ཤིན་ཅང་དང་བོད་ལྗོངས་སྐོར་གྱི་གཏམ་འཆལ་ལ་དགག་པ་འདི་ལྟར་བརྒྱབ་འདུག《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས》དེ་ད་ལོའི་ཟླ་7ཚེས་1ཉིན་དངོས་སུ་ལག་ལེན་བསྟར་རྒྱུ་རེད།

《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས》དེ་ད་ལོའི་ཟླ་7ཚེས་1ཉིན་དངོས་སུ་ལག་ལེན་བསྟར་རྒྱུ་རེད།

རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང་གིས་ཟླ་6ཚེས་24ཉིན་གྱི་སྔ་དྲོར་གསར་འགྱུར་ཡོངས་བསྒྲགས་ཚོགས་འདུ་སྐོང་འཚོགས་བྱས་པ་དང་། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས》དང་རང་རྒྱལ་མི་རིགས་ལས་དོན་གྱི་འབྲེལ་ཡོད་གནས་ཚུལ་ངོ་སྤྲོད་བྱས་པ་མ་ཟད་གསར་འགོད་པའི་དྲི་བར་ལན་བཏབ་ཡོད།

འདི་ནི་ལོ་ངོ་30ལྷག་ཙམ་རིང་གི་ཀྲུང་དབྱང་ཆབ་སྲིད་ཅུས་ཀྱི་གྲོས་ཚོགས་ཐོག་ཞིབ་འཇུག་བྱས་པའི་ཁྲིམས་གཞི་ཐོག་མ་དེ་ཡིན།

མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་གཏན་འབེབས་བྱེད་པ་དེ་ནི་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་བཀོད་སྒྲིག་བྱས་པའི་ཆབ་སྲིད་ཀྱི་ལས་འགན་དང་ཁྲིམས་འཛུགས་ཀྱི་ལས་འགན་གལ་ཆེན་ཞིག་ཡིན། 2023ལོའི་ཟླ་8པར། ཏང་ཀྲུང་དབྱང་གིས་སྐབས་བཅུ་བཞི་པའི་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཁྲིམས་འཛུགས་འཆར་འགོད་ལ་ཆོག་མཆན་སྤྲད་ནས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་དེ་སྐབས་འདིའི་མི་དམངས་འཐུས་ཚོགས་ཀྱི་ཁྲིམས་འཛུགས་རྣམ་གྲངས་ནང་བཅུག་ཡོད། 2024ལོའི་ཟླ་7པར། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་ཐོག་མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་གཏན་འབེབས་བྱ་རྒྱུ་ཁ་གསལ་བཏོན་ཡོད། 2025ལོའི་ཟླ་8པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་དབྱང་ཆབ་སྲིད་ཅུས་ཀྱི་གྲོས་ཚོགས་གཙོ་སྐྱོང་གནང་ནས། མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་ཀྱི་འཆར་ཟིན་ལ་ཞིབ་འཇུག་བྱས་ཡོད། འདི་ནི་ལོ་ངོ་30ལྷག་ཙམ་རིང་ཀྲུང་དབྱང་ཆབ་སྲིད་ཅུས་ཀྱི་གྲོས་ཚོགས་ཐོག་ཞིབ་འཇུག་བྱས་པའི་ཁྲིམས་གཞི་ཐོག་མ་དེ་ཡིན། ཏང་ཀྲུང་དབྱང་གི་གཅིག་སྡུད་གཅིག་གྱུར་གྱི་འགོ་ཁྲིད་དེ་ཁྲིམས་འཛུགས་ཀྱི་རྣམ་གྲངས་འཛུགས་པ་དང་། འཆར་ཟིན་འགོད་པ། གྲོས་ཞིབ་བྱེད་པ་བཅས་ཀྱི་བརྒྱུད་རིམ་ཧྲིལ་པོར་ཁྱབ་ཡོད།

མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་ནི་ལོ་ངོ་30ལྷག་ཙམ་རིང་གླེང་གཞི་བཀོད་པའི་བཅའ་ཁྲིམས་ཐོག་མ་དེ་ཡིན།

མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་ནི་དུས་རབས་གསར་པར་རྩ་ཁྲིམས་ཀྱི་འབྲེལ་ཡོད་གཏན་འབེབས་ལག་ལེན་བསྟར་བ་དང་། མི་རིགས་བྱ་དོན་ཐག་གཅོད་བྱེད་པ། མི་རིགས་ལས་དོན་སྤེལ་བ་བཅས་ཀྱི་གཞི་རྩའི་བཅའ་ཁྲིམས་ཤིག་རེད། རྣམ་བཤད་དབྱེ་སྐབས་ཆེད་མངགས་གླེང་གཞི་བཟོས་ཡོད་པ་དང་། ལོ་ངོ་30ལྷག་ཙམ་རིང་གླེང་གཞི་བཀོད་པའི་བཅའ་ཁྲིམས་ཐོག་མ་དེ་ཡིན་པས། བཅའ་ཁྲིམས་དེའི་ཆབ་སྲིད་རང་བཞིན་དང་། རྩ་དོན་རང་བཞིན། གསལ་སྟོན་རང་བཞིན། ཁྲིད་སྟོན་རང་བཞིན་བཅས་མངོན་ཡོད།

2025ལོར་རང་སྐྱོང་ལྗོངས་ལྔའི་ས་ཁུལ་གྱི་ཐོན་སྐྱེད་སྤྱིའི་རིན་ཐང་སྒོར་དུང་ཕྱུར་ཁྲི་8.66ཟིན་པ།

2012ལོ་ནས་2025ལོའི་བར། ནང་སོག་དང་། ཀོང་ཞི། བོད་ལྗོངས། ཉིང་ཞ། ཤིན་ཅང་བཅས་རང་སྐྱོངས་ལྗོངས་ལྔའི་ས་ཁུལ་གྱི་ཐོན་སྐྱེད་སྤྱིའི་རིན་ཐང་སྒོར་དུང་ཕྱུར་ཁྲི་3.25ནས་སྒོར་དུང་ཕྱུར་ཁྲི་8.66བར་འཕར་བ་དང་། མི་རིགས་ཁག་གི་མི་དམངས་མཉམ་དུ་ཀྲུང་གོའི་རྣམ་པའི་དེང་རབས་ཅན་འཛུགས་སྐྲུན་གྱི་རྒྱང་ལམ་གསར་པར་བསྐྱོད་ཡོད།

ཤིན་ཅང་དུ“བཙན་ཤེད་ཀྱིས་ངལ་རྩོལ་བྱེད་དུ་འཇུག”གི་ཡོད་ཟེར་བར་ལན་ཆ་བྱས་པ།

གསར་འགོད་པས། ནུབ་ཕྱོགས་ཀྱི་སྨྱན་སྦྱོར་ཁག་གཅིག་གིས། ཀྲུང་གོས་ཤིན་ཅང་གི་གྲངས་ཉུང་མི་རིགས་ལ“བཙན་ཤེད་ཀྱིས་ངལ་རྩོལ་བྱེད་དུ་འཇུག”གི་ཡོད་ཟེར་བ་དང་། “བཙན་ཐབས་ཀྱིས་གནས་སྤོ་རུ་འཇུག”གི་ཡོད་ཟེར་བའི་གནས་ཚུལ་སྤེལ་ཡོད། འོན་ཀྱང་མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་ཀྱི་སྤེལ་རེས་དང་། འགྲོ་འོང་། མཉམ་འདྲེས་བཅས་ལ་སྐུལ་འདེད་གཏོང་བའི་དོན་ཚན་ནང་། ས་ཁོངས་ལས་བརྒལ་བའི་ལས་ཞུགས་དང་ལས་གཏོད་བྱེད་མཁན་སྤྱི་དམངས་ཀྱི་ཁྲིམས་མཐུན་ཁེ་དབང་ལ་འགན་ལེན་བྱ་རྒྱུ་ཁ་གསལ་བཀོད་ཡོད། འོ་ན་འདི་ལྟ་བུའི་མི་རིགས་ཁག་ཐུན་མོང་གོང་འཕེལ་ཡོང་བར་སྐུལ་འདེད་གཏོང་བའི་བྱ་ཐབས་དང“བཙན་ཤེད་ཀྱིས་ངལ་རྩོལ་བྱེད་དུ་འཇུག”གི་ཡོད་ཟེར་བའི་གཏམ་བཤད་ལ་དཔྱད་བརྗོད་གང་འདྲ་སྤེལ་ལམ། ཀྲུང་གོའི་ཁྲིམས་ལུགས་ཀྱིས་མི་རིགས་ཁག་གི་ངལ་རྩོལ་པའི་འགུལ་རྣམ་ལས་ཞུགས་ཁྲོད་ཀྱི་ཁྲིམས་མཐུན་ཁེ་དབང་ལ་ཇི་ལྟར་བྱས་ནས་བཙན་གནོད་མི་ཕོག་པ་བྱེད་ཀྱི་ཡོད་དམ་ཞེས་པའི་དྲི་བ་བཏོན་ཡོད།

