གནའ་བོའི་ལམ་བུར་དེང་གི་དཔལ་ཡོན་བཞད།

  ཉང་ཆུ་གཙང་པོའི་འགྲམ་དང་གླང་ཆེན་རིའི་རི་གཤམ་དུ་གནས་པའི་ཀོང་པོ་རྒྱ་མདའ་རྫོང་རྒྱ་མདའ་ཤང་ཐའེ་ཀྲའོ་གྲོང་ཚོས་ལོ་ངོ་སྟོང་གི་ལོ་རྒྱུས་འཕོ་འགྱུར་ལ་བདེན་དཔང་བྱས་པ་དང་། དེ་གར་ནི་ཐང་བོད་གནའ་ལམ་དང་། ཇ་རྟའི་གནའ་ལམ། ཁྲོན་བོད་གཞུང་ལམ་བཅས་ཀྱི་ལམ་མདོ་འཁེལ་བ་མ་ཟད། དམག་སྡེ་བཅོ་བརྒྱད་པའི་ཟམ་ཤུལ་དང་གེ་སར་ལྷ་ཁང་སོགས་གནའ་ཤུལ་མང་པོས་མི་རིགས་མང་པོ་མཉམ་འདྲེས་བྱས་པའི་ལོ་རྒྱུས་ཀྱི་ངོ་མཚར་ལ་བདེན་དཔང་བྱས་ཡོད་ལ། ཡུལ་དེ་ནི་དེ་སྔའི་ཁྲོན་བོད་ལམ་བུའི་ཐོག་གི་ས་ཚུགས་གལ་ཆེན་ཞིག་ཀྱང་རེད།

འདི་ནི་གཙང་ཞིང་གྲལ་སྟར་འགྲིག་པའི་ཐའེ་ཀྲའོ་གྲོང་ཚོ་ཡིན་པ།

  འགྲུལ་པ་བྲེལ་འཚུབ་ཆེན་པོས་འགྲོ་འོང་བྱེད་པའི་ཐའེ་ཀྲའོ་གནའ་བོའི་ས་ཚུགས་ནས་ད་ལྟའི་མི་རིགས་མཐུན་སྒྲིལ་གྱི་དཔེ་མཚོན་གྲོང་ཚོ་བར་དང་སྔོན་ཆད་རི་ལ་བརྟེན་ནས་འཚོ་བ་སྐྱེལ་བའི་ལུང་ཁུག་ནས་ད་ཆའི་གནས་འཕྲོད་ལས་འཚམ་དང་མཛེས་མཐུན་གསུམ་ལྡན་གྱི་གྲོང་གསེབ་བར། གནའ་བོའི་གྲོང་ཁྱེར་ལ་ཉམས་འགྱུར་གསར་པ་མངོན་པ་དང་སྡོང་པོ་རྙིང་པར་ཡལ་ག་གསར་པ་རྒྱས་ནས་མཐུན་སྒྲིལ་འཕེལ་རྒྱས་ཀྱི་གཏམ་རྒྱུད་དེ་གར་མུ་མཐུད་རྩོམ་བཞིན་ཡོད།

ལོ་ངོ་སྟོང་གི་རིག་གནས་ལས་མི་སེམས་གཅིག་ཏུ་བསྒྲིལ། སེ་འབྲུའི་མེ་ཏོག་དམར་མདངས་རབ་ཏུ་རྒྱས།

  རྡོ་གཅལ་ལམ་བརྒྱུད་ནས་ཐའེ་ཀྲའོ་གྲོང་ཚོའི་མཐུན་སྒྲིལ་ཐང་ཆེན་དུ་སྐྱོད་སྐབས། གྱང་དཀར་པོ་དང་སྒེའུ་ཁུང་ཁྲ་ཁྲ་ཡིན་པའི་བོད་བཟོའི་ཁང་པ་མཐོ་པོ་ཞིག་མིག་མདུན་དུ་འཆར་བ་དེ་ནི་ལྗོངས་ཡོངས་ཀྱི་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་ཆེད་དོན་འགྲེམས་ཁང་དང་པོ་སྟེ་ཐའེ་ཀྲའོ་གནའ་གྲོང་གི་འགྲེམས་སྟོན་ཁང་རེད།

