ཨ་རིའི་གྲོང་ཁྱེར་འདིར་རྒྱུན་མཐུད་ནས་ཟིང་ཆ་དྲག་པོ་ལང་བཞིན་འདུག

  ཨ་རིའི་གནས་སྤོས་ཡུལ་མི་དང་འགག་སྒོའི་ཁྲིམས་འཛིན་ཅུའུ（ICE）སོགས་ལས་ཁུངས་ཀྱིས་ཟླ་དྲུག་པའི་ཚེས་དྲུག་ཉིན་ནས་བཟུང་། ཁྲིམས་འགལ་གནས་སྤོས་ཡུལ་མི་རྣམས་ལ་བཙན་ཤེད་ཀྱིས་གློ་བུར་དུ་འཇབ་རྒོལ་དང་སྔོག་བཤེར་བྱ་སྤྱོད་སྤེལ་རྗེས། རྒོལ་གཏམ་གཏོང་མཁན་གྱིས་ཉིན་གཉིས་ལ་བསྟུད་མར་ལུའོ་ཧྲན་ཅིན་དུ་རྔམ་སྟོན་བྱས་པ་དང་། མི་༡༠༠༠ལྷག་གིས་རྒྱལ་ཕྲན་མཉམ་འབྲེལ་ལས་ཁུངས་གནས་སའི་ཐོག་ཁང་ཞིག་ལ་བསྐོར་ནས་འཇབ་རྒོལ་བྱས་པ་མ་ཟད། ཉེན་རྟོག་ཕྱོགས་དང་གདོང་ཐུག་བྱུང་ནས་ཚེས་བདུན་ཉིན་བར་མི་༤༠ལྷག་འཛིན་བཟུང་བྱས།  ཕོ་བྲང་དཀར་པོའི་གཞུང་ལས་ཐིང་གི་ཀྲུའུ་རེན་གཞོན་པ་སི་ཏི་ཧྥེན་སྨི་ལེར་གྱིས་འདུ་ཚོགས་དེ་དག་ལ་སྐྱོན་བརྗོད་དྲག་པོ་བྱས་ཏེ། བྱ་སྤྱོད་འདི་ངོ་ལོག་ཟིང་འཁྲུག་གི་བྱ་སྤྱོད་རེད་ཅེས་བཤད།

  ལུའུ་ཐོའུ་གསར་འགྱུར་ཁང་དང་ཁོ་ལོམ་པི་ཡའི་རླུང་འཕྲིན་སྤྱི་གཉེར་ཁང（CBS）སོགས་ཀྱིས་གནས་ཚུལ་སྤེལ་བ་ལྟར་ན། ཟླ་དྲུག་པའི་ཚེས་བདུན་ཉིན་ལུའོ་ཧྲན་ཅི་ཤར་ལྷོའི་ཕྱོགས་ཀྱི་ཕ་ལ་མོང་ཐེ་ས་ཁུལ་དུ་རྒྱལ་ཕྲན་མཉམ་འབྲེལ་ཁྲིམས་འཛིན་མི་སྣས་རྒོལ་གཏམ་གཏོང་མཁན་དང་མུ་མཐུད་ཛ་དྲག་གི་ཁ་གཏད་བྱས། རྒོལ་གཏམ་གཏོང་མཁན་ཞིག་གིས་མོ་ཞི་ཁོའི་རྒྱལ་དར་གཡུག་གཡུག་བྱེད་པ་དང་མི་ལ་ལས་དབུགས་འབྱིན་རྔུབ་ཀྱི་གདོང་ཁེབས་གྱོན་ནས་ཁ་སྣ་བཀབ་ཡོད།