ཀྲུང་དབྱང་འཐབ་ཕྱོགས་གཅིག་འགྱུར་པུའི་པུའུ་ཀྲང་གཞོན་པ། རྒྱལ་ཁབ་མི་རིགས་བྱ་དོན་ཨུ་ཡོན་ལྷན་ཁང་གི་ཀྲུའུ་རིན་ཁྲེན་རུས་ཧྥེང་གིས། མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་ནང་། ས་ཁོངས་ལས་བརྒལ་བའི་ལས་ཞུགས་དང་ལས་གཏོད་བྱེད་པའི་སྤྱི་དམངས་ཀྱི་ཁྲིམས་མཐུན་ཁེ་དབང་ལ་འགན་ལེན་བྱེད་དགོས་པ་ཁ་གསལ་བཏོན་ཡོད་ཅིང་། ཁྲིམས་ལུགས་ཀྱི་གཏན་འབེབས་འདི་དག་དོན་ཚན་ཉེར་ལྔ་པའི་ནང་གཅིག་བསྡུས་ཐོག་མངོན་པར་བྱས་ཡོད་པ་དང་། གཏན་འབེབས་འདི་ལྟ་བུ་བྱེད་པའི་དམིགས་ཡུལ་ནི་མི་རིགས་ཁག་གི་མང་ཚོགས་ཀྱི་འདྲ་མཉམ་གོང་འཕེལ་གྱི་ཁེ་དབང་ལ་སྲུང་སྐྱོང་དང་། འབབ་འཕར་གྱི་ཐབས་ལམ་རྒྱ་ཆེར་གཏོང་བ། མི་རིགས་ཁག་དབར་གྱི་འགྲོ་འོང་དང་། སྤེལ་རེས། མཉམ་འདྲེས་བཅས་ལ་སྐུལ་འདེད་གཏོང་བ་བཅས་ཡིན་པས། ཐོག་མཐའ་བར་གསུམ་དུ་རྦད་དེ་རང་མོས་དང་། ཕྱོགས་གཉིས་གདམ་ཁ། ཁྲིམས་མཐུན་ལུགས་མཐུན། འགྲོ་འོང་རང་མོས་བཅས་ཀྱི་ལྟེ་བའི་རྩ་དོན་རྒྱུན་འཁྱོངས་བྱས་ཡོད།

ཤིན་ཅང་གི་ངལ་རྩོལ་ནུས་ཤུགས་སྤོ་སྒྱུར་ལས་ཞུགས་བྱེད་པ་དེ་ནི་མི་རིགས་ཁག་གི་མང་ཚོགས་ཀྱི་འདོད་མོས་ལ་བརྩི་འཇོག་བྱེད་པའི་སྔོན་འགྲོའི་ཐོག་དོན་འཁྱོལ་བྱེད་པ་ཞིག་ཡིན་ཞིང་། དེའི་དམིགས་ཡུལ་ནི་མི་རིགས་ཁག་གི་མང་ཚོགས་རྣམས་ལ་ལས་ཞུགས་ཀྱི་གོ་སྐབས་མང་དུ་གཏོང་རོགས་དང་། དཔལ་འབྱོར་གྱི་ཡོང་འབབ་མཐོ་རུ་གཏོང་ཆེད་ཡིན་པས། དེ་ནི་རྦད་དེ་ཤིན་ཅང་གི་མང་ཚོགས་ཆེད་བྱ་བ་དངོས་སྒྲུབ་པ་དང་། བྱ་བ་བཟང་པོ་སྒྲུབ་པ་ཞིག་རེད། ཕྱིར་ལས་ཞུགས་བྱེད་པའི་ཤིན་ཅང་གི་མང་ཚོགས་ཆ་ཚང་ནི་ཁྱིམ་ཚང་གི་འཚོ་བ་ལེགས་སུ་གཏོང་བ་དང་། རང་སོའི་རྩལ་ནུས་མཐོ་རུ་གཏོང་ཆེད་མི་སྒེར་གྱི་འདོད་མོས་ལྟར་རང་བདག་ཐོ་འགོད་བྱས་པ་ཞིག་ཡིན་པ་ལས།“བཙན་ཐབས་ཀྱིས་གནས་སྤོ་བྱེད་དུ་འཇུག་པ”དང“བཙན་ཤེད་ཀྱིས་ངལ་རྩོལ་བྱེད་དུ་འཇུག་པ”ཟེར་བ་རྩ་བ་ནས་མེད། ཤོད་སྟངས་འདི་རིགས་ནི་ཁུངས་ལུང་གང་ཡང་མེད་པ་ཞིག་དང་ཧ་ཅང་དགོད་བྲོ་བ་ཞིག་རེད་ཅེས་བསྟན་ཡོད།

