གསོན་ཉམས་ལྡན་པའི་ཀྲུང་གོ

  འབྲུག་ལོའི་དཔྱིད་གསར་དུས་ཆེན་རིང་ལ་རང་རྒྱལ་འཛད་སྤྱོད་ཚོང་རར་ཚོང་བྲིན་པོ་བྱུང་ཡོད། གྲོང་ཡུལ་ཚོང་རའི་མཁོ་འདོན་ཕུན་སུམ་ཚོགས་ཤིང་། མེས་རྒྱལ་གྱི་ལྷོ་བྱང་དུ་མི་རབ་རྒྱས་ཏེ། ལོ་གསར་སྐབས་སུ་འཛད་སྤྱོད་ཀྱི་མཚོ་རླབས་འཕྱུར་བས། ཀྲུང་གོའི་དཔལ་འབྱོར་འཕེལ་རྒྱས་ཆེན་པོ་བྱུང་དང་བྱུུང་བཞིན་ཡོད་པར་མངོན།

  ད་ལོའི་དཔྱིད་གསར་གུང་གསེང་རིང་། མི་ཐེངས་དུང་ཕྱུར་ཉེར་གསུམ་ལྷག་ས་ཁོངས་བརྒལ་ནས་འགྲུལ་བཞུད་བྱས་པས་ འཛད་སྤྱོད་ཐད་ལ་འཛེམ་པ་མེད་པའི་ཚོང་རའི་གསོན་ཤུགས་རྒྱས་ཡོད།ཚེས་བཅོ་བརྒྱད་ཉིན། ཚོང་དོན་པུའུ་ཡིས་ཁྱབ་བསྒྲགས་གཞི་གྲངས་ལས་མངོན་པ་ལྟར་ན། དཔྱིད་གསར་གུང་གསེང་རིང་། རྒྱལ་ཡོངས་སིལ་འཚོང་དང་བཟའ་བཏུང་ཁེ་ལས་ཕྱིར་འཚོང་ཚད་དུས་མཉམ་དང་བསྡུར་ན་བརྒྱ་ཆའི་བརྒྱད་ཚེག་ལྔ་འཕར་ཡོད་ལ། ཀྲུང་གོ་མི་དམངས་དངུལ་ཁང་གི་གཞི་གྲངས་ལས་མངོན་པ་ལྟར་ན། དྲྭ་འབྲེལ་རྩིས་རྒྱག་སྤྱི་གཉེར་ཁང་དང་ཀྲུང་གོའི་དངུལ་ཁང་མཉམ་འབྲེལ་ལྷན་ཚོགས་ཀྱིས་ལག་བསྟར་བྱས་པའི་ལས་རིགས་ཡོངས་ཀྱི་དྲ་བས་གཏོང་སྤྲོད་ཉོ་ཚོང་མངོན་གསལ་འཕར་ཡོད།  གནམ་གང་ནས་ལོ་སར་ཚེས་བརྒྱད་བར། ཆ་སྙོམས་ཉིན་རེར་ཉོ་ཚོང་བྱེད་ཚད་དུང་ཕྱུར་ཉེར་དྲུག་བྱེ་བ་གསུམ་ལ་ཟིན་ཞིང་།སྒོར་དུང་ཕྱུར་ཆིག་ཁྲི་ཉིས་སྟོང་ལྔ་བརྒྱ་ལ་ཟིན་པས། ན་ནིང་གི་ལོ་སར་དང་བསྡུར་ན། ཆ་སྙོམས་ཉིན་རེར་སོ་སོ་ནས་བརྒྱ་ཆའི་བཅོ་བརྒྱད་ཚེག་དྲུག་དང་བརྒྱ་ཆའི་བརྒྱད་འཕར་ཡོད་པ་རེད།

  ཕྱོགས་གཅིག་ནས་འཛད་སྤྱོད་ཀྱི་མཁོ་འདོན་དང་འབྲེལ་ཡོད་ལ། ཕྱོགས་གཞན་ཞིག་དགོས་མཁོ་ལ་ཐུག་ཡོད་པ་དེས། དཔལ་འབྱོར་འཕེལ་རྒྱས་འགྲོ་བའི་ནུས་པ་གལ་ཆེ་ཞིག་ལ། མི་དམངས་ཀྱི་བདེ་སྐྱིད་འཚོ་བའི་དགོས་མཁོ་སྐོང་བྱེད་གཙོ་བོའང་ཡིན། ད་ལོའི་ལོ་གསར་སྔོན་ལ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐན་ཅིང་དུ་རྟོག་ཞིབ་གནང་དུས། གནའ་བོའི་རིག་གནས་སྲང་ལམ་གྱི་ཚོང་རྟགས་གྲགས་ཅན་གྱི་ཁྱད་ལྡན་ཚོང་ཁང་དུ་སོང་ནས། ཚོང་ར་ལ་གཟིགས་ཞིབ་དང་འཚོང་གཉེར་ལ་སྐོར་དྲི་བ་གནང་ཐོག ས་གནས་ཁག་གིས་ལོ་གསར་རིང་དམངས་འཚོ་ཚོང་རྫས་ཐོན་སྐྱེད་དང་ཕྱིར་འཚོང་མཁོ་འདོན་འགན་སྲུང་ཡག་པོ་བྱས་ནས། རྒྱ་ཆེ་བའི་མང་ཚོགས་ལ་བློ་བདེ་མོས་ལོངས་སུ་སྤྱོད་ཆོག་པ་དང་ལོ་གསར་སྐྱིད་པོ་ཞིག་གཏོང་འཇུག་དགོས་པའི་བླང་བྱ་བཏོན།