  འགྲེམས་ཁང་དེ་2023ལོའི་ཟླ་9པར་སྒོ་ཕྱེ་བ་དང་། སྨི་ངོས་གྲུ་1200ཡོད་པའི་བཤམས་སྟོན་བར་མཐོངས་ཀྱི་པར་རིས་216དང་། ཡུལ་རྣམ་7 འཇིམ་བརྐོས་11བཅས་ལས“རྒྱ་བོད་འབྲེལ་བའི”གཏམ་རྒྱུད་30ལྷག་ཙམ་གསོན་ཉམས་ལྡན་པའི་སྒོ་ནས་བསྐྱར་དུ་མངོན་ཡོད།

“འགྲེམས་ཁང་སྒོ་ཕྱེ་བ་ནས་2025ལོའི་ཟླ་12པའི་བར་འགྲེམས་ཁང་དེས་ལྟ་སྐོར་བ་ཁག་115དང་མི་ཐེངས་2000ལྷག་ཙམ་ལ་སྣེ་ལེན་བྱས་ཏེ། ཀོང་པོ་རྒྱ་མདའ་རྫོང་དང་ཐ་ན་ཉིང་ཁྲི་གྲོང་ཁྱེར་དང་ལྗོངས་ཡོངས་ལ་རྒྱལ་གཅེས་རིང་ལུགས་ཀྱི་སློབ་གསོ་དང་མི་རིགས་མཐུན་སྒྲིལ་གྱི་སློབ་གསོ་སྤེལ་བའི་ལས་སྟེགས་མཁོ་འདོན་བྱས་ཡོད”ཅེས་ཐའེ་ཀྲའོ་གྲོང་ཚོར་བཅའ་སྡོད་ཉིང་ཁྲི་གྲོང་ཨུད་དྲིལ་བསྒྲགས་པུའི་ལས་དོན་རུ་ཁག་གི་རུ་དཔོན་དང་ཧྲུའུ་ཅི་དང་པོ་གཅིག་ལྕོགས་ཀེ་ཡུན་གྱིས་བཤད་པ་དང་། རང་སྐྱོང་ལྗོངས་ཀྱི་རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞི་ཡིན་པའི་ཐའེ་ཀྲའོ་གྲོང་ཚོའི་ལོ་རྒྱུས་ནི་མི་རིགས་མཐུན་སྒྲིལ་གྱི“བསླབ་གཞི་གསོན་པོ”ཞིག་རེད།

  ང་ཚོའི་ཁྱིམ་ཚང་ནི་མི་རིགས་མཐུན་སྒྲིལ་གྱི་ཕན་པ་ཐོབ་མཁན་ཞིག་ཡིན”ཞེས་ཀན་སུའུ་ཡི་གཞོན་ནུ་ཧྲན་ཅིན་ཤང་གིས་མྱོང་ཚོར་ཆེན་པོས་བཤད།

2004ལོར་ཁོང་ཐའེ་ཀྲའོ་གྲོང་ཚོར་ཟམ་པ་བསྐྲུན་པར་ཡོང་སྐབས་བོད་རིགས་བུ་མོ་འཆི་མེད་དང་ངོ་ཤེས་ནས་དགའ་རོགས་བསྒྲིགས་པ་དང་དེ་ནས་གཉེན་སྒྲིག་བྱས་པ་རེད། ལོ་ངོ་20ལྷག་ཙམ་རིང་ཧྲན་ཅིན་ཤང་གིས་བོད་རིགས་ཀྱི་དགེ་ཕྲུག་དྲུག་ལ་ལྡེབས་ཞལ་ལག་རྩལ་བུམ་པ་གང་བྱོའི་ཚུལ་གྱིས་བསླབས་པས་ཁོང་ཚོས་ལག་རྩལ་སྣ་གཅིག་ལ་བརྟེན་ནས་འབབ་འཕར་ཕྱུག་འགྱུར་བྱུང་བ་རེད། ད་ཆ་ཧྲན་ཅིན་ཤང་གི་ཁྱིམ་ཚང་གི་ལོ་རེའི་ཡོང་འབབ་སྒོར་ཁྲི་10ལྷག་ཙམ་ཟིན་པ་དང་ནང་མི་ཚང་མ་བདེ་སྐྱིད་དཔལ་ལ་རོལ་ནས“ཀྲུང་ཧྭ་མི་རིགས་ཁྱིམ་ཚང་གཅིག”གི་གསོན་ཉམས་དོད་པའི་མཚོན་ཚུལ་དུ་གྱུར་ཡོད།

