མཚན་སྙན་ཐོབ་ཅིང་རྒྱལ་ཁའི་ངང་ཕྱིར་ལོག་པའི་ཆོས་དབྱིངས་སྐྱིད་ཀྱི་གདོང་ལ་དྲོད་སྐྱིད་ཀྱི་འཛུམ་མདངས་ཀྱིས་ཁེངས་ཡོད།
མེ་ཏོག་དང་ཁ་བཏགས། དགའ་བསུ་དང་འཐམ་འཁྱུད་སོགས། ཟླ10པའི་ཚེས6ཉིན་གྱི་ཆུ་ཚོད19དང་སྐར་མ40ཡི་སྟེང་། ཀྲུང་གོའི་མཆོང་རྒྱུག་འཕེན་གསུམ་གྱི་ལུས་རྩལ་པ་ཆོས་དབྱིངས་སྐྱིད་རྒྱལ་ཁའི་ངང་ཕྱིར་ཕ་ཡུལ་མཚོ་སྔོན་དུ་ལོག་བྱུང་། མཚོ་སྔོན་ནས་འཛམ་གླིང་གར་སྟགས་སུ་སྐྱོད་པའི་ལུས་རྩལ་པ་ཁོ་མོས་སྨག་ནག་པའི་ཟི་ལིང་གི་ཚའོ་ཅ་པའོ་རྒྱལ་སྤྱིའི་གནམ་ཐང་ལ་བཀྲག་མདངས་བསྣན།
ཨོ་རྩལ་འགྲན་ཚོགས་དང་ཨེ་ཤེ་ཡའི་ལུས་རྩལ་འགྲན་ཚོགས་སྟེང་གསེར་གྱི་རྟགས་མ་ལེན་མཁན་ཏེ་ཆོས་དབྱིངས་སྐྱིད་རྒྱལ་ཁའི་ངང་ཕྱིར་ལོག་པར་དགའ་བསུ་བྱེད་དགའ་བསུའི་ཐལ་མོའི་རྡེབ་སྒྲ་སོགས་དང་འཕྲེད་བྱང་རེ་རེ་ཡིས་ཚང་མའི་རེ་སྒུག་ཡོད་ཚད་མངོན་མི་ནུས། མཚོ་སྔོན་ཞིང་ཆེན་ལུས་རྩལ་ཅུའུ་དང་མཚོ་བྱང་བོད་རིགས་རང་སྐྱོང་ཁུལ་ནས་ཐོན་པའི་མགོ་ཁྲིད་གཙོ་བོ། དེ་མིན་ཞིང་ཆེན་ཡོངས་ཀྱི་སྨྱན་སྦྱོར་སྡེ་ཁག་གི་མིག་དབང་ཡོངས་སུ་སྐབས་ཐོག་དེར་ཕྱོགས་ཡོད།
ཀྲུང་གོར་ཐུགས་རྗེ་ཆེ། མཚོ་སྔོན་ལ་ཐུགས་རྗེ་ཆེ། རང་ཉིད་ཀྱིས་ཚང་མའི་རེ་བ་སྟོང་ཟད་དུ་མ་བཏང་བར་ཐུགས་རྗེ་ཆེ། ཕ་ཡུལ་དུ་ཕྱིར་ལོག་ཆོས་དབྱིངས་སྐྱིད་ཨེ་ཤེ་ཡའི་ལུས་རྩལ་འགྲན་ཚོགས་ཀྱི་འགྲན་བསྡུར་དང་བསྡུར་ན་སྔར་བས་ལྷོད་ལ་བབས་ཡོད་ཅིང་ཁོ་མོའི་གདོང་ལ་དགའ་སྤྲོའི་འཛུམ་མདངས་ཀྱིས་ཕྱུག་ཡོད།
ཀྲུང་གོར་གཟི་བརྗིད་བརྩོན་ལེན་བྱས་ཤིང་། མཚོ་སྔོན་ལ་ངོ་མཚར་བསྣན།
