文学作品རང་མོས་སྙན་ངག

རང་མོས་སྙན་ངག

ལུས་རྩལ་པ་ཆོས་དབྱིངས་སྐྱིད།

                            ——འགོ་མཁའ་ཁྱབ་རྡོ་རྗེ།

ང་ཚོས་ཅུང་གྲགས་ཆེ་ན་བསྟོད་དྲག་ལ།

དམའ་སར་ཡོད་ན་མཐོང་ཆུང་བྱེད་སྲིད།

གང་ལྟར།

ཁྱེད་ཀྱི་རྔུལ་ཆུ་ལས་བསྐྲུན་པའི་གཟེངས་རྟགས།

རྒྱལ་སྤྱི་ལ་བཞག་པའི་བག་ཆགས།

བོད་རིགས་ལ་བཞག་པའི་ང་རྒྱལ།

བློ་སྤོབས་ལས་འཁྲུངས་བའི་ཕུགས་བསམ་གྱི་མེ་ཏོག

མི་རིགས་ཞིག་གི་སློབ་སྦྱོང་བྱེད་ཡུལ་ཡིན་ལ།

འགྱུར་མེད་ཆོད་སེམས་ཀྱི་ཀ་བ་བཞིན།

གྲུབ་འབྲས་ཀྱི་ས་བོན་རྒྱས།

གར་སྟེགས་སྟེང་།

ཁྱེད་ཀྱི་ལང་ཚོ་ལས་བསྐྲུན་པའི་དཀའ་སྡུག

ལུས་རྩལ་ལ་གཏད་པའི་བདེན་པ།

ཕུགས་བསམ་ལ་སྙེགས་པའི་དམིགས་འདུན།

ལ་རྒྱ་ཡི་ཟེགས་མ་མཁའ་རུ་འཕྱོ་སོང་།

མིག་ཆུ།

ཁྱེད་ཀྱི་མིག་ཆུ་ཡིན་ལ།

ང་ཚོའི་མིག་ཆུ་ཡང་ཡིན།

དེ་རིང་།

གཟི་བྱིན་གྱིས་ར་སྤྲོད་བྱེད་ཐུབ་པས།

ངས་གངས་ལྷ་མེ་ཏོག་ཅིག་གི་ཚབ་ཏུ།

དབྱངས་གསལ་གྱི་ཚིག་འབྲུ་བདའ་ནས།

ཁྱེད་ལ་བསྟོད་བསྔགས་བྱེད་ན་འདོད།

ངའི་སེམས་ཀྱི་བསྙེག་བྱ།

               ཆོས་འཛོམས་སྒྲོལ་མ།

ང་ལ་སེམས་ཀྱི་བརྟན་ས་ཆོས་དང་དད་པ་ཡོད།

ཕ་གཞིས་དྲོན་མོ་ཞིག་གི་བརྩེ་བ་ཡོད།

རྒྱུ་མཚན་དེའི་གནད་ཀྱིས།

ཕ་ཡུལ་ནས་ལམ་ལ་ཆས་པ་ནས་མགོ་བརྩམས་ཏེ།

ངས་རང་ལ་འགྱུར་མེད་ཀྱི་དམ་བཅའ་ཞིག་བཞག་ཡོད།

ཕྱིའི་འཇིག་རྟེན་གྱི་མཛེས་སྡུག་གིས་བདག་བློ་གུག་པ་མང་ཡང་།

ངའི་སེམས་ཀྱི་བསྙེག་བྱ་དེ་ཉི་མའི་བཀྲག་མདངས་མིན།

སྐར་ཚོགས་ཁྲོད་ཀྱི་རྒྱུ་སྐར་རྒྱལ་བོ་ལྟ་བུའི་གོ་གནས་མིན།

དུས་ཀྱི་རྒས་པ་ཡོད་པའི་ལང་ཚོའི་དཔལ་ཡོན་མིན།

བཅོས་མའི་ངོ་བསྟོད་དང་ཁས་ལེན་མིན།

ངའི་སེམས་ཀྱི་བསྙེག་བྱ་ནི།

དབྱངས་གསལ་སོ་བཞིའི་ཤ་རུས་ལ་བརྟེན་ནས།

མི་ཡུལ་གྱི་མཛེས་སྡུག་ཡི་གེར་ཕབ་ན་བསམ།

རང་རེའི་གསེར་ཞུན་གྱིས་བྱུགས་འདྲའི་ཐ་སྙད་ཀྱི་ཚོགས་དེ།

ཡངས་པའི་མཁའ་རུ་འོད་ཆེམ་ཆེམ་གྱིས་འཆར་ན་བསམ།

མེས་པོས་གནང་བའི་རིག་པའི་གཞུང་ལུགས་ལ།