ཕྱི་རྒྱལ་གྱི་སྒྲིག་འཛུགས་ཀྱིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་བཟོ་བའི་དམིགས་ཡུལ་ནི“གྲངས་ཉུང་མི་རིགས་གཅིག་འདྲར་སྒྱུར་ཆེད་རེད”ཟེར་བར་ལན་ཆ་བྱས་པ།

གསར་འགོད་པས། ཉེ་དུས་ཕྱི་རྒྱལ་སྒྲིག་འཛུགས་ཀྱིས་གསལ་བསྒྲགས་སྤེལ་ནས། མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་ཀྱི་དམིགས་ཡུལ་ནི། “གྲངས་ཉུང་མི་རིགས་གཅིག་འདྲར་སྒྱུར་ཆེད་རེད”ཅེས་བརྗོད་ནས། ཀྲུང་གོར་འགྲོ་བ་མིའི་ཐོབ་ཐང་ཐད་ཀྱི་བཀག་སྡོམ་ལག་བསྟར་བྱ་རྒྱུའི་འབོད་སྐུལ་བྱས་ཡོད། ཤོད་སྟངས་འདི་ལྟ་བུར་ལྟ་སྟངས་གང་འདྲ་འཛིན་གྱི་ཡོད་དམ་ཞེས་དྲིས་པར།

རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན། རྒྱལ་ཡོངས་མི་དམངས་འཐུས་ཚོགས་མི་རིགས་བྱ་དོན་ཨུ་ཡོན་ལྷན་ཁང་གི་ཀྲུའུ་རེན་ཨུ་ཡོན་པ་དབྱིན་ཁྲའོ་ལུའུ་ཡིས། བཅའ་ཁྲིམས་དེར་གྲོས་འཆམ་བྱུང་རྗེས། རྒྱལ་ཡོངས་མི་རིགས་ཁག་གི་མི་དམངས་ཀྱི་ཚད་མཐོའི་ཁས་ལེན་ཐོབ་པ་དང་བློ་བརྟན་འགྱུར་མེད་ངང་རྒྱབ་སྐྱོར་བྱེད་བཞིན་ཡོད། འོན་ཀྱང་ནུབ་ཕྱོགས་ཀྱི་ཚན་པ་དང་མངའ་ཁོངས་ཕྱི་རོལ་གྱི་སྟོབས་ཤུགས་ཁག་གཅིག་གིས་སྔར་བཞིན་མི་རིགས་གནད་དོན་ཐད་ཀྲུང་གོའི་འགྲོ་བ་མིའི་ཐོབ་ཐང་གི་གནས་ཚུལ་ལ་དམའ་འབེབས་གཏོང་བ་དང་། འཆལ་གཏམ་ཁྱབ་སྤེལ་བྱེད་པ། ཀྲུང་གོར་ཤེས་རྟོགས་མེད་པ་དང་ཕྱོགས་ཞེན་ལྟ་ཚུལ་གྱིས་ཁེངས་ཡོད། འབྲེལ་ཡོད་སྒྲིག་འཛུགས་ཀྱིས་སྤེལ་བའི་གསལ་བསྒྲགས་ཟེར་བ་དེས་རང་རྒྱལ་གྱི་མི་རིགས་ས་ཁུལ་དང་མི་རིགས་ལས་དོན་ལ་ཐོབ་པའི་གྲུབ་འབྲས་ཆེན་པོ་སྣང་མེད་དུ་འཇོག་པ་དང་། ཀྲུང་གོའི་མི་རིགས་སྲིད་ཇུས་དང་ཁྲིམས་སྐྱོང་འཛུགས་སྐྱོང་ལ་ཇུས་མེད་ཇུས་གཏོགས་དང་དོན་མེད་སྐྱོན་འཛུགས་བྱས་པ་དེ་ནི་ཀྲུང་གོའི་ནང་སྲིད་ལ་རྩུབ་སྤྱོད་ངང་ཐེ་ཇུས་བྱས་པ་ཞིག་ཡིན་པས། ང་ཚོས་དེར་ངོ་རྒོལ་མཐའ་གཅིག་ཏུ་བྱ་རྒྱུ་ཡིན།