སྔ་དྲོར་རུ་མི་དང་མཉམ་དུ་ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་ཀྱི་སྤྱི་ལེ35ཡི་ཚོགས་སྤྱིའི་འགྲོ་རྩལ་འགྲན་བསྡུར་ཁྲོད་གསེར་གྱི་རྟགས་མ་བླངས་པ་དང་། དགོང་མོར2012ལོའི་ལོན་ཏོན་ཨོ་རྩལ་འགྲན་ཚོགས་ཀྱི་བུད་མེད་ཀྱི་སྤྱི་ལེ20ཡི་འགྲོ་རྩལ་འགྲན་བསྡུར་ཁྲོད་གསེར་གྱི་རྟགས་མ་བླངས། ཉིན་གཅིག་ལ་ལྗིད་ཏིག་ཏིག་གི་གསེར་གྱི་རྟགས་མ་གཉིས་བླངས་པས། སྤྱིར་བཏང་གི་ཟླ10པའི་ཚེས4ཉིན་དེ་སྤྱིར་བཏང་མ་ཡིན་པ་ཞིག་ཏུ་བསྒྱུར། ཡིན་ཏེ། ཉིན་དེ་ནི་ཆོས་དབྱིངས་སྐྱིད་ལ་དབང་བའི་ཉིན་མོ་ཞིག་རེད།
ཉིན་འདི་འགར། བྱ་དགའ་ཐོབ་པའི་མྱོང་ཚོར་གླེང་སྐབས་ཐུགས་རྗེ་ཆེ་ཞེས་པ་ནི་ཆོས་དབྱིངས་སྐྱིད་ཀྱིས་གླེང་རྒྱུ་ཆེས་མང་བའི་སྐད་ཆ་དེ་རེད། བགྲང་བྱ་མང་པོའི་རིང་དུ། ཁོ་མོའི་སེམས་སུ་བཀའ་དྲིན་དྲན་ཞིང་ཁེངས་སྐྱུང་དང་ཞི་འཇམ་གྱིས་མདུན་དུ་སྐྱོད་ཅིང་བློ་བརྟན་འགྱུར་མེད་ངང་འགྲོ་རྩལ་ནི་དོན་དག་སྐྱིད་པོ་ཞིག་ཏུ་སྒོམ་ཡོད།
དགུན་གསུམ་གྱི་གྲང་ངར་དང་དབྱར་གསུམ་གྱི་ཚ་སྡུག ལོ་ངོ་བཅུ་གྲངས་ཁ་ཤས་རིང་འབད་འབུངས་ཧུར་བརྩོན་བྱས་ཤིང་། མཆོང་རྒྱུག་ར་བ་ནས་སྤྱི་ལེ་ཁྲི་བཅུ་ལས་བརྒལ་བ་སོང་མྱོང་། ཆོས་དབྱངས་སྐྱིད་ཀྱི་འགྲོ་རྩལ་བགྲོད་ལམ་སྟེང་གཟི་བརྗིད་དང་རྨས་སྐྱོན། ཐེ་ཚོམ། རུ་ཁག་ལས་ཕྱིར་ལོག་རྒྱུ་སོགས་ཀྱི་ཚོར་སྣང་བྱུང་མྱོང་ལ། རྒྱུན་དུ་རང་ཉིད་ལ་ཡིད་ཆེས་ཉམས་པའི་ཚོར་སྣང་ཡང་བྱུང་ཡོད། འོན་ཀྱང་ཁོ་མོའི་དཀའ་སྤྱད་འབད་བརྩོན་དང་རང་གཅུན་རང་སྡོམ་ནི་མིག་མཐོང་ལག་ཟིན་རེད།
ཐོག་མཐའ་བར་གསུམ་དུ་རྒྱལ་ཁབ་ཀྱི་ཁེ་ཕན་སྔོན་ལ་བཞག ཁོ་མོའི་ལུས་རྩལ་བགྲོད་ལམ་ལའང་ཀྱག་ཀྱོག་ལྡན་ཞིང་། ཁོ་མོས་མྱོང་བའི་དཀའ་སྡུག་དང་རྨས་སྐྱོན་གྱིས་ང་ཚོར་སེམས་འགུལ་ཐེབས་སུ་བཅུག་ཡོད། འདི་ལྟ་བུའི་རྒྱལ་ཁ་དང་གྲུབ་འབྲས་ནི་ཐོབ་འོས་པ་ཞིག་རེད། མཚོ་སྔོན་ཞིང་ཆེན་ལུས་རྩལ་ལས་དོན་རུ་ཆེན་དང་པོའི་སྨན་པ་ཞའོ་ཡུས་ཅུན་འགན་སྲུང་བ་ཞིག་ཡིན་པའི་ངོས་ནས་ཆོས་དབྱིངས་སྐྱིད་ཀྱི་འཚར་ལོངས་ལ་བདེན་དཔང་བྱས་ཡོད།