  ཐའེ་ཀྲའོ་གྲོང་ཚོར་ཧྲན་ཅིན་ཤང་ལྟ་བུའི་མི་རིགས་མཐུན་སྒྲིལ་གྱི་ཁྱིམ་ཚང་6ཡོད། གྲོང་ཚོ་ཡོངས་ཀྱི་མི་རིགས་ཁག་གི་མང་ཚོགས་ཀྱིས་སེ་འབྲུའི་རྡོག་ལྟར་གཅིག་ལ་གཅིག་བརྟེན་གྱིས་ཕན་ཚུན་བརྩེ་དུང་ཟབ་ལ་འཆམ་མཐུན་མཉམ་གནས་བྱེད་བཞིན་ཡོད།

གྲོང་གསེབ་དར་རྒྱས་ཆེད་དུ་མཉམ་དུ་འབད། ཐོན་ལས་སྣ་མང་གཉེར་ནས་ཡོང་འབབ་འཕར།

  གྲང་ངར་ཆེ་བའི་དགུན་དུས་སུ། “ཐའེ་ཀྲའོ་གནའ་གྲོང་མི་རིགས་མཐུན་སྒྲིལ་གྲོང་རྡལ་ཆུང་ངུ”སྐྲུན་མཚམས་བཞག་མེད་པ་དང་། ཨར་ལས་བྱ་ཡུལ་དུ་ལས་མིས་དབོར་འདྲེན་དང་ཚ་ལ་རྒྱག་པ་ལ་སོགས་བྲེལ་འཚུབ་ཆེ་ལ་གོ་རིམ་ལྡན་པའི་ངང་ལས་ཀ་བྱེད་བཞིན་ཡོད་ཅིང་། ཡུན་རིང་མ་འགོར་བར་དེ་གར་ནི་རྒྱལ་ལམ་318ལམ་རྒྱུད་ཀྱི་མཛེས་སྡུག་ལྡན་ལ་ཁྱད་ཆོས་ཆེ་བའི་ཡུལ་སྐོར་གྲོང་རྡལ་ཆུང་ངུ་ཞིག་ཏུ་འགྱུར་རྒྱུ་རེད།

