༢༠༢༥ལོའི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཞབས་རྗེས།

  ༢༠༢༥ལོ་ནི་ལོ་ལྔའི་འཆར་གཞི་ཨང་བཅུ་བཞི་པའི་འཆར་འགོད་མཇུག་བསྒྲིལ་བའི་ལོ་དང་། ལོ་ལྔའི་འཆར་གཞི་ཨང་བཅོ་ལྔ་པའི་འཆར་འགོད་བཀོད་སྒྲིག་བྱེད་པའི་ལོ་ཡིན་པ་མ་ཟད། སྔར་ལས་ལྷག་པར་ཕྱོགས་ཡོངས་ནས་བཅོས་བསྒྱུར་ཟབ་སྤེལ་དང་། ཀྲུང་གོའི་ལུགས་ཀྱི་དེང་རབས་ཅན་བརྟན་བརླིང་དང་མདུན་རྒྱང་རིང་བར་སྐུལ་འདེད་གཏོང་བའི་འགག་རྩའི་ལོ་ཞིག་ཀྱང་ཡིན་པ་རེད།

  ལོ་འདིར། ཀྲུའུ་ཞི་ཞི་ཅིན་ཕིང་གིས་མི་དམངས་བརྩེ་བས་སྐྱོང་ཞིང་། འཕེལ་རྒྱས་ཐུགས་སུ་བཟུང་ནས་གང་སར་ཞབས་རྗེས་བཀོད་ཡོད།  

  གྲོང་གསེབ་ཏུ་ཕེབས་པ་དང་།  ཏུང་སྡེ་རུ་བསྐྱོད་པ། གནའ་གྲོང་ལ་འཚམས་འདྲི་གནང་བ། ཤིང་ཏོག་ར་བར་གཟིགས་སྐོར་མཛད་པ་བཅས་ཀྱི་ལམ་ནས། སྤྱི་ཁྱབ་ཧྲུའུ་ཅི་ཡིས་ཡུལ་མི་རྣམས་དང་ལྷན་དུ་འཚོ་བའི་གནས་ཚུལ་གླེང་ཞིང་འཕེལ་རྒྱས་འཆར་འགོད་བྱས་ཏེ་ཀྲུང་གོའི་ལུགས་ཀྱི་དེང་རབས་ཅན་སྔར་བས་ལེགས་པར་འཛུགས་སྐྲུན་བྱ་རྒྱུར་སྐུལ་ལྕག་གནང་བ་དང་། ཚོགས་འདུ་གལ་ཆེན་གཙོ་སྐྱོང་མཛད་ཅིང་བཟོ་གྲྭའི་འཁོར་ཁང་དང་ཚན་རྩལ་གསར་གཏོད་ཀྱི་ཡུལ་དངོས་སུ་གཟིགས་ཞིབ་གནང་སྟེ།  སྤྱི་ཁྱབ་ཧྲུའུ་ཅི་ཡིས་ཀྲུང་གོའི་ལུགས་ཀྱི་དེང་རབས་ཅན་ལ་དམིགས་ནས་དགོངས་པ་གསར་པ་དང་ལྟ་བ་གསར་པ། ཆོད་གཏམ་གསར་པ་བཅས་རབ་དང་རིམ་པ་བཏོན་ལ། ས་དམ་གནའ་མཁར་ལ་གཟིགས་ཞིབ་དང་། རྟ་དཀར་དགོན་པར་གཟིགས་སྐོར། གནའ་བོའི་ཕོ་བྲང་རྟེན་རྫས་བཤམས་མཛོད་ཁང་དུ་གཟིགས་སྐོར། གསར་བརྗེའི་བཞུགས་གནས་རྙིང་པར་མཇལ་བ་བཅས་ཀྱི་ལམ་ནས་སྤྱི་ཁྱབ་ཧྲུའུ་ཅི་ཡིས་སྤྱི་ཚོགས་ཡོངས་ལ་སྣེ་ཁྲིད་དེ་རིག་གནས་རང་རྟོགས་ཁྲོད་རིག་གནས་རྒྱུན་འཛིན་དང་དད་མོས་ཀྱི་རྨང་གཞི་ཇེ་བརྟན་དུ་བཏང་བ་རེད། 

  ལོ་འདིར། ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་འོད་སྟོང་འབར་བའི་ལམ་བུའི་ཐོག་སླར་ཡང་དུས་རབས་ཀྱི་རྟགས་ཐམ་བརྐོས་ཡོད།

    ཟླ་༩པའི་ཚེས་༣ཉིན་གནམ་བདེའི་སྒོ་མོ་ཆེའི་ཐང་ཆེན་དུ་རྒྱལ་ཁ་ཐོབ་པའི་ཉིན་མོར་དམག་གཟིགས་ཆེན་པོ་གནང་སྐབས་ཞི་ཅིན་ཕིང་གིས་ཀྲུང་ཧྭ་མི་རིགས་རླབས་ཆེན་བསྐྱར་དར་ནི་འགོག་ཐབས་བྲལ་བ་ཞིག་ཡིན་ཞེས་སྙིང་སྟོབས་བསྐྱེད་པའི་གསུང་བཤད་གནང་།