  དཔྱིད་གསར་གུང་གསེང་རིང་། ཐན་ཅིང་གནའ་བོའི་རིག་གནས་སྲང་ལམ་གྱི་ཚོང་རའི་ཐོག་ཆ་སྙོམས་ཉིན་རེར་འགྲུལ་པ་མི་གྲངས་ཉིས་འབུམ་བཞི་ཁྲི་སྣེ་ལེན་བྱས་ཤིང་། ཆ་སྙོམས་ཉིན་རེར་ཚོང་སྒོར་བྱེ་བ་གཉིས་ས་ཡ་གཅིག་ལ་ཟིན། དབྱང་ལིའུ་ཆིང་གི་གསར་གཏོད་པང་ལེབ་ཐོག་བྲིས་པའི་ལོ་སར་རི་མོར་ཡུལ་སྐོར་བ་མང་པོས་དངོས་སུ་བྲིས་ཚོར་བྱས་པས། ཉིན་རེར་རི་མོ་སུམ་བརྒྱ་ལྷག་བཙོང་ཐུབ་པ་རེད། ཀའོ་རེན་ཀྲང་གིས་བཏོན་པའི་ཀུན་གྱི་དགའ་བསུ་ཐོབ་པའི་ཐུམ་འདྲེས་དེ་ཚོང་རའི་ཐོག་ཐོན་མ་ཐག་བཙོང་ཚར་བ་རེད། 

  ད་ལོའི་དཔྱིད་སར་གུང་གསེང་རིང་། འཛད་སྤྱོད་རྒྱ་བསྐྱེད་དང་སྤུས་གཙང་རིམ་སྤར་མངོན་གསལ་བྱུང་ཡོད། ཚོང་དོན་པུའུ་ཡི་གཞི་གྲངས་ཆེན་མོར་ལྟར་ན། དཔྱིད་སར་དུས་ཆེན་རིང་།གནམ་གང་དགོང་ཟས་དང་། གཉེན་གྲོགས་ལྷན་འཛོམས་གསོལ་སྟོན་ཐད་ཀྱི་བཟའ་བཅའ་ལས་རིགས་ལ་ཚོང་བྲིན་ཞིང་། ལྟ་ཞིབ་བཟའ་བཅའ་ཁེ་ལས་གཙོ་བོའི་བསིལ་འཚོང་སྔ་ལོ་ལས་བརྒྱ་ཆའི་བཅུ་བདུན་ཙམ་འཕར། འབྲུག་གི་རྒྱུ་ཆ་དང་ཀྲུང་ལུགས་གྱོན་ཆས་དང་ཞྭ། ལྷམ་སོགས་འཚོང་ཚད་ལྡབ་ལོག་འཕར་ཡོད། རྒྱལ་གྱི་སྲོལ་གཤིས་ཉམས་འགྱུར་ཐོན་རྗས་ཐད་ཁྱད་ཆོས་མངོན་གསལ་ཐོན། རྫོང་ཁོངས་ཁྲོམ་རའི་ནང་། རྒྱལ་ཐོན་པང་ཕྱིས་ཆས་དང་། ཕོར་འཁྲུད་ཆས་སོགས་རིག་ནུས་ཁྱིམ་ཆས་ཐོན་རྫས་བསིལ་འཚོང་ཚད་བརྒྱ་ཆའི་དྲུག་ཅུ་ཡན་འཕར། གངས་འཁྱགས་འཛད་སྤྱོད་དང་རིག་གནས་ལུས་རྩལ་འཛད་སྤྱོད་ལ་དགའ་བསུ་ཆེན་པོ་ཐོབ། 