2024ལོར་མ་དངུལ་བསྡོམས་འབོར་སྒོར་དུང་ཕྱུར་1བཏང་བའི་“ཐའེ་ཀྲའོ་གནའ་གྲོང་མི་རིགས་མཐུན་སྒྲིལ་གྲོང་རྡལ་ཆུང་ངའི”རྣམ་གྲངས་ལག་བསྟར་བྱེད་འགོ་ཚུགས་ཤིང་། ཉིང་ཁྲི་གྲོང་ཁྱེར་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་སྒྱུར་བཅོས་སྒོ་དབྱེའི་སྔོན་སྐྱོད་ཁུལ་འཛུགས་སྐྲུན་རྣམ་གྲངས་ཁག་དང་པོ་ཡིན་པའི་ངོས་ནས་གྲོང་རྡལ་ཆུང་ངུ་དེས་གནའ་བོའི་ཁྲོམ་གཞུང་གི་རྣམ་པ་སླར་གསོ་དང་། ཁྱད་ལྡན་ལས་རྣམ་ཕུན་སུམ་ཚོགས་སུ་གཏོང་བ། ཁེ་ཕན་འབྲེལ་མཐུད་གཏིང་ཟབ་ཏུ་གཏོང་བ། མང་ཚོགས་ཀྱི་ཡོང་འབབ་འཕར་སྣོན་ཡོང་བར་ཁྲིད་སྟོན་བྱེད་པ་བཅས་ཀྱི་བསམ་ཕྱོགས་གཙོ་བོར་བྱས་ཏེ། གནའ་བོའི་ཚོང་འགྲུལ་ས་ཚུགས་དང་། གསར་བརྗེའི་ལོ་རྒྱུས། དེང་དུས་ཀྱི་འཚོ་བ་སོགས་ཀྱི་གཞི་རྒྱུ་བསྡུ་སྒྲིལ་བྱས་ཏེ་བོད་ཀྱི་རིག་གནས་ཡུལ་སྐོར་ཐོན་ལས་ཀྱིས་གྲོང་གསེབ་དར་རྒྱས་ལ་མཐུན་རྐྱེན་སྦྱོར་བའི་དཔེ་མཚོན་ལས་གྲྭ་ཞིག་ཏུ་ཧུར་ཐག་བསྐྲུན་རྒྱུ་རེད།

རྣམ་གྲངས་ལ་སྐུལ་འདེད་བཏང་བ་དེས་ས་གནས་དེ་གའི་ཡུལ་མིར་དངོས་དངོས་རྗེན་རྗེན་གྱི་ཕན་པ་ཐོབ་པ་རེད།

གྲོང་ཚོའི“ཨུ་ལྷན་གཉིས”ཀྱིས་མང་ཚོགས་120ལྷག་ཙམ་སྒྲིག་འཛུགས་བྱས་ནས་ཨར་ལས་དང་། སྐྱེལ་འདྲེན། འཕྲུལ་ཆས་བོགས་གཏོང་སོགས་ཀྱི་ལས་ཀར་ཞུགས་པ་རེད། མིག་སྔའི་བར་རིམ་རྩིས་བརྒྱབ་ན་ཡོང་འབབ་སྒོར་ཁྲི་170ལྷག་ཙམ་འཕར་བར་སྐུལ་ཁྲིད་བྱས་པས། མི་རེར་ཆ་སྙོམས་སྒོར་ཁྲི་1.4ལྷག་ཙམ་བྱུང་བ་དང་རྣམ་གྲངས་ལེགས་གྲུབ་བྱས་རྗེས་བསྡོམས་ཡོང་འབབ་སྒོར་ཁྲི་300ལྷག་ཙམ་ཟིན་རྒྱུ་རེད།

“དེ་སྔ་ཕྱིར་གླ་པ་རྒྱུག་པར་ཕྱིན་ཚེ་ཁྱིམ་ལ་ལྟ་རྟོག་བྱེད་ཐུབ་ཀྱི་མེད། ད་ལྟ་གྲོང་ཚོར་བསྡད་ནས་ལས་ཀ་བྱས་སྟབས་ཡོང་འབབ་གསོག་ཐུབ་པ་མ་ཟད། རྒན་རྒོན་དང་བྱིས་པར་ཡང་ལྟ་རྟོག་ཐུབ་ཀྱི་འདུག་པས་དངོས་གནས་ཡག་པོ་འདུག”ཅེས་ཡུལ་མི་པད་མས་དགའ་ཚོར་ཆེན་པོས་བཤད།