འདི་གར་ངས་ཕྱོགས་གཉིས་ཀྱི་ཐད་ནས་དཔེར་བརྗོད་འཇོག་རྒྱུ་ཡིན། གཅིག་ནི་དཔལ་འབྱོར་ཐད། རྒྱལ་ཡོངས་མི་རིགས་རང་སྐྱོང་ས་གནས་ཀྱི་དབུལ་ཕོངས་རྫོང་420དང་། རང་སྐྱོང་ལྗོངས་5 ཀུའེ་ཀྲོའུ། ཡུན་ནན། མཚོ་སྔོན་བཅས་ཀྱི་དབུལ་ཕོངས་མི་འབོར་ཁྲི་3121ཚང་མ་དུས་བཀག་ལྟར་དབུལ་སྒྲོལ་ཐུབ་པ་དང་། གྲངས་ཉུང་མི་རིགས་དང་མི་རིགས་ས་ཁུལ་གྱིས་རྒྱལ་ཡོངས་དང་མཉམ་དུ་འབྱོར་འབྲིང་སྤྱི་ཚོགས་སྒོ་ཀུན་ནས་འཛུགས་སྐྲུན་ཐུབ་པར་བྱས་ཡོད། དབུལ་སྒྲོལ་འགག་གཏོར་ལམ་བུའི་ཐོག་དང་འབྱོར་འབྲིང་སྤྱི་ཚོགས་སྒོ་ཀུན་ནས་འཛུགས་སྐྲུན་བྱེད་པའི་ཐད་ང་ཚོའི་མི་རིགས་གཅིག་ཀྱང་རྗེས་སུ་ལུས་མེད་ལ་མི་གཅིག་ཀྱང་ལུས་མེད། ད་ལྟ་ཀྲུང་གོའི་རྣམ་པའི་དེང་རབས་ཅན་གྱི་འཛུགས་སྐྲུན་ལ་སྐུལ་འདེད་གཏོང་སྐབས་ཀྱང་མི་རིགས་གཅིག་ཀྱང་ལུས་མི་རུང་ལ་མི་གཅིག་ཀྱང་ལུས་མི་རུང་། གྲུབ་འབྲས་དེ་ལྟ་བུ་ནི་རྒྱལ་ཁབ་གང་ཞིག་དང་སྲིད་ཏང་ཅི་ཞིག་གིས་སྒྲུབ་ཐུབ་བམ། ལྷག་པར་དུ་མི་རིགས་ས་ཁུལ་གྱི་སློབ་གསོ་དང་། སྨན་བཅོས། འགྲིམ་འགྲུལ། ཆུ་གློག་སོགས་གཞི་རྩའི་སྤྱི་པའི་ཞབས་ཞུ་དང་རྨང་གཞིའི་སྒྲིག་བཀོད་འཛུགས་སྐྲུན་སྔར་ལས་འཐུས་སྒོ་ཚང་བ་དང་། ཐག་རིང་ལུང་ཁུག་གི་ས་གནས་དང་མཐའ་མཚམས་ས་ཁུལ་ཚུད་པའི་ས་ཆ་ཚང་མར་ཆ་འཕྲིན་དྲ་རྒྱ་ཁྱབ་ཡོད་པས། གྲུབ་འབྲས་འདི་དག་ཚང་མ་ཀུན་གྱིས་མཐོང་ཆོས་སུ་གྱུར་ཡོད། ཚང་མས་མང་ཙམ་འགྲོ་བ་དང་། མང་ཙམ་བལྟ་དགོས།  མིག་གིས་མཐོང་བའི་བདེན་པ་དང་། དོན་དངོས་རྨང་གཞིར་བྱེད་དགོས། ཡང་དཔེར་ན། རིག་གནས་ཐད། རྒྱལ་ཁབ་ཀྱིས་མ་དངུལ་འབོར་ཆེན་བཏང་ནས་ཕོ་བྲང་པོ་ཏ་ལ་དང་། གཙུག་ལག་ཁང་། ནོར་བུ་གླིང་ཁ་སོགས་རིག་གནས་ཤུལ་བཞག་འབོར་ཆེན་ཞིག་ལ་སྲུང་སྐྱོང་བྱས་ཡོད་པ་དང་། རྒྱ་ཡིག་དང་ཡུ་གུར་ཡི་གེའི་ཐོག་ནས་རྒྱུན་ཆད་ལ་ཉེ་བའི《བདེ་སྐྱིད་ཀྱི་བློ་གྲོས》ཞེས་པ་དང《དྲུ་གུའི་ཡི་གེའི་ཚིག་མཛོད་ཆེན་མོ》ཞེས་པ་སོགས་གནའ་དཔེ་ཡིག་སྒྱུར་དང་། ལེགས་སྒྲིག དཔེ་སྐྲུན་བཅས་བྱས་ཤིང་། རྩ་ཆེའི་རིག་དངོས་3000ལྷག་ཙམ་ལ་མྱུར་སྐྱོབ་རང་བཞིན་གྱི་སྲུང་སྐྱོབ་དང་ཉམས་གསོ་བྱས་ཡོད། མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་སྒྲིག་འཛུགས་ཀྱི་མངོན་མིན་རིག་གནས་ཤུལ་བཞག་གི་མིང་ཐོའི་ནང་བཅུག་པའི་ཀྲུང་གོའི་རྣམ་གྲངས་45ཡི་ནང་གྲངས་ཉུང་མི་རིགས་ཀྱི་རིག་གནས་དང་འབྲེལ་བ་ཡོད་པ་གསུམ་ཆ་གཅིག་ལས་བརྒལ་ཡོད། ལོ་རྒྱུས་དང་དོན་དངོས་དེ་དག་གིས་ཀྱང་ཀྲུང་གོའི་ཁྱད་ཆོས་ལྡན་པའི་མི་རིགས་གནད་དོན་ཐག་གཅོད་བྱེད་པའི་བགྲོད་ལམ་ནི་རྦད་དེ་ཡང་དག་པ་ཡིན་པ་ར་སྤྲོད་གང་ལེགས་ཐུབ་ཡོད་ཅེས་གསུངས་ཡོད།