ལོ་ཟླ་ནི་གཙང་པོ་བཞིན་དལ་གྱིས་བཞུར་སོང་། འདས་སོང་ལ་ཕྱིར་མིག་འཕངས་ཚེ། ཆོས་དབྱིངས་སྐྱིད་རང་ཉིད་ཀྱི་བརྒྱུད་རིམ་རེ་རེར་བག་ལྷོད་དང་ཞི་འཇམ་གྱིས་ཁེངས་ཤིང་། མྱོང་བ་དང་ཚོར་བ་སྣ་ཚོགས་འགྲོ་རྩལ་ལུས་རྩལ་པ་རྙིང་བ་འདིའི་ཀྱག་ཀྱོག་གི་ལུས་རྩལ་བརྒྱུད་རིམ་དུ་འཐིམས་ཡོད། ཁོ་མོས“བརྒྱུད་རིམ་རེ་རེ་ནི་བརྗེད་དཀའ་བ་ཞིག་རེད། ཨེ་ཤེ་ཡའི་ལུས་རྩལ་འགྲན་ཚོགས་སྟེང་གི་གསེར་གྱི་རྟགས་མ་ནི་ཚོགས་པ་ཐུན་མོང་གི་འབད་བརྩོན་གྲུབ་འབྲས་ཡིན། འདི་ལས་བདག་ལ་ཡང་བསྐྱར་ཡིད་ཆེས་བསྩལ་བྱུང་། དུས་ཚོད་ངེས་ཅན་ཞིག་ལ་ངལ་གསོ་དང་སྦྱོང་བ་བྱས་རྗེས་རྣམ་པ་ལེགས་པོའི་སྒོ་ནས་ཡང་བསྐྱར་རུ་ཁག་ནང་ཞུགས་ཤིང་སྔར་བས་ཟུར་མང་པོའི་སྒོ་ནས་རང་ཉིད་ཀྱི་ནུས་པ་མངོན་ཐུབ་རྒྱུའི་རེ་བ་བཅངས་ཡོད་ཟེར།
ཀྲུང་གོའི་ལུས་རྩལ་ལོ་རྒྱུས་སྟེང་ཨོ་རྩལ་འགྲན་ཚོགས་ཀྱི་འགྲན་རར་ཞུགས་མྱོང་བའི་བོད་རིགས་ལུས་རྩལ་པ་དང་པོ་དང་། ཨོ་རྩལ་འགྲན་ཚོགས་ཀྱི་བྱ་དགའ་སྤྲོད་པའི་སྟེགས་བུའི་ཐོག་ལངས་མྱོང་བའི་བོད་རིགས་ལུས་རྩལ་པ་དང་པོ། ཨོ་རྩལ་འགྲན་ཚོགས་ཁྲོད་ཐེངས་གསུམ་ལ་ཞུགས་པའི་བོད་རིགས་ལུས་རྩལ་པ་དང་པོ། རྒྱལ་ནང་གི་བུད་མེད་འགྲོ་རྩལ་གྱི་སྣེ་ཁྲིད་པའི་གྲས་ཤིག་ཡིན་པའི་ཆོས་དབྱིངས་སྐྱིད་ལ་མཚོན་ན། ཀྲུང་གོའི་ལུས་རྩལ་དང་ཀྲུང་གོའི་འགྲོ་རྩལ་གྱི་དོན་སྙིང་དང་རིན་ཐང་དེ་ཨོ་རྩལ་འགྲན་ཚོགས་ཀྱི་གསེར་གྱི་རྟགས་མ་དང་། ཨེ་ཤེ་ཡའི་ལུས་རྩལ་འགྲན་ཚོགས་ཀྱི་གསེར་གྱི་རྟགས་མ་གཉིས་ཀྱི་དོན་སྙིང་ལས་བརྒལ་ཡོད། གཟེངས་བསྟོད་རྟགས་མ་ལས་རྩལ་འགྲན་ལུས་རྩལ་གྱི་ཆུ་ཚད་མངོན་ཡོད་མོད། འོན་ཀྱང་ནམ་ཡང་ཡལ་བ་དང་དོར་བ་མེད་པའི་དཀའ་སྤྱད་སྡུག་རུས་དང་འབད་འབུངས་ཧུར་བརྩོན། དཔའ་ངར་མདུན་སྐྱོད་ཀྱི་ལུས་རྩལ་སྟོབས་ཤུགས་དེ་གཟེངས་བསྟོད་རྟགས་མ་ལས་བརྒལ་ཡོད། འགྲན་རའི་སྟེང་གི་གཟི་མདངས་ནི་གཟེངས་བསྟོད་རྟགས་མ་ཁོ་ན་ལས་མ་འདས་ཤིང་། དེ་བས་ཀྱང་འབད་བརྩོན་ལྷོད་མེད་དང་། ཕུགས་འདུན་དོན་གཉེར། རང་ཉིད་ལས་བརྒལ་བའི་སྙིང་སྟོབས་དེ་དག་རེད།