ཟིང་ཆ་དྲག་པོ་ལངས།

  ཚེས་དྲུག་ཉིན་ཨ་རིའི་གནས་སྤོས་ཡུལ་མི་དང་འགག་སྒོའི་ཁྲིམས་འཛིན་ཅུས་སོགས་རྒྱལ་ཕྲན་མཉམ་འབྲེལ་སྒྲིག་གཞིས་ཁྲིམས་འཛིན་མི་སྣ་འབོར་ཆེན་བཏང་ནས། ཅ་ལི་ཧྥུ་ཉི་ཡ་ཀྲོའུ་ལུའོ་ཧྲན་ཅི་རྫོང་གི་ས་ཆ་མང་པོ་ཞིག་ཏུ་ཁྲིམས་འགལ་གནས་སྤོས་ཡུལ་མི་ལ་དམིགས་པའི་ཁྲིམས་འཛིན་བྱ་སྤྱོད་སྤེལ་ནས། ཁྲོམ་གཞུང་དུ་ཁ་གཏད་དང་། ཟང་ཟིང་། གདོང་ཐུག་མང་པོ་ལངས།

  ས་གནས་དེ་གའི་འཕྲིན་སྦྱོར་གྱིས་གནས་ཚུལ་སྤེལ་བར་གཞིགས་ན། ཁྲིམས་འཛིན་མི་སྣས་ལུའོ་ཧྲན་ཅི་གྲོང་ཁྱེར་གྱི་ཉུང་མཐར་ཡང་ཉོ་སྒྲུབ་ལྟེ་གནས་དང་བཟོ་གྲྭ་ཚུད་པའི་ས་ཆ་བདུན་ལ་གློ་བུར་བྱ་སྤྱོད་སྤེལ་བ་དང་། ཁྱོན་མི་༤༤འཛིན་བཟུང་བྱས་པ་རེད། བྱ་སྤྱོད་སྤེལ་རིང་ཁྲིམས་འཛིན་མི་སྣར་ས་གནས་དེ་གའི་སྡེ་ཁུལ་གྱི་གྲོང་མིས་བཀག་འགོག་བྱས་ནས་ཞོར་ཐོན་གདོང་ཐུག་རྒྱུན་ཆད་མེད་པར་ཐོན་ཡོད། ཚེས་དྲུག་ཉིན་ཕྱི་ཙམ་ལ་ལུའོ་ཧྲན་ཅི་ཡི་འགོ་འཛིན་ཁ་ལུན་པ་སིས་གསལ་བསྒྲགས་སྤེལ་ནས། རྒྱལ་ཕྲན་མཉམ་འབྲེལ་ལས་ཁུངས་ཀྱིས་ལུའོ་ཧྲན་ཅི་རུ་ཁྲིམས་འགལ་གནས་སྤོས་ཡུལ་མི་གང་བྱུང་དུ་འཚོལ་བཤེར་བྱེད་པའི་བྱ་སྤྱོད་ལ་རྒོལ་གཏམ་བཏང་བ་དང་། དེའི་ཐད་ཁོང་ཁྲོ་ཆེན་པོ་ལངས་ཡོད་ཅེས་བཤད། 

ཏང་ཤོག་ཁ་གཏད།

  སྤྱི་མཐུན་ཏང་ནས་ཡོང་བའི་ཙུང་ཐུང་ཐེ་རོན་ཕུའུ་ཡིས་ཁྲིམས་འགལ་གནས་སྤོས་བྱ་ཡུལ་ལ་རྣམ་འགྱུར་ནན་པོ་འཛིན་པ་སྟེ། ད་ལོའི་ཟླ་དང་པོའི་ཚེས་ཉི་ཤུ་ཉིན་འགན་བཞེས་དུས། ཨ་རིའི་ལྷོ་རྒྱུད་དང་མོ་ཞི་ཁོའི་མཐའ་མཚམས་སུ་རྒྱལ་ཁབ་ཀྱི་ཛ་དྲག་གི་གནས་ཚུལ་ལག་བསྟར་བྱ་རྒྱུའི་ཁྱབ་བསྒྲགས་བྱས་པ་མ་ཟད། ཁྲིམས་འགལ་སྡོད་མཁན་ཁྲི་ཕྲག་ཕྱིར་བདའ་རྒྱུའི་དམ་བཅའ་བཞག་ཡོད། ཁོང་གིས་ད་དུང་སྲིད་འཛིན་བཀའ་རྒྱར་མིང་རྟགས་བཀོད་ནས། རྒྱལ་ཕྲན་མཉམ་འབྲེལ་ལས་ཁུངས་ལ་ཁྲིམས་འགལ་གྱི་གནས་སྤོས་ཡུལ་མི་འཚོལ་འཛིན་དང་ཕྱིར་འབུད་བྱ་རྒྱུའི་རེ་བ་བཏོན་པ་རེད།