བོད་ལྗོངས་ཀྱི་ཞག་སྡོད་སློབ་གྲྭར“བཙན་ཐབས་ཀྱིས་གཅིག་འདྲར་སྒྱུར་བ”དང་། “བཙན་ཤེད་ཀྱིས་ཞག་སྡོད་བྱེད་དུ་འཇུག་པ” “འགྲོ་བ་མིའི་ཐོབ་ཐང་ལ་བཙན་གནོད་བྱེད་པ”ཟེར་བ་བཅས་ཀྱི་ཤོད་སྟངས་ལ་ལན་ཆ་བྱས་པ།

གསར་འགོད་པས། ཕྱི་རྒྱལ་གྱི་སྨྱན་སྦྱོར་འགའ་ཤས་ཀྱིས་བོད་ལྗོངས་ཀྱི་ཞག་སྡོད་སློབ་གྲྭར“བཙན་ཐབས་ཀྱིས་གཅིག་འདྲར་སྒྱུར་བ”དང་།  “བཙན་ཤེད་ཀྱིས་ཞག་སྡོད་བྱེད་དུ་འཇུག་པ” “འགྲོ་བ་མིའི་ཐོབ་ཐང་ལ་བཙན་གནོད་བྱེད་པ”བཅས་ཟེར་གྱི་ཡོད་པས། སློབ་གསོའི་རོགས་སྐྱོར་བྱེད་ཐབས་དང“བཙན་ཐབས་ཀྱིས་གཅིག་འདྲར་སྒྱུར་བ”ཟེར་བའི་གཏམ་བརྗོད་དེ་རིགས་ལ་དཔྱད་གླེང་གང་འདྲ་ཞིག་སྤེལ་རྒྱུ་ཡིན། ཀྲུང་གོས་བོད་ལྗོངས་སུ་ཞག་སྡོད་སློབ་གྲྭ་བཙུགས་པའི་རྒྱུ་མཚན་གང་ཡིན་པ་དང་དེར་ཕན་འབྲས་གང་འདྲ་ཐོན་ཡོད། མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་ཀྱིས་མི་རིགས་ཁག་གི་མང་ཚོགས་ནས་སློབ་གསོ་མྱོང་བའི་ཁེ་དབང་ལ་འགན་སྲུང་གང་འདྲ་བྱེད་ཀྱི་ཡོད་དམ་ཅེས་དྲི་བ་བཏོན་པར།

