བྲག་འགོའི་འོང་སྐོར་དམངས་སྲོལ་རིག་གནས་བྱེད་སྒོ་སྤེལ་ཉེ།

  ཟླ་བདུན་པའི་ཚེས་བཅུ་གསུམ་ཉིན་ནས་བཅུ་དྲུག་ཉིན་བར། སི་ཁྲོན་ཞིང་ཆེན་དཀར་མཛེས་ཁུལ་བྲག་འགོ་རྫོང་གིས་ས་ཆེན་དགྱེས་གླུ་ཞེས་པའི་༢༠༢༣ལོའི་བྲག་འགོའི་འོང་སྐོར་དམངས་སྲོལ་རིག་གནས་བྱེད་སྒོ་སྤེལ་རྒྱུ་རེད།

  ས་ཆེན་དགྱེས་གླུ་ཞེས་པའི་༢༠༢༣ལོའི་བྲག་འགོའི་འོང་སྐོར་དམངས་སྲོལ་རིག་གནས་བྱེད་སྒོས་འོང་སྐོར་དུས་ཆེན་གྱི་རིག་གནས་ནང་སྙིང་གཞིར་བཟུང་ནས། བྲག་འགོའི་རང་བྱུང་མཛེས་ལྗོངས་དང་ངོ་མཚར་བའི་མི་ཆོས་རིག་གནས། བྲག་འགོའི་དམངས་སྲོལ་རིག་གནས་བརྗོད་དོན་གཙོར་བྱས་པའི་མུ་འབྲེལ་བྱེད་སྒོ་སྤེལ་ཏེ། ཕྱོགས་སོ་སོ་དང་རྣམ་པ་མི་འདྲ་བའི་སྒོས་ནས་བྲག་འགོའི་མཚར་སྡུག་རྣམ་པར་བཀྲ་བའི་རིག་གནས་དང་རང་བྱུང་མཛེས་ལྗོངས་ངོམ་རྒྱུ་རེད།

  བྱེད་སྒོའི་སྐབས་སུ། བྲག་འགོ་རྫོང་གིས་ལ་གླུ་སྙན་མོ་ཏང་ལ་འབུལ་ཞེས་པའི་འགོ་ཚུགས་མཛད