འཕེལ་རྒྱས་ཀྱི་ཁེ་སྤོགས་ནི་ལོ་རྒྱུས་རིག་གནས་ཐོན་ཁུངས་ཀྱིས་འདེགས་སྐྱོར་བྱེད་པའི་རྣམ་གྲངས་ལས་བྱུང་བ་ཞིག་ཡིན་པ་མ་ཟད། ད་དུང་ཡུལ་མི་ཚོས་ལས་ལ་བརྩོན་པའི་བློ་གྲོས་ལ་བརྟེན་ནས་མཉམ་སྡེབ་དཔལ་འབྱོར་ཐོན་ལས་བཏོད་པ་ལས་བྱུང་བ་ཞིག་ཀྱང་རེད། 2024ལོའི་ཟླ་6པར་གྲོང་སྡོད་ལས་དོན་རུ་ཁག་གི་རོགས་རམ་འོག་ཐའེ་ཀྲའོ་གྲོང་ཚོའི་མང་ཚོགས་ཀྱིས་མ་དངུལ་སྒོར་ཁྲི་120བསྡུ་རུབ་བྱས་ཏེ་ཀོང་པོ་རྒྱ་མདའ་རྫོང་གི་གྲོང་ཚོ་རིམ་པའི་རླངས་འཁོར་བོགས་གཏོང་ཞབས་ཞུ་ཀུང་སི་ཐོག་མ་སྟེ། ཐའེ་ཀྲའོ་ཚང་གི་རླངས་འཁོར་བོགས་གཏོང་ཞབས་ཞུ་ཀུང་སི་བཙུགས་པ་རེད།

“ཀུང་སིའི་ལས་སྒོའི་ནང་བོགས་གཏོང་དང་། ཚབ་གཏོང་། ཕྱིར་ཚོང་བཅས་ཚུད་ཡོད་པས་མཉམ་སྡེབ་དཔལ་འབྱོར་སྟོབས་ཆེར་ཕྱིན་པ་མ་ཟད། ང་ཚོར་ཁྱིམ་གྱི་སྒོ་རྩ་ནས་ལས་ཀ་རག་བྱུང” ཡུལ་མི་བློ་བཟང་ནི་མ་རྐང་བདག་པོའི་གྲས་ཡིན་པ་མ་ཟད། ལས་མི་ཡང་ཡིན་པས་གླ་ཕོགས་ལེན་རྒྱུ་ཡོད་ལ་ལོ་མཇུག་ཏུ་ད་དུང་ཁེ་སྤོགས་ཀྱང་རག་གི་ཡོད། 2025ལོར་ཀུང་སི་དེའི་ཡོང་འབབ་སྒོར་ཁྲི་67.2ཟིན་ནས་གྲོང་ཚོའི་མཉམ་སྡེབ་དཔལ་འབྱོར་གྱི“གཙོ་ཤུགས་དམག”ཏུ་གྱུར་ཡོད།

ཆུང་ཙག་ས་ནས་དྲོ་སྐྱིད་ཆེན་པོ་ཚོར། གནས་འཕྲོད་ལས་འཚམ་བདེ་སྡོད་དཔལ་ལ་རོལ།

“གྲོང་ཚོའི་བདེ་སྐྱིད་ལྡན་པའི་ཞིང་པའི་དེབ་ཁང་བསྐྲུན་རྗེས་ཕྲུ་གུ་ཚོར་མཉམ་དུ་སློབ་སྦྱོང་བྱེད་ས་དང་དཔེ་དེབ་ལྟ་ས་བྱུང་ཡོད”

“གྲོང་ཚོའི་མཉམ་སྡེབ་ནས་ལོ་ལྟར་གྲོང་མི་ཡོངས་ཀྱི་སྨན་བཅོས་འགན་བཅོལ་གྱི་གྲོན་དངུལ་དང་རྒན་གསོའི་འགན་བཅོལ་གྱི་གྲོན་དངུལ་ཕྱེད་ཀ་སྤྲོད་ཀྱི་ཡོད་པ་དང་ང་ཚོ་རང་ཉིད་ཀྱིས་ཕྱེད་ཀ་ལས་སྤྲོད་དགོས་མེད”  “གྲོང་སྡོད་ལས་བྱེད་པས་བརྩོན་ལེན་བྱས་པ་བརྒྱུད། གྲོང་ཚོ་ཡོངས་ཀྱི་བུད་མེད་64ཚང་མར་ཁབ་ཐེངས་གཅིག་གི་རིན་པ་གཟིགས་སྐྱོང་བྱས་ཏེ་རིན་པ་གཉིས་པའི་HPVརིམས་འགོག་སྨན་ཁབ་བརྒྱབ་པ་རེད”