  ཀྲུང་གོའི་སྤོས་འཕྲིན་ཝུའུ་ཐུང་གཞི་གྲངས་ཆེན་མོ་ལས་གསལ་བར་ལྟར་ན། ད་ལོའི་དཔྱིད་སར་གུང་གསེང་རིང་། རྒྱལ་ཡོངས་ཚོང་ར་ཆེན་པོ་ཁག་གི་འགྲུལ་པ་མི་ཐེངས་དུང་ཕྱུར་གཉིས་དང་བྱེ་བ་ལྔར་ཟིན་པས། སྔ་ལོའི་དུས་མཉམ་ལས་བརྒྱ་ཆའི་བཅོ་བརྒྱད་འཕར། ཕྱི་ནས་ཡོང་བའི་འགྲུལ་པ ་ཇེ་མང་དུ་ཕྱིན། ཧྲང་ཧའེ་ཅིན་ཨན་ཚོང་ར་སོགས་ཚོང་ར་སོ་ལྔས་བརྗོད་བྱ་གཙོ་བོའི་བྱེད་སྒོ་བཞི་བརྒྱ་ལྷག་སྤེལ་ཞིང་། ལོ་གསར་སྐུབས་སུ། གྲོང་ཁྱེར་ཡོངས་ཀྱི་ཡུལ་དངོས་དང་དྲྭ་ཐོག་གི་བསིལ་འཚོང་བསྡོམས་འབོར་སྒོར་དུང་ཕྱུར་ལྔ་བརྒྱ་རེ་དགུར་ཟིན། 

  ཁྲོམ་ལམ་རྙིང་པར་རྣམ་པ་གསར་པ་མངོན་ཏེ། ཧོ་ནན་ཀྲེན་ཀྲོའུ་རུ། མི་སེར་ཚོས་བརྗེད་པ་དཀའ་བའི་ སྣུམ་འགྱུར་བཟོ་གྲྭའི་གསར་གཏོད་སྤེལ་ཁུལ་གྱི་འཁོར་ཁང་རྙིང་པའི་ནང་། སྲོལ་རྒྱུན་གྱི་སིལ་ཟས་ཟ་ཆོག་པར་མ་ཟད། གཏམ་བརྗོད་ཟློས་གར་ལ་ལྟད་མོ་ལྟ་ཆོག་ལ།  ད་ལོའི་དཔྱིད་གསར་དུས་ཆེན་རིང་། ཀྲེང་ཀྲོའུ་ཡིས་ཁྱད་ལྡན་ཚོང་ལས་ཁྲོམ་ལམ་ཉེར་གཅིག་གི་ཚོང་གཉེར་བསྡོམས་འབོར་སྔ་ལོའི་དུས་མཉམ་ལས་བརྒྱ་ཆའི་སོ་དྲུག་འཕར། 

  ད་ལོའི་ལོ་གསར་ནང་། མི་རྣམས་ཐག་རིང་སྤྱོད་ཅིང་འཆམ་ཡུན་རིང་། འགྲོ་འོང་སྟེགས་བུས་མངག་ཐོ་གཞི་གྲངས་ལ་དབྱེ་ཞིབ་བྱས་པར་ལྟར་ན། གུང་གསེང་རིང་། མི་ཕྱེད་ཀ་ལྷག་གིས་ཞིང་ཆེན་བརྒལ་ནས་ཡུལ་སྐོར་ལོ་སར་བཏང་ཞིང་། དེའི་ནང་གི་བརྒྱ་ཆའ་སུམ་ཅུ་ཡན་གྱིས་ས་ཆ་གཉིས་ཡན་བརྒལ་ནས་ཡུལ་སྐོར་སྤྲོ་འཆམ་བྱས་ཤིང་། ཀྲུང་གོའི་ཡུལ་སྐོར་བ་ཕྱི་རྒྱལ་བསྐྱོད་དེ་འཛམ་གླིང་ཡོངས་ཀྱི་གྲོང་ཁྱེར་ཆིག་སྟོང་བདུན་བརྒྱར་ཁྱབ། རང་གཤིས་ཅན་གྱི་ཡུལ་སྐོར་དང་འཛད་སྤྱོད་གཏན་ཁེལ་བྱེད་རྒྱུ་དེ་དར་སྲོལ་གསར་པར་ཆགས་ཡོད། ཧྲན་ཞིའི་མཛེས་ཁུལ་དུ་འཁྲབ་སྟོན་ལ་ལྟ་འགྲོ་ན། ཡུལ་སྐོར་བས་ལྟད་མོ་ལྟ་ཞོར་འཁྲབ་སྟོན་པ་ཡང་བྱེད་ཆོག མྱོང་ཚོར་གསར་པ་འདིས་འཁྲབ་སྟོན་ཡོང་འབབ་སྒོར་དུང་ཕྱུར་ཟིན་ཞིང་། སི་ཁྲོན་གྱིས་རྒྱ་ཁོག་རིག་གནས་དང་ཁྱད་ལྡན་ལྗོངས་གཟིགས་གཉིས་ཟུང་འབྲེལ་བྱས་ནས། ཁྱད་ལྡན་བཟའ་བཅའ་འཛད་སྤྱོད་ལ་དགའ་བསུ་ཆེན་པོ་ཐོབ་ཡོད། ལོ་གསར་སྐབས་སུ། ཐེང་ཝང་གོ་མཛེས་ཁུལ་གྱི་གླིང་ག་བྱང་མ་ཡིས་སྤྱི་དམངས་ལ་སྒོ་ཕྱེ་ཞིང་། པིང་ཅང་ཆུ་ལམ་བརྒྱུད་ནས་འགྲུལ་པས་ཐད་ཀར་གྲོང་ཁུལ་རྙིང་པའི་ཚོང་ཁང་ལ་སླེབས་ཐུབ། 