  བོད་རང་སྐྱོང་ལྗོངས་དབུ་བརྙེས་ནས་ལོ་༦༠འཁོར་བ་དང་ཞིན་ཅང་ཡུ་གུར་རང་སྐྱོང་ལྗོངས་དབུ་བརྙེས་ནས་ལོ་༧༠འཁོར་བའི་མཛད་སྒོའི་སྐབས། ཀྲུའུ་ཞི་ཞི་ཅིན་ཕིང་གིས་ཀྲུང་དབྱང་འཐུས་མི་ཚོགས་པའི་སྣེ་ཁྲིད་དེ་རྟེན་འབྲེལ་མཛད་སྒོར་ཕེབས་ནས་ཀྲུང་ཧྭ་མི་རིགས་ཐུན་མོང་ཚོགས་པའི་འདུ་ཤེས་བརྟན་པོ་འཛུགས་པ་དང་དུས་རབས་གསར་པའི་ཏང་གི་མི་རིགས་ལས་དོན་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་ཁ་ཕྱོགས་གསལ་སྟོན་མཛད་ཡོད།

ཏང་གི་སྐབས་ཉི་ཤུ་པའི་ཀྲུང་ཨུའི་ཚང་འཛོམས་གྲོས་ཚོགས་བཞི་པའི་ཐོག༼ཀྲུང་གུང་ཀྲུང་དབྱང་གི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་ལོ་ལྔའི་འཆར་གཞི་ཨང་བཅོ་ལྔ་པའི་འཆར་འགོད་གཏན་འབེབས་བྱ་རྒྱུའི་སྐོར་གྱི་གྲོས་འགོ༽ལ་གྲོས་ཞིབ་བྱས་ནས་གྲོས་འཆམ་བྱུང་། ལོ་རྒྱུས་ཀྱི་དོན་སྙིང་གཏིང་ཟབ་ལྡན་པའི་ཡིག་ཆ་དེ་ནི་ཀྲུའུ་ཞི་ཞི་ཅིན་ཕིང་སྐུ་དངོས་ཀྱིས་དབུ་ཁྲིད་མཛད་ཅིང་། བརྒྱུད་རིམ་ཧྲིལ་པོའི་མཛུབ་ཁྲིད་གནང་བའི་འོག་ནས་ལེགས་གྲུབ་བྱུང་བ་ཞིག་ཡིན་ཞིང་། བགྲོད་ལམ་གསར་པའི་འགག་རྩའི་ལོ་ལྔའི་རིང་འཆར་འགོད་བཀོད་སྒྲིག་མཛད་པ་ཞིག་ཡིན་པ་རེད།

  ལེ་བར་ཁྲི་སྟོང་གི་རི་ཆུའི་བར་གྱི་ཞབས་རྗེས་ལས་མི་དམངས་གཙུག་ཏུ་བཀུར་བའི་འགྱུར་མེད་ཀྱི་ཐོག་མའི་ཕུགས་འདུན་མངོན་པ་དང་། སྤུས་ཚད་མཐོ་བའི་འཕེལ་རྒྱས་ཀྱི་འགྱུར་མེད་ཡིད་ཆེས་མཚོན་ཡོད་པ་མ་ཟད། རིག་གནས་འཛིན་སྐྱོང་བྱེད་པའི་འཚོལ་ཞིབ་ཟབ་མོ་འདུས་ཡོད་པས། མང་ཚོགས་ཀྱི་སེམས་ཤུགས་གཅིག་ཏུ་སྒྲིལ་བའི་སྟོབས་ཤུགས་ཆེན་པོ་ཞིག་གྲུབ་ཡོད། 

   ལོ་གསར་པར་རེ་ལྟོས་བྱེད་པའི་སྐབས་འདིར། ང་ཚོས་བློ་མཐུན་ཞི་ཅིན་ཕིང་གིས་སྲོག་ཤིང་མཛད་པའི་ཏང་ཀྲུང་དབྱང་གི་མཐའ་འཁོར་དུ་སྔར་བས་མཐུན་སྒྲིལ་དམ་ཟབ་བྱས་ཏེ། ཏན་ཏན་ཏིག་ཏིག་དང་། ཧུར་བརྩོན་ཡར་སྤེལ། འབད་བརྩོན་ལྷོད་མེད་བཅས་བྱས་ཏེ། རླབས་ཆེན་འཆར་གཞི་དེ་གོམ་སྟབས་རེ་རེ་བཞིན་དོན་དངོས་སུ་འགྱུར་བར་བྱ་དགོས།