བདེ་སྐྱིད་ལྡན་པའི་འཚོ་བ་ནི་ཐུགས་ཁུར་ཆུང་ཙག་ལས་བྱུང་བ་ཞིག་ཡིན་པ་དང་། མང་ཚོགས་ཀྱི་གཏམ་གླེང་ཁྲོད་དུ་གསར་འགོད་པས་ཐའེ་ཀྲའོ་གྲོང་ཚོའི་བདེ་སྡོད་ལས་བརྩོན་ཚོར་ཡོད།

ཐའེ་ཀྲའོ་གྲོང་ཚོའི་གྲོང་གསེབ་ཀྱི་བདེ་སྐྱིད་ཁང་ནི་ས་གནས་དེ་གའི་རྒན་རྒོན་ལ་རོགས་རམ་དང་རྒན་གསོའི་དམངས་འཚོའི་རྣམ་གྲངས་ཤིག་ཡིན་པ་དང་རྒན་རྒོན་ལ་ཉིན་མོའི་ལྟ་སྐྱོང་དང་། བདེ་ཐང་དོ་དམ། བཟའ་བཏུང་རོལ་རྩེད་སོགས་ཀྱི་ཞབས་འདེགས་སྣ་ཚོགས་ཞུས་ཏེ་རྒན་རྒོན་ཚོར་ཅུང་ལེགས་པའི་འཚོ་བའི་འགན་ལེན་དང་སེམས་ཀྱི་རྟེན་ས་རག་པ་མ་ཟད། ཕྱིར་ཡོང་འབབ་གསོག་མཁན་གྱི་བུ་ཕྲུག་ཚོ་བློ་བདེ་བག་ཕེབས་བྱུང་ཡོད། 2023ལོར་བདེ་སྐྱིད་ཁང་དེ་རང་སྐྱོང་ལྗོངས་ཀྱི་སྐར་གསུམ་རིམ་པའི་རྒན་གསོའི་ཞབས་ཞུའི་སྒྲིག་གཞིར་བདམས་པས་རྒན་རྒོན་ཚོ་དེ་གར“རྒས་དུས་འཚོ་རྟེན་ཡོད་པ་དང་རྒས་དུས་སེམས་པ་སྐྱིད་པོ”བྱུང་ཡོད།

དམངས་འཚོར་དོན་ཆུང་མེད། ཐའེ་ཀྲའོ་གྲོང་ཚོའི་ཡུལ་མིའི་སྐྱིད་སྣང་དེ་ཙམ་གྱིས་མི་ཚད་ཅིང་། 2025ལོར་ཐའེ་ཀྲའོ་གྲོང་ཚོས་དམངས་ཕན་ཞབས་ཞུའི་མྱུར་སྐྱེལ་གནས་སྐབས་ཉར་ཚགས་ས་ཚིགས་བཙུགས་པས་མང་ཚོགས་ཀྱིས་མྱུར་སྐྱེལ་ཉར་ཚགས་ལ་སེམས་ཁྲལ་བྱེད་དགོས་མེད་པ་དང་། གྲོང་ཚོའི་མཐའ་འཁོར་དུ་གཅན་གཟན་འགོག་པའི་ཉི་ནུས་གློག་སྒྲོན་བསྒར་ཡོད་པས་མཚན་མོར་ཕྱིར་སྐྱོད་སྐབས་དེ་བས་བདེ་འཇགས་ལྡན་པ་བྱུང་ཡོད། ཉིང་ཁྲི་གྲོང་ཁྱེར་མི་རིགས་སྒྱུ་རྩལ་ཚོགས་པ་གྲོང་ཚོར་གདན་དྲངས་པས་མང་ཚོགས་ཀྱིས་ཁྱིམ་གྱི་སྒོ་ཁར་ལྟད་མོ་ཆེ་བའི་འཁྲབ་སྟོན་ལྟ་ཐུབ་པ་རེད།