ཚེས་བདུན་ཉིན་ཐེ་རོན་ཕུའུ་ཡིས་ཁོང་གི་སྤྱི་ཚོགས་འབྲེལ་དྲ་ངོ་མའི་ཐོག གལ་ཏེ་དམངས་གཙོ་ཏང་གི་ཁོངས་མི་ཅ་ཀྲོའུ་ཡི་འགོ་ཁྲིད་ཉིའུ་སེན་དང་ལུའོ་ཧྲན་ཅི་གྲོང་ཁྱེར་གྱི་འགོ་འཛིན་པ་སིས་འགན་འཁྲི་བསྒྲུབ་མི་ཐུབ་པ་དང་། མི་ཚང་མས་ཀྱང་ཁོང་ཚོས་སྒྲུབ་ཐུབ་རྒྱུ་མིན་པ་མཐོང་ན། རྒྱལ་ཕྲན་མཉམ་འབྲེལ་སྲིད་གཞུང་གིས་དེའི་ནང་ཞུགས་ནས་ཟིང་འཁྲུག་དང་འཕྲོག་བཅོམ་གྱི་གནད་དོན་ཐག་གཅོད་བྱ་རྒྱུ་ཡིན་ཞེས་ཐ་ཚིག་བསྒྲགས་ཡོད།

ཉིའུ་སེན་གྱིས། ཐེ་རོན་ཕུའུ་ཡིས་རྒྱལ་དམངས་ཉེན་སྲུང་རུ་ཁག་བཀོད་སྒྲིག་བྱ་རྒྱུའི་ཐག་བཅད་པ་ནི་བསམ་བཞིན་དུ་ངན་སྐུལ་བྱེད་པ་ཞིག་ཡིན་པས་དུས་བབ་ཛ་དྲག་ཏུ་འགྲོ་ངེས་རེད་ཅེས་བཤད།

རྒྱལ་སྲུང་འགོ་འཛིན་ཧོ་ཀེ་སའེ་སིས་སྤྱི་ཚོགས་འབྲེལ་འདྲིས་འཕྲིན་སྦྱོར་ཐོག་རྒྱལ་ཕྲན་མཉམ་འབྲེལ་ལས་ཁུངས་དང་སྒྲིག་བཀོད་ལ་གཏུམ་སྤྱོད་དང་གཏོར་བཤིག་གི་བྱ་སྤྱོད་སྤེལ་བ་དེ་བཟོད་སྒོམ་བྱེད་མི་ཐུབ་པས། རྒྱལ་སྲུང་པུའུ་ཡིས་རྒྱལ་དམངས་ཉེན་སྲུང་རུ་ཁག་ལའོ་ཧྲན་ཅིར་འཕྲལ་མར་སྐྱོད་པར་སྐུལ་སློང་བྱེད་བཞིན་ཡོད་ཅེས་ཐ་ཚིག་བསྒྲགས་ཡོད།  གལ་ཏེ་གཏུམ་སྤྱོད་རྒྱུན་མཐུད་བྱས་ཚེ། ཅ་ཀྲོའུ་ཕེང་ཏེའར་ཏུན་མཚོ་དམག་སྐམ་འཐབ་རུ་ཁག་གི་རྟེན་གཞི་ནས་དངོས་ཞབས་མཚོ་དམག་སྐུལ་སློང་བྱ་རྒྱུ་ཡིན་པ་དང་། ཁོ་ཚོ་ཚད་མཐོའི་ཉེན་ཟོན་གྱི་རྣམ་པར་གནས་ཡོད་ཅེས་བཤད་པ་རེད།