ཀྲུང་དབྱང་འཐབ་ཕྱོགས་གཅིག་གྱུར་པུའི་པུའུ་ཀྲང་གཞོན་པ་ཏོན་དབྱི་ཅུན་གྱིས། གོང་དུ་གསར་འགོད་པ་ཁོང་གིས་གླེང་བའི་ཕྱི་རྒྱལ་སྨྱན་སྦྱོར་གྱིས་སྤེལ་བའི་གསར་འགྱུར་དེ་དག་ནི་དོན་དངོས་གནས་ཚུལ་དང་ཡོངས་སུ་མི་མཐུན་པ་ཞིག་རེད།

གཅིག་ནས། ཞག་སྡོད་ལམ་ལུགས་ཀྱི་ཐོག་ནས་ཀྲུང་གོས་མི་རིགས་འདྲ་མཉམ་དང་སློབ་གསོ་འདྲ་མཉམ་གྱི་འདུ་ཤེས་རྒྱུན་འཁྱོངས་བྱེད་པ་ཏག་ཏག་མངོན་ཡོད། ཀྲུང་གོའི་འོས་འགན་སློབ་གསོའི་བཅའ་ཁྲིམས་ནང་། རྫོང་རིམ་པའི་མི་དམངས་སྲིད་གཞུང་གིས་དགོས་མཁོར་བསྟུན་ནས་ཞག་སྡོད་ལམ་ལུགས་ཀྱི་སློབ་གྲྭ་བཙུགས་ཡོད་ཅིང་། ཁྲིམས་ལུགས་དོན་ཚན་དེའི་ནང་ད་དུང་ཞག་སྡོད་ལམ་ལུགས་ཀྱི་སློབ་གྲྭ་འཛུགས་པའི་དམིགས་ཡུལ་ནི། སྡོད་གནས་ཁ་ཐོར་ཡིན་པའི་སློབ་ལོ་ལོན་པའི་བྱིས་པ་དང་ན་ཆུང་གིས་སློབ་གྲྭར་ཞུགས་ནས་འོས་འགན་སློབ་གསོ་དང་ལེན་བྱེད་པར་འགན་སྲུང་བྱ་ཆེད་ཡིན་པ་ནན་སྟོན་བྱས་ཡོད། དེ་ནི་ཀྲུང་གོ་སྲིད་གཞུང་གིས་ཞིབ་ཕྲའི་རྒྱལ་ཚུལ་ལ་གཞིགས་ཏེ། དམིགས་བསལ་གྱི་མི་རིགས་རང་ག་བ་ཞིག་མིན་པར། རང་རྒྱལ་གྱི་མི་རིགས་ཁག་ཚང་མས་འདྲ་མཉམ་སློབ་གསོའི་དབང་ཆ་ལོངས་སུ་སྤྱོད་པར་འགན་ལེན་བྱ་ཆེད་བཏོན་པའི་སྲིད་ཇུས་ཤིག་ཡིན།