ད་ལྟ། ལུས་རྩལ་པ་རེ་རེ་གཟེངས་བསྟོད་སྟེགས་བུའི་ཐོག་ལངས་པའི་སྐབས་སུ་གདོང་ལ་མི་རིགས་ཡིད་ཆེས་ཀྱི་རྣམ་འགྱུར་གྱིས་ཁེངས་ཡོད་པ་དེས་སྔར་ལས་མགྱོགས་ཤིང་སྔར་ལས་མཐོ་བ། སྔར་ལས་སྟོབས་ལྡན། སྔར་ལས་མཐུན་སྒྲིལ་བཅས་ཀྱི་ཨོ་རྩལ་སྙིང་སྟོབས་མངོན་ཡོད། ཨོ་རྩལ་འགྲན་ཚོགས་ཀྱི་གསེར་གྱི་རྟགས་མ་ལེན་པར་ལོ་བཅུ་གཅིག་རྗེས་སུ་ལུས་པ་དེ་ནི་འབད་བརྩོན་བྱེད་འོས་པའི་ལུས་རྩལ་སྟོབས་ལྡན་པ་ཞིག་ལ་མཚོན་ན། འགྱོད་པ་དང་ཡིད་ཕམ་ག་འདྲ་ཡོད་སྲིད་དམ། གོ་སྐབས་ག་ཚོད་ཤོར་ཡོད་དམ། ཚང་མས་བློ་བརྟན་འགྱུར་མེད་ཀྱི་བུ་མོ་དེར་ཕངས་སེམས་ཆེན་པོ་སྐྱེས་བཞིན་པའི་སྐབས་སུ་ཆོས་དབྱིངས་སྐྱིད་ལ་རང་ཉིད་ཀྱི་བསམ་ཚུལ་ཡོད།
ཆོས་དབྱིངས་སྐྱིད་ཀྱིས“ལོ་ངོ་བཅུ་གཅིག་འདས་སོང་། ང་རང་ཉིད་ལ་མཚོན་ན། ཨོ་རྩལ་འགྲན་ཚོགས་སྟེང་ཨང་དང་པོ་ཐོབ་པར་དོན་སྙིང་དེ་འདྲ་ཆེན་པོ་མེད། འོན་ཀྱང་མཚོ་སྔོན་ལ་མཚོན་ན་འདི་ནི་མཐོ་ཚད་གསར་པ་ཞིག་ཡིན་པས་ང་ཚོར་སྔར་ལས་མང་བའི་རེ་བ་མཐོང་དུ་བཅུག་ཡོད། འོན་ཀྱང་ཨེ་ཤེ་ཡའི་ལུས་རྩལ་འགྲན་ཚོགས་ཀྱི་གསེར་གྱི་རྟགས་མ་དེ་བདག་ལ་མཚོན་ན། སྒུལ་ཤུགས་གསར་བ་ཞིག་ཡིན་པས་ང་ལ་ཡུན་རིང་མ་བྱུང་བའི་གདེང་ཚོད་ཅིག་སྦྱིན་ཡོད། གསེར་གྱི་རྟགས་མ་གཉིས་ཐོབ་པ་འདིས་སྔར་ལས་མང་བའི་གཞོན་ནུ་མང་པོར་སྒུལ་ཤུགས་ཐོབ་པའི་རེ་བ་ཡོད་ལ། ངས་ཀྱང་རང་ཉིད་ཀྱིས་ནུས་ཤུགས་ཡོད་རྒུ་བཏོན་ནས་ཁོང་ཚོར་ཁ་ཕྱོགས་འཚོལ་རོགས་བྱ་རྒྱུ་ཡིན། ན་གཞོན་ལུས་རྩལ་པ་ཚོས་ད་ལྟའི་གོ་སྐབས་དམ་འཛིན་བྱེད་པར་སྨོན། རྒྱུ་མཚན་ལུས་རྩལ་པ་རེ་རེའི་གྲུབ་འབྲས་ནི་རིམ་པ་སོ་སོའི་མགོ་ཁྲིད་དང་འབྲེལ་ཡོད་སྡེ་ཁག་གི་རྒྱབ་སྐྱོར་ཆེན་པོ་དང་ཁ་འབྲལ་ཐབས་མེད་ཟེར།