སྙིང་གི་གུར་ཁྱིམ་ནས་ཕེབས་བསུ་བྱེད་ན་བསམ།

འོ་མའི་མདངས་འདྲའི་གཤིས་འཇམ་དྭངས་གཙང་གི་ཐུགས་རྒྱུད་དེ།

མི་ཚེའི་ཚེ་ནོམ་དང་རིན་ཐང་ཐམས་ཅད་ཀྱི་རྩ་བར་འདྲེན་ན་འདོད།

                  བོད་སྐད་ཡིག

                                    སྒྲོལ་དཀར་དབང་མོ།

སྤྱི་ཚོགས་ཀྱི་འཕེལ་འགྱུར་དང་དུས་རབས་ཀྱི་གོམ་འགྲོས།

རང་རིགས་ཀྱི་འདུན་པ་ཞན་མོས།

བོད་ཡིག་གི་ཚེ་སྲོག་ཉིན་བཞིན་མར་འགྲིབ་པའི་དུས་ཚོད་དམིགས་བསལ་ཞིག་ཏུ་འགྱུར།

ཕ་སྐད་མ་ཡིག་འགག་ཕྲེང་དོག་མོར་གནས།

ལ་ལས་བཤད་རྒྱུར།

བོད་སྐད་ཡིག་བཤད་ལོས་དགོས། དེ་ནི་མི་རིགས་ཀྱི་སྲོག་རྩ་རེད།

ཡང་སྐབས་རེར་དགོས་མཁོ་དང་བསྟུན་ཏེ་གཞན་སྐད་བཤད་ན་གནོད་པ་ཅི་ཞིག་ཡོད་ཨང་སྙམ།

རེད།ངོ་མ་རེད།བཤད་ཆོག་ཆོག་རེད།ཡིན་ན་ཡང་།འདི་ལྟར་བྱས་ནས་རྩ་བ་བོར་བ་ག་ལ་མིན།

ཕ་སྐད་ལ་དུང་སྣང་གི་གཏམ་འབྲུག་སྒྲ་ལྟར་བསྒྲགས་ཁུལ་བྱེད་ཀྱང་།

དོན་དུ་ཁ་བཤད་ཆུ་ཡི་ལྦུ་བ།།ལག་ལེན་གསེར་གྱི་ཐིགས་པར་གྱུར།

ང་ཚོས་ལྟེ་ཁྲག་བོད་ནས་འཐོར་ཞིང་།  

སྐོམ་སེལ་གངས་ཆུ་བྱས་པའི་བོད་པ་ཞིག་ཡིན་ཕྱིར།

ཕ་སྐད་ལ་ནུས་པ་ཅི་ཡོད་ཀྱིས་འཛིན་སྐྱོང་སྤེལ་གསུམ་དགོས་པ་ནི་དོར་དུ་མེད་པའི་ཕྲག་བབས་ཀྱི་འགན་འཁྲི་དྭངས་མ་ཞིག་རེད།

བླ་མ་ཡིད་བཞིན་ནོར་བུ་མཆོག་གིས་ཀྱང་།

“བོད་རིགས་ངོ་མ་ཞིག་ཡིན་ཕྱིན།བོད་སྐད་ཡིག་དག་མ་ཞིག་ངེས་པར་ཤེས་དགོས།ཤེས་པ་དེ་སྤྱོད་དགོས།གལ་ཏེ་བོད་རང་གིས་ཆས་གོས་ཀྱང་གོས་སུ་མི་བྱེད།

སྐད་ཡིག་དག་ཀྱང་མི་སྤྱོད་ན།དེའི་ཚེ་བོད་ཅེས་པའིི་མིང་བོར་ཚར་བ་ཡིན་སོགས་མང་དུ་གསུང་ཡོད།

བོད་ཡིག་ཁྱབ་སྤེལ་མ་བཏང་ན།

ནམ་ཞིག་ལ་འདི་ལྟ་བུའི་བསྐལ་བ་ཡོངས་སུ་ཟད་ཚེ།

གདུང་འབོད་དང་ཕྱི་འགྱོད་ག་ཙམ་སྐྱེས་ཀྱང་ཕན་འབྲས་མེད།

མདོར་བསྡུས་གཏམ་གྱི་སྙིང་པོ་ཞིག་བརྗོད་ན།

མི་སོ་སོས་རང་ཉིད་ནས་མགོ་བརྩམས་ཏེ།

དུས་ཉི་མ་དེ་རིང་ནས་བཟུང་སྟེ།

ཕ་སྐད་གཙང་མ་ལག་ལེན་ལས་སྤྱོད་རྒྱུ་དང་ཕ་ཡིག་དག་མ་ཉམས་མྱོང་ལས་བཀོལ་རྒྱུ་ཡང་སྙིང་དུ་འཛིན་རྒྱུ་གལ་ཆེ།