ཀྲུང་གོའི་ཁེ་ལས་སྟོབས་ཆེན་500ཡི་ལས་གཉེར་ཡོང་འབབ་སྒོར་དུང་ཕྱུར་ཁྲི་108ལྷག་ཙམ་ཟིན་པ།

   2023ལོའི་ཀྲུང་གོའི་ཁེ་ལས་སྟོབས་ཆེན་500ཡི་ལས་གཉེར་ཡོང་འབབ་ཀྱི་བསྡོམས་འབོར་སྒོར་དུང་ཕྱུར་ཁྲི་108.36ཟིན་ནས་ལོ་གོང་མ་ལས་5.74%འཕར་བ་དང་། རྒྱུ་ནོར་གྱི་བསྡོམས་འབོར་སྒོར་དུང་ཕྱུར་ཁྲི་399.77ཟིན་ཏེ་ལོ་གོང་མ་ལས་སྒོར་དུང་ཕྱུར་ཁྲི་27.24འཕར་བ་དང་7.31%འཕར་ཡོད།

  ཚེས་20ཉིན། ཀྲུང་གོ་ཁེ་ལས་མཉམ་འབྲེལ་ལྷན་ཚོགས་དང་ཀྲུང་གོ་ཁེ་ལས་མཁས་ཅན་མཐུན་ཚོགས་ཀྱིས་ཨན་ཧུའེ་ཧོ་ཧྥེར་2023ལོའི་ཀྲུང་གོའི་ཁེ་ལས་སྟོབས་ཆེན་500ཡི་བང་རིམ་ཁྱབ་བསྒྲགས་བྱས་པ་རེད། བང་རིམ་ནང་2022ལོའི་ཁེ་ལས་ཀྱི་ལས་གཉེར་ཡོང་འབབ་དེ་གྲལ་ཚུད་ཀྱི་ཚད་གཞིར་བརྩིས་པས་བཟོ་སྐྲུན་ལས་རིགས་ཀྱི་ཁེ་ལས་264བང་རིམ་ནང་ཚུད་པ་དང་ལོ་གོང་མ་ལས་8མང་དུ་ཕྱིན་ཡོད་ལ། ལོ་གསུམ་བསྟུད་མར་འཕར་ཡོད། བང་རིམ་ནང་འདི་ལོའི“ཁེ་ལས་སྟོབས་ཆེན་500”ཡི་གཞི་ཁྱོན་མུ་མཐུད་འཕར་ཚུལ་རྒྱུན་འཁྱོངས་ཐུབ་པ་སྟེ། ལས་གཉེར་ཡོང་འབབ་ཀྱི་བསྡོམས་འབོར་སྒོར་དུང་ཕྱུར་ཁྲི་108.36ཟིན་ནས་ལོ་གོང་མའི“ཁེ་ལས་སྟོབས་ཆེན་500”ལས་5.74%འཕར་བ་དང་། རྒྱུ་ནོར་གྱི་བསྡོམས་འབོར་སྒོར་དུང་ཕྱུར་ཁྲི་399.77ཟིན་ཏེ་ལོ་གོང་མའི“ཁེ་ལས་སྟོབས་ཆེན་500”ལས་སྒོར་དུང་ཕྱུར་ཁྲི་27.24འཕར་བ་དང་7.31%འཕར་ཡོད། གྲལ་ཚུད་ཚད་གཞི་ལོ་21བསྟུད་མར་མཐོ་རུ་བཏང་ཞིང་། འདི་ལོའི“ཁེ་ལས་སྟོབས་ཆེན་500”ཡི་གྲལ་སུ་ཚུད་པའི་ཚད་གཞི་སྒོར་དུང་ཕྱུར་469.98ཡིན་པ་དང་དེ་ལོ་གོང་མ་ལས་སྒོར་དུང་ཕྱུར་23.73མང་དུ་བཏང་ཡོད།

  དུང་ཕྱུར་སྟོང་རིམ་པའི་ཁེ་ལས་ཀྱི་གྲངས་འབོར་ཐོག་མར་ཕྱེད་ཀ་ལས་བརྒལ་བ། “ཁེ་ལས་སྟོབས་ཆེན་500”ཡི་ལས་གཉེར་ཡོང་འབབ་སྒོར་དུང་ཕྱུར་1000ལས་བརྒལ་བའི་ཁེ་ལས་ཀྱི་གྲངས་འབོར་254བར་མང་དུ་ཕྱིན་པ་དང་ཁྱོན་བསྡོམས་ཁེ་ལས་10མང་དུ་ཕྱིན་ཡོད། དེའི་ནང་ཁེ་ལས་16གི་ལས་གཉེར་ཡོང་འབབ་སྒོར་དུང་ཕྱུར་ཁྲི་1ལས་བརྒལ་ཡོད།