ང་དང་ང་ཚོ། མི་སྒེར་དང་ཁྱོན་ཡོངས། མཚོ་སྔོན་གྱི་ལུས་རྩལ་ལ་དོ་ཁུར་དང་མཚོ་སྔོན་གྱི་འགྲོ་རྩལ་ལ་དོ་ཁུར་བྱེད་པའི་བར། ཆོས་དབྱིངས་སྐྱིད་ཀྱི་ཕྲག་སྟེང་དུ་རང་ཉིད་ཀྱིས་ལས་གནས་བརྟན་སྲུང་བྱེད་པའི་འགན་འཁྲི་ཡོད།
ཆོས་དབྱིངས་སྐྱིད་ཀྱིས་ན་གཞོན་ལུས་རྩལ་པར་ཐུགས་ཁུར་བྱེད་པའི་སྐད་ཆ་གོ་རྗེས། མཚོ་སྔོན་ཞིང་ཆེན་ལུས་རྩལ་ལས་དོན་རུ་ཆེན་དང་པོའི་འགྲོ་རྩལ་ལུས་རྩལ་པ་ཀུའོ་ཁུའེ་ཀྲི་ཅ་ལ་ཡིད་ཆེས་ཀྱིས་ཁེངས་བཞིན། ཆོས་དབྱིངས་སྐྱིད་ནི་ནམ་ཡང་ང་ཚོའི་དགེ་རྒན་བཟང་པོ་དང་གྲོགས་པོ་བཟང་པོ་ཡིན་ལ། ང་ཚོའི་མིག་དཔེ་བཟང་བོའང་ཡིན་པས་ང་ཚོས་ཁོང་ལ་སློབ་སྦྱོང་བྱས་ནས། དཀའ་སྤྱད་སྡུག་རུས་ཀྱིས་སྦྱོང་བརྡར་བྱས་ཏེ་གོམ་སྟབས་རེ་རེ་བཞིན་སྔར་ལས་རྒྱ་ཆེ་བའི་གར་སྟེགས་སུ་བསྐྱོད་པ་དང་། ངེས་པ་དོན་གྱིས་ཁོ་མོས་བཤད་པ་དང་འདྲ་བར་ཁོ་མོའི་གོམ་སྟབས་ཀྱི་རྗེས་སུ་སྙེག་དགོས་ཟེར།
མཚན་མོ་སྔར་བས་སྨག་ནག་ཏུ་གྱུར་ཅིང་ཚང་མ་ཁ་འབྲལ་མི་འདོད་པའི་ཁྲོད་ནས་ཆོས་དབྱིངས་སྐྱིད་དང་མོའི་ཁྱིམ་མི་ཚོ་ཁྱིམ་དུ་ལོག་མགོ་བརྩམས།
མཚོ་སྔོན་ཞིང་ཆེན་ལུས་རྩལ་ལས་དོན་རུ་ཆེན་དང་པོའི་མི་ཤུགས་ཐོན་ཁུངས་པུའི་པུའུ་ཀྲང་གཞོན་པ་ཡའོ་ཅིན་ཀྲུའུ་ཡིས་མྱོང་ཚོར་ཟབ་མོའི་སྒོ་ནས། ཆོས་དབྱིངས་སྐྱིད་ཀྱི་བློ་བརྟན་འགྱུར་མེད་དང་དཀའ་སྤྱད་འབད་བརྩོན་གྱི་དཔེ་སྟོན་སྣེ་ཁྲིད་འོག་མཚོ་སྔོན་དུ་ཕུལ་བྱུང་ལུས་རྩལ་པ་དེ་བས་མང་པོ་བྱུང་ནས་མཚོ་སྔོན་ཞིང་ཆེན་ཡོངས་ཀྱི་ལུས་རྩལ་བྱ་གཞག་སྔར་བས་ལེགས་པའི་སྒོ་ནས་འཕེལ་རྒྱས་འགྲོ་བར་སྐུལ་འདེད་གཏོང་བར་སྨོན། ང་ཚོའི་ཆོས་དབྱིངས་སྐྱིད་ཀྱང་སྔར་བས་ཇེ་ལེགས་ཇེ་བཟང་དུ་འགྱུར་བར་སྨོན་ཟེར། །