“ལོ་འདི་དག་རིང་། གྲོང་ཚོས་དམངས་འཚོའི་ཁྱབ་ཁོངས་སུ་དངོས་དངོས་རྗེན་རྗེན་གྱི་མ་དངུལ་བཏང་ཞིང་། 2021ལོ་ནས་བཟུང་། གྲོང་ཚོའི་མཉམ་སྡེབ་ནས་རིམ་རྩིས་བརྒྱབ་ན་ཡུལ་མིར་སྨན་བཅོས་དང་རྒན་གསོ་སོགས་འགན་བཅོལ་གྱི་གྲོན་དངུལ་སྣ་ཚོགས་སྒོར་ཁྲི་37ལྷག་ཙམ་སྤྲད་པ་དང་། གྲོང་ཚོ་ཡོངས་ཀྱི་སློབ་ཆེན་སློབ་མ་88ལ་སློབ་སྐྱོར་བྱས་པར་ཁྱོན་མ་དངུལ་སྒོར་ཁྲི་7.6བཏང་བ། གྲོང་ཚོ་ཡོངས་ཀྱི་དུད་ཚང་104ཡི་ཡུལ་མིས་ཤེས་དཔལ་སྐར་གསོག་བྱས་པ་བརྒྱུད་སྒོ་རྩིས་ཚོང་ཁང་ནས་རིན་ཐང་བསྡོམས་འབོར་སྒོར་ཁྲི་1.72རི་བའི་འཚོ་བའི་མཁོ་ཆས་སྣ་ཚོགས་བརྗེས་ཡོད”

ཐའེ་ཀྲའོ་གྲོང་ཚོའི་ཏང་ཀྲི་པུའི་ཧྲུའུ་ཅི་གཞོན་པ་དང་གྲོང་དོན་ལྟ་སྐུལ་ཨུ་ལྷན་གྱི་ཀྲུའུ་རེན་པད་མ་གཡང་འཛོམས་ཀྱིས“གྲོང་ཚོའི་མཉམ་སྡེབ་འཕེལ་རྒྱས་གཏོང་བའི་དམིགས་ཡུལ་ནི་ཡུལ་མི་ཚོར་ཕན་བདེ་བསྐྲུན་རྒྱུ་དེ་རེད། ཚང་མར་ཁ་ཡོད་ལག་ཡོད་ཀྱི་བྱ་བ་དངོས་དང་བྱ་བ་བཟང་པོ་བསྒྲུབས་ནས་གྲོང་ཚོ་ཡོངས་ལ་འཕེལ་རྒྱས་ཀྱི་གྲུབ་འབྲས་མཉམ་སྤྱོད་ཐུབ་པ་བྱ་རྒྱུ་དེ་ནི་འཕེལ་རྒྱས་གཏོང་བའི་དོན་སྙིང་རེད”ཅེས་བཤད།

དུས་རབས་གསར་པའི་རླབས་རྒྱུན་ཁྲོད་འགྲིམ་འགྲུལ་ལམ་མདོ་ཡིན་པའི་ཐའེ་ཀྲའོ་ཡིས་ལོ་རྒྱུས་ཀྱི་དྲན་ཤེས་ལ་བརྟེན་ནས། མི་རིགས་མཐུན་སྒྲིལ་འབྲེལ་ཐག་ཏུ་བྱེད་པ་དང་། དཔལ་འབྱོར་འཕེལ་རྒྱས་དམིགས་ཚད་དུ་བྱེད་པ། དམངས་འཚོའི་བདེ་སྐྱིད་རྩ་བར་འཛིན་པ་བཅས་བྱས་ཏེ་ཉམས་གྱུར་གསར་པར་བརྟེན་ནས་དར་རྒྱས་ཀྱི་བགྲོད་ལམ་ཡངས་པོར་སྐྱོད་བཞིན་མཆིས།