན་འགྱུར་མེད་ཀྱིས་སྤྱི་ལ་དབང་བ་མ་ཡིན་པའི་དཔལ་འབྱོར་འཕེལ་རྒྱས་གཏོང་བར་སྐུལ་སློང་དང་རྒྱབ་སྐྱོར།སྣེ་ཁྲིད་བཅས་བྱེད་རྒྱུ་རེད། ཀྲུང་གོས་གཅིག་གྱུར་སྒོ་འབྱེད་དང་འགྲན་རྩོད་གོ་རིམ་ལྡན་པའི་ཚོང་རའི་མ་ལག་བཙུགས་ནས། ཁེ་ལས་ཡོད་ཚད་ཁྲིམས་ལུགས་མདུན་གྱི་གོ་གནས་འདྲ་མཉམ་དང་ཚོང་རའི་ནང་གི་གོ་སྐབས་འདྲ་མཉམ་ཡིན་པར་འགན་སྲུང་བྱ་རྒྱུ་རེད། ཀྲུང་གོས་རིགས་སོ་སོའི་མ་རྩ་ཀྲུང་གོ་རུ་ཁྲིམས་མཐུན་སྒྲིག་མཐུན་ངང་ཚོང་གཉེར་བྱས་ནས། ཀྲུང་གོའི་འཕེལ་རྒྱས་ལ་ནུས་པ་ཆེན་པོ་འདོན་པར་དགའ་བསུ་ཡོད། ཀྲུང་གོས་མུ་མཐུད་དེ་ཆུ་ཚད་མཐོན་པོས་ཕྱི་ཕྱོགས་སྒོ་འབྱེད་རྒྱ་སྐྱེད་དང་། རྩ་དོན་དང་དོ་དམ། ཚད་གཞི་སོགས་ལམ་ལུགས་རང་བཞིནགྱི་སྒོ་འབྱེད་རྒྱ་སྐྱེད་གཏོང་བ་དང་། ཕྱི་དངུལ་སྤྱོད་པའི་ཁེ་ལས་ཀྱི་རྒྱལ་དམངས་ཐོབ་ཐང་ལག་བསྟར་བྱས་ནས། རྒྱུད་གཅིག་ལམ་གཅིག་སྤུས་ཀ་མཐོ་བའི་འཕེལ་རྒྱས་འགྲོ་བར་སྐུལ་དགོས།

  ཀྲུང་གོས་བློ་བརྟན་གྱུར་མེད་ཀྱིས་སྐྱེ་ཁམས་དཔལ་ཡོན་འཛུགས་སྐྱོང་བྱ་རྒྱུ་ཡིན། དཔལ་འབྱོར་འཕེལ་རྒྱས་གཏོང་ན་ཐོན་ཁུངས་དང་སྐྱེ་ཁམས་ཁོར་ཡུག་གཏོར་བརླག་གཏོང་མི་སྲིད་ལ། སྐྱེ་ཁམས་ཁོར་ཡུག་སྲུང་སྐྱོང་བྱེད་ན་ཡང་དཔལ་འབྱོར་འཕེལ་རྒྱས་གཏོང་མི་སྲིད་པ་མ་རེད། ཀྲུང་གོས་རི་སྔོན་པོ་དང་ཆུ་དྭངས་མོ་ནི་གསེར་རི་དངུལ་རི་ལྟ་བུའི་འདུ་ཤེས་རྒྱུན་འཁྱོངས། རི་ཆུ་ནགས་གསུམ་དང་རྩྭ་ཞིང་བྱེ་ཐང་ཕུང་གཅིག་ཅན་གྱི་སྲུང་སྐྱོང་དང་མ་ལག་བཅོས་སྐྱོང་། ཅི་ཐུབ་གང་ནུས་ཀྱིས་སྐྱེ་ཁམས་དཔལ་ཡོན་འཛུགས་སྐྱོང་དང་ཅི་ཐུབ་གང་ནུས་ཀྱིས་འབག་བཙོག་འགོག་བཅོས་ཇེ་དྲག། ཅི་ཐུབ་གང་ནུས་ཀྱིས་མི་དམངས་ཀྱི་ཐོན་སྐྱེད་འཚོ་བའི་ཁོར་ཡུག་ལེགས་སྒྱུར་གཏོང་རྒྱུ་རེད། ཐན་རྩེ་སོན་དང་ཐན་གཏོང་སྙོམས་ནི་ཀྲུང་གོའི་འཕེལ་རྒྱས་སྤུས་དག་གཏོང་བའི་ནང་རྐྱེན་དགོས་མཁོ་རེད་ལ། ཀྲུང་གོས་རྒྱལ་སྤྱིའི་སྤྱི་ཚོགས་ཐོག་གི་ཁས་ལེན་ནན་མོ་ཡང་རེད། ཀྲུང་གོས་ཁས་ལེན་དམ་དུ་འཛིན་ཞིང་འཕེལ་རྒྱས་བརྟན་པོ་གཏོང་རྒྱུ་དང་། ཐན་རྩེ་སོན་དང་ཐན་གཏོང་སྙོམས་ནི་ནམ་ཡང་ལྷོད་གཡེང་གཏན་ནས་མི་བྱེད། ཀྲུང་གོས་གསར་གཏོད་དང་གཞི་ཚུགས་ཟུང་དུ་འབྲེལ་ཞིང་བརྟན་ཐོག་སྲ་བརྟན་བཏང་ནས། ནུས་ཁུངས་གསར་པའི་ཚབ་བྱེད་རུང་བའི་རྒྱུད་རིམ་ཁྲོད་སྲོལ་རྒྱུན་གྱི་ནུས་ཁུངས་འཛད་སྤྱོད་ཇེ་ཉུང་བཏང་ནས་དཔལ་འབྱོར་དང་སྤྱི་ཚོགས་འཕེལ་རྒྱས་བརྟན་པོར་གཏོང་རྒྱུ་ཡིན། ཀྲུང་གོས་ནམ་ཟླའི་འགྱུར་ལྡོག་ལ་ཁ་གཏད་པའི་རྒྱལ་སྤྱིའི་མཉམ་ལས་སྤེལ་གང་ཐུབ་བྱས་ནས།  དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཁྱོན་ཡོངས་འབག་མེད་ལུགས་སྒྱུར་གཏོང་རྒྱུ་ཡིན་ཞེས་གསུངས།