  འཛད་སྤྱོད་ལས་རྣམ་གསར་པའི་ལས་གནས་གསར་པ་བཏོན་ཡོད་དེ། གསར་དར་ལས་རིགས་ཁག་ཅིག་ལ་ཀུན་གྱིས་དགའ་བསུ་ཆེན་པོ་ཐོབ་དང་འཐོབ་བཞིན་འདུག དམངས་སྲོལ་མགྲོན་ཁང་གི་གཉེར་པ་དང་གངས་ཤུད་རྩལ་ཁྲིད་པའི་དགོས་མཁོ་ཆེན་པོ་འདུག ཧ་ཨར་པིན་གྱིས་གསར་དུ་བཏོན་པའི་པར་ལེན་རྟེན་གཞིའི་ནང་། ཆ་བྱད་ཇུས་འགོད་པ་དང་ཡུལ་སྐོར་པར་ལེན་མཁན་ཚོ་བྲེལ་བ་ཆེན་པོ་ཤར་བཞིན་འདུག

  དགའ་སྤྲོས་ཁེངས་པའི་འབྲུག་ལོའི་ལོ་སར་ལས་ཀྲུང་གོའི་གཞི་ཁྱོན་ཤིན་ཏུ་ཆེ་བའི་ནང་མཁོའི་ཚོང་རའི་ཤུགས་ནུས་མངོན་བཞིནཡོད་པར་མ་ཟད།  ཀྲུང་གོའི་དཔལ་འབྱོར་ཡར་འཕེལ་གྱི་གསོན་ཤུགས་སྔར་ལས་རྒྱས་བཞིན་ཡོད་པར་མངོན། རྒྱལ་ཁབ་ཁྲལ་དོན་སྤྱི་ཁྱབ་ཅུས་ཀྱི་འཕར་ཁྲལ་གྱི་རྟིང་འཛིན་གཞི་གྲངས་ལས་མངོན་པ་ལྟར་ན། ད་ལོའི་དཔྱིད་གསར་གུང་གསེང་སྐབས་སུ་རྒྱལ་ཡོངས་ཀྱི་ཞབས་ཞུའི་འཛད་སྤྱོད་འབྲེལ་ཡོད་ལས་རིགས་ཀྱི་ཉིན་རེའི་ཆ་སྙོམས་ཕྱིར་འཚོང་ཡོང་འབབ་ན་ནིང་གི་དུས་མཉམ་ལས་བརྒྱ་ཆའི་ང་གཉིས་ཚེག་གསུམ་འཕར་ཡོད་པས། འཛད་སྤྱོད་དེ་དཔལ་འབྱོར་འཕེལ་རྒྱས་ཀྱི་སྒུལ་ཤུགས་གཙོ་བོ་ཡིན་པའི་ནུས་པ་འདོན་སྤེལ་གང་ལེགས་བྱེད་བཞིན་འདུག

  རྒྱལ་ཁབ་ཆ་འཕྲིན་ལྟེ་གནས་ཀྱི་སྤྱི་ཁོག་དཔལ་འབྱོར་ཞིབ་འཇུག་ཁང་གི་ཀྲུའུ་རེན་གཞོན་པ་ཀྲོའུ་ཝུན་ཧན་གྱིས། ད་ལོའི་དཔྱིད་གསར་སྐབས་འཛད་སྤྱོད་ཚོང་ར་ཤིན་ཏུ་བྲིན་པས། འཛད་སྤྱོད་འདོན་སྤྲོད་གོང་འཕར་དང་གསར་གཏོད་སྣེ་ཁྲིད་མངོན་གསལ་དོད་ལ། སྤྱི་ཚོགས་ཡོངས་ཀྱི་མཁོ་སྤྲོད་འཁོར་རྒྱུག་ལྟོས་བཅས་ཆུ་ཚད་ཅུང་མཐོ་བའི་ཚད་ལ་སླེབས། འདིས་ད་ལོའི་དུས་ཚིགས་དང་པོའི་དཔལ་འབྱོར་འཕེལ་འགོ་ཡག་པོ་བཙུགས་པར་རྨང་གཞི་ཅུང་བརྟན་པོ་ཞིག་འདིང་བ་རེད་ཅེས་བཤད།