  ཞིབ་འཇུག་གསར་སྤེལ་ལ་མ་དངུལ་གཏོང་ཤུགས་དང་ཞིབ་འཇུག་གསར་སྤེལ་བྱེད་ཤུགས་རྒྱུན་མཐུད་ངང་ཆེ་རུ་ཕྱིན་ཡོད། “ཁེ་ལས་སྟོབས་ཆེན་500”ཡིས་ཞིབ་འཇུག་གསར་སྤེལ་ཐད་ཁྱོན་མ་དངུལ་སྒོར་དུང་ཕྱུར་15786.88བཏང་བ་དེ་ལོ་གོང་མ་ལས་སྒོར་དུང་ཕྱུར་1312.21མང་དུ་ཕྱིན་པ་དང་འཕར་ཚད་9.07%ཟིན་ཡོད། ཆ་སྙོམས་ཀྱི་ཞིབ་འཇུག་གསར་སྤེལ་བྱེད་ཤུགས་རྒྱུན་མཐུད་ངང་ཆེ་རུ་འགྲོ་ཚུལ་མངོན་པ་དེས་1.85%ཡི་ཟིན་ཐོ་གསར་པ་བཏོད་ཅིང་། ལོ་གོང་མའི“ཁེ་ལས་སྟོབས་ཆེན་500”དང་བསྡུར་ན་བརྒྱ་ཆའི་གྲངས་0.04མཐོ་རུ་ཕྱིན་ཡོད།

  ཁེ་བེད་བདག་ཐོབ་ཀྱི་གྲངས་འབོར་དང་སྤུས་ཚད་རྒྱུན་མཐུད་མཐོ་རུ་ཕྱིན་ཞིང་། “ཁེ་ལས་སྟོབས་ཆེན་500”ཡིས་ཁེ་བེད་བདག་ཐོབ་འདུན་ཞུ་བྱས་པའི་སྤྱི་འབོར་ཁྲི་188.53ཟིན་པ་དང་། ཁེ་བེད་བདག་ཐོབ་ཀྱི་འདུན་ཞུའི་གྲངས་འབོར་ལོ་གོང་མ་ལས་ཁག་ཁྲི་21.73འཕར་བ་དང་13.03%འཕར་ཡོད། དེའི་ནང་གསར་གཏོད་ཁེ་བེད་བདག་ཐོབ་འདུན་ཞུ་བྱས་པའི་གྲངས་འབོར་ཁག་ཁྲི་74.34ཟིན་པ་དེ་ལོ་གོང་མ་ལས་10.48%འཕར་ཡོད། གསར་གཏོད་ཁེ་བེད་བདག་ཐོབ་ཀྱི་གྲངས་འབོར་ལོ་5བསྟུད་མར་འཕར་ནས་ཁེ་བེད་བདག་ཐོབ་ཀྱི་གྲངས་འབོར་གྱི་བསྡུར་ཚད་39.43%ཟིན་ཡོད།

ཚད་གཞི་བཟོ་བའི་ནང་ཞུགས་ཚད་མང་དུ་ཕྱིན་ཞིང་། “ཁེ་ལས་སྟོབས་ཆེན་500”ཡིས་འདུན་ཞུ་བྱས་པ་དང་ཚད་གཞི་བཟོ་བའི་ནང་ཞུགས་པའི་ཁག་གྲངས་ཁྱོན་75110ཟིན་པ་དེ་ལོ་གོང་མའི“ཁེ་ལས་སྟོབས་ཆེན་500”ཡིས་འདུན་ཞུ་བྱས་པའི་གྲངས་ལས་ཁག་171མང་དུ་ཕྱིན་པ་དང་ཁེ་ལས་ཀྱིས་འདུན་ཞུ་བྱས་པ་དང་ཚད་གཞི་བཟོ་བའི་ནང་ཞུགས་པའི་གྲངས་གཞི་བསྟུད་མར་ཐེངས་4འཕར་ཡོད། རྒྱལ་སྤྱིའི་ཚད་གཞི་བཟོ་བའི་ནང་ཧུར་ཐག་ཞུགས་ཏེ་ཁེ་ལས་ཀྱིས་རྒྱལ་སྤྱིའི་ཚད་གཞི་ཁག་4992བཟོ་བར་ཞུགས་རྒྱུའི་འདུན་ཞུ་བྱས་ཡོད།

  མི་རེའི་ཆ་སྙོམས་ཀྱི་ལས་གཉེར་ཡོང་འབབ་རྒྱུན་མཐུད་ངང་འཕར་ཞིང་། “ཁེ་ལས་སྟོབས་ཆེན་500”ཡི་མི་རེའི་ཆ་སྙོམས་ལས་གཉེར་ཡོང་འབབ་སྒོར་ཁྲི་330.22ཟིན་པ་དེ་ལོ་གོང་མ་ལས་སྒོར་ཁྲི་14.26མང་དུ་ཕྱིན་ཡོད།