གཉིས་ནས། ཀྲུང་གོའི་ཞག་སྡོད་ལམ་ལུགས་ནི་སློབ་གྲྭས་སློབ་མར་སྡོད་གནས་དང་ཟ་མ་སོགས་ཀྱི་འགན་ལེན་ཞབས་ཞུ་མཁོ་འདོན་བྱེད་པ་ལས་སྒོ་བཀག་རྣམ་པའི་སློབ་གྲྭ་མིན་ལ། དམག་དོན་ཅན་གྱི་དོ་དམ་དེ་བས་ཀྱང་མིན། སློབ་མ་ཞག་སྡོད་བྱེད་མིན་ནི་སློབ་མ་རང་ཉིད་དང་ཁྱིམ་བདག་གིས་རང་ཉིད་ཀྱི་ཁྱིམ་ཚང་དང་སློབ་གསོའི་དགོས་མཁོར་གཞིགས་ནས་རང་མོས་ཀྱིས་གདམ་ག་བྱེད་ཆོག་གི་ཡོད། དོན་དངོས་ཐོག་ཞག་སྡོད་སློབ་མའི་གྲངས་འབོར་ཡང་གཏན་ཁེལ་བྱས་པ་ཞིག་མིན་པས། མི་སྒེར་གྱི་དགོས་མཁོར་གཞིགས་ནས་གདམ་ག་བྱེད་ཆོག སློབ་མ་ལ་ལ་ཞག་སྡོད་ནས་འགྲོ་སྦྱོང་བྱེད་པར་བསྒྱུར་བ་དང་། སློབ་མ་ལ་ལ་འགྲོ་སྦྱོང་ནས་ཞག་སྡོད་བྱེད་པར་བསྒྱུར་བ་ནི་རྦད་དེ་སློབ་མ་དང་ཁྱིམ་བདག་རང་ཉིད་ཀྱི་གདམ་གར་རག་ལུས་ཡོད། ཞག་སྡོད་སློབ་མ་རྣམས་གཟའ་མཇུག་དང་། དུས་ཆེན་དང་གུང་གསེང་། དགུན་གསེང་དང་དབྱར་གསེང་བཅས་ཚང་མར་ཁྱིམ་དུ་ལོག་ཆོག་པ་དང་། ཁྱིམ་བདག་གིས་ཀྱང་དུས་དང་རྣམ་པ་ཀུན་ཏུ་སློབ་གྲྭར་རང་གི་ཕྲུ་གུར་བལྟ་རུ་ཡོང་ཆོག་པ་མ་ཟད། དགོས་མཁོ་ལྟར་དུས་དང་རྣམ་པ་ཀུན་ཏུ་ཕྲུ་གུ་ཁྱིམ་དུ་བསུས་ཆོག

གསུམ་ནས། སྲིད་ཇུས་ལག་བསྟར་བྱས་པའི་ཕན་འབྲས་ཐོག་ནས་བལྟས་ན། བོད་ལྗོངས་ཀྱི་ཞིང་འབྲོག་མང་ཚོགས་ཀྱིས་བུ་ཕྲུག་ཞག་སྡོད་ལམ་ལུགས་ཀྱི་སློབ་གྲྭར་སྐྱེལ་འདོད་ཧ་ཅང་ཆེན་པོ་བྱེད་ཀྱི་ཡོད། ཚང་མས་ཤེས་གསལ་ལྟར། བོད་རང་སྐྱོང་ལྗོངས་ཀྱི་ས་ཁོངས་རྒྱ་ཆེ་ལ་སྡོད་གནས་ཧ་ཅང་ཁ་ཐོར་ཡིན་པས། ཞིང་འབྲོག་མང་ཚོགས་ཀྱིས་བུ་ཕྲུག་སློབ་གྲྭར་སྐྱེལ་བའི་མ་གནས་ཧ་ཅང་མཐོ་བ་དང་ཁྱིམ་བདག་གིས་ཕྲུ་གུ་སློབ་གྲྭར་བསུ་སྐྱེལ་བྱེད་པའི་ཁུར་པོ་ཧ་ཅང་ལྗིད་པོ་ཡོད། ས་མཐོའི་མི་རིགས་ཁག་གི་བྱིས་པར་སྤུས་ཚད་མཐོ་བའི་སློབ་གསོ་འདྲ་མཉམ་ངང་ལོངས་སྤྱོད་བྱེད་པའི་དབང་ཆར་འགན་སྲུང་བྱེད་པ་དང་མང་ཚོགས་ཀྱི་འདོད་བློ་དང་བསྟུན་ཆེད། སྲིད་གཞུང་གིས་ཞིང་འབྲོག་ཁུལ་ཁག་གཅིག་ཏུ་ཞག་སྡོད་ལམ་ལུགས་ལག་ལེན་བསྟར་ནས་སློབ་མར་བདེ་འཇགས་དང་སྟབས་བདེའི་ཆ་རྐྱེན་དེ་བས་ལེགས་པ་བསྐྲུན་ཏེ། ཁྱིམ་བདག་དང་སློབ་མའི་དགོས་མཁོ་སྐོང་ཐུབ་པ་བྱེད་བཞིན་ཡོད།