文学作品ཚིགས་བཅད།

ཚིགས་བཅད།

     ༄༅  སངས་རྒྱས་སྒྲོལ་མ།                                                             

                             གཉགས་དར་རྒྱས།                    

ཀ་ཅ་གསོག་འཇོག་མང་བའི་གཞིས་ཁྱིམ་གྱི་ནང་དུ།།  

ཁ་ལ་ཞིམ་པའི་ཟས་རིགས་སིལ་ཏོག་དང་ཤ་ཐུད།། 

ག་ལེར་དགའ་བའི་སྣང་བས་སྟོན་མོ་ལ་རོལ་ཡང་།།

ང་ཡིས་ཁྱེད་ཉིད་བརྗེད་པའི་དུས་སྐབས་ཤིག་མ་བྱུང་།། 

ཅ་ནེ་ལྕགས་ཕོར་ཡོད་པའི་ལས་བྱེད་ཀྱི་བུ་མོ།།                        

ཆ་ལུགས་ལུས་ལ་རན་པའི་རྒྱ་གྲོང་གི་མཛེས་མས།།                                      

ཇ་ཆང་དྲངས་དེ་ང་ལ་འཛུམ་མདངས་ཤིག་བསྟན་ཀྱང་།།                             

ཉ་མ་མོ་ཚོར་བལྟ་འདོད་འདུན་པ་ཞིག་མ་མཆིས།།  

ཏ་ཐཱ་ག་ཏའི་བསྟན་པར་རྒྱབ་འགལ་ཞིག་དགོས་ཀྱང་།། 

ཐ་ན་རང་སྡེ་ཁྲ་མོ་ལོགས་ཤིག་ཏུ་བསྐྱུར་ནས།།

ད་ལྟ་ལེ་དབར་ཁྲི་ཕྲག་རྐང་འགྲོས་ཀྱི་བགྲོད་དེ།།                                             

ན་མཉམ་ཁྱེད་ཀྱི་ཕྱོགས་སུ་གོམ་འགྲོས་དེ་བསྒྱུར་འདོད།།  

པ་ཎཾ་རེག་བྱ་ལྟ་བུའི་ཁྱེད་ལུས་ཀྱི་འཇམ་ཤ།།                                                    

ཕ་ལམ་ཉི་ཤར་ལྟ་བུའི་ཁྱེད་གདོང་གི་གཟི་བྱིན།།                                               

བ་ཀུ་ལ་ཡི་མེ་ཏོག་དྲི་བཞོན་གྱིས་བསྒུལ་འདྲའི།། 

མ་ཚོགས་མཁའ་འགྲོ་བྱེ་བའི་རྣམ་སྤྲུལ་དེ་ཁྱེད་ཡིན།།

ཙ་རིའི་གནས་ལ་བཞད་པའི་མཛེས་སྡུག་གི་མེ་ཏོག །                                         

ཚ་གདུང་དཀའ་ངལ་ཁྱད་བསད་ལག་ཟུང་གིས་བཏུས་དེ།། 

ཛ་དྲག་རྫ་འགག་གངས་ཁྲོད་རི་ལུང་ཀུན་བརྒལ་ནས།། 

ཝ་ཏའི་ལྷད་མེད་དུངས་བརྩེ་ཁྱེད་རང་ལ་ཕུལ་འདོད།། 

ཞ་འཐེང་རྒད་པོ་ཟུང་ཟད་མགོ་དཀར་དུ་གྱུརད་དེ།། 

ཟ་མ་ཁ་ལ་ལེན་པར་དཀའ་ཁག་ཅིག་འབྱུང་བར།།

འ་ཅག་གཉིས་ཀྱི་བརྩེ་གདུང་པད་དཀར་གྱི་མེ་ཏོག ། 

ཡ་ཡོ་མེད་པར་ཚེ་འདིའི་ལས་སྐལ་དུ་འཛུགས་ངེས།། 

ར་གན་གསེར་བརྫི་བྱེད་པའི་ཁྲམ་པ་དེ་ང་མིན།། 

ལ་ཡོག་མགོ་སྐོར་གཏོང་བའི་ཉེས་ཅན་དེ་ང་མིན།།

ཤ་ཁྲག་རུས་གསུམ་ཁྱེད་ལ་ཕངས་མེད་དུ་སྟོབས་མཁན།།

ས་ཆེན་འདི་རུ་བུ་ང་ཁོ་ན་ལས་མེད་དོ།།

ཧ་རི་ཎ་ཡི་སྤྱན་ལྡན་ཞེ་ཁོག་གི་དྲན་པ།།                                                         

ཨ་ཅག་སངས་རྒྱས་སྒྲོལ་མ་ཁྱེད་ཉིད་རང་ཡིན་ནོ།།

     བརྩེ་འཕྲིན།

                སྨོན་ལམ།

འཕྲིན་པ་ཕར་འགྲོ་ཞིག་དང་།།

ལས་དབང་ཚུར་འོང་ཞིག་གིས།།

ཚེ་ལ་ཚེ་མདུད་ཐེབས་ནས།།

དབང་བ་སྐྱིད་ལ་འཁོར་ཆོག།

འཇིག་རྟེན་མི་ཡུལ་འདི་ནས།།

ངེད་གཉིས་ལས་ཐུག་ལམ་ཐུག།

ཐུག་ནས་སེམས་པ་གླན་ས།།

སྙིང་གྲོགས་ཁྱེད་ལས་མི་འདུག།

དགའ་བ་སེམས་ཀྱི་རྟེན་ས།།

དུངས་བ་ཡིད་ཀྱི་རུ་མ།།

དགའ་དུངས་འདྲེས་མའི་མངར་ཁ།།

བརྩེ་བའི་ཧུབ་ཀྱིས་གཞིབས་ཆོག།

ཁྱེད་ཀྱི་བརྩེ་བ་བརྟན་ན།།

ང་ལ་ཕྱི་ཐག་ལོས་ཡོད།།

འགྱུར་མེད་དམ་བཅའ་བརྟན་པོ།།

དམར་ཆུང་སེམས་སུ་བྲིས་ཡོད།།

སྡེ་ཆེན་མི་ཚོགས་ཀློང་ནས།།

བརྩེ་བ་ཅི་རིགས་འཕྲད་ཀྱང་།།

གཞོན་པའི་སྣང་བ་མཐུན་ས།།

ཁྱོད་ལས་གཞན་ཞིག་མ་བྱུང་།།

འཕྲིན་ཆུང་དམར་པོ་ཞིག་ལ།།

ལས་ཀྱི་སྨོན་ཚིག་བསྲེས་ཏེ།།

རྒྱང་རིང་ཁྱེད་ཀྱི་ཕྱོགས་སུ།།

དྲན་པའི་ཚུལ་དུ་བསྐུར་རོ།།

སློབ་གླིང་བཀྲ་ཤིས་རྟགས་བརྒྱད།

                ༢༣༢༡ཡེ་ཤེས་མཚོ།     

ས་སྒང་གོ་ལའི་ཟེ་བ་མཐོ་ས་ཡི།།

ཨ་སྔོན་གུར་དུ་ཕུབ་པའི་རི་ཚོགས་འདིར།།

སྤྲིན་ནག་ཆར་དུ་བསྙིལ་བའི་ཤུལ་དེ་ནས།།

ཁྲི་གདུགས་ཉི་མ་འོད་པོ་ཆེ་ཞིག་ཤར།།

རྣམ་དཔྱོད་རིག་པའི་རྩལ་ཁ་རབ་རྒྱས་པའི།།

ཤེས་རབ་ལྡན་པ་གང་དེ་རྟོག་སད་ལྟར།།

དངུལ་ཞྭ་གྱོན་པའི་གསེར་ལྡན་རི་བོའི་འདབ།།

གངས་ཆབ་ཁ་རུ་གསེར་ཉ་ཁྱུ་གཅིག་རྩེན།།

གཙུག་ལག་ལྔ་ཟུང་རིག་པའི་གནས་ཀུན་ལ།།

བསླབ་པའི་ཡོན་ཏན་ཐམས་ཅད་ཁོང་ཆུད་པའི།།

ཚུལ་མཐུན་བློ་གསལ་སྣོད་དུ་རུང་བ་དག།

ལེགས་ཚོགས་བཅུད་ཀྱིས་བལྟམས་པའི་བུམ་བཟང་བཞིན།།

མཁྱེན་དཔྱོད་ཡངས་པའི་དགོངས་པ་རབ་གསལ་ཞིང་།།

བརྩེ་བ་སྙིང་རྗེ་ཆེན་པོའི་ཐུགས་མངའ་བ།།

ནུས་མཐུས་སློབ་ཚོགས་ཐམས་ཅད་སྐྱོང་མཛད་པའི།།

བཤེས་གཉེན་ལྷག་བསམ་དཀར་བ་པད་མའི་གཤིས།།

རིག་པའི་གནས་བཅུ་གཙུག་ཏུ་བཀོད་པ་དང་།།

སྲོལ་བཟང་བསྐྱངས་བའི་ཡ་རབས་སྤྱོད་བཟང་གིས།།

སྙན་པའི་གྲགས་དཔལ་སྤྱི་ལ་ཁྱབ་པ་དེ།།

དུང་དཀར་འབུད་པའི་བཀྲ་ཤིས་དབྱངས་རྟ་བཞིན།།

ནང་གི་སློབ་གཉེར་འབྲས་བུ་གཡུར་ཟ་ཞིང་།།

ཕྱི་ཚུལ་བཟོ་བཀོད་མཛེས་པས་ལྟ་ན་སྡུག།

མཛའ་བརྩེ་མཐུན་པའི་དཔུང་རྡང་མཉམ་པ་ཡང་།།

ཕུན་ཚོགསདཔལ་གྱི་བེའུ་བསྣོལ་བ་ལྟར།།

རིག་གཞུང་སྲོག་ཤིང་བྱེད་པའི་སློབ་གླིང་འདི།།

ཁ་ཆར་བུ་ཡུག་དྲགས་པོའི་གནོད་འཚེའི་ཁྲོད།།

ཉི་ཟླ་གཟའ་ཡི་ཁ་ལས་ཐར་བ་བཞིན།།

མི་ནུབ་རྒྱལ་མཚན་ཡུན་དུ་བརྟན་པར་ཤོག།

ཐོག་མའི་གངས་ཀྱི་སེམས་འདུན་དཀར་དཀར་དེ།།

མེ་ཏོག་འདབ་ལག་མངོན་པར་བཞད་པ་ལྟར།།

འདོད་དོན་མཐའ་དག་གེགས་མེད་འགྲུབ་པ་ཡི།།

རྟགས་བརྒྱད་རྩིབ་སྟོང་འཁོར་ལོས་བཀྲ་ཤིས་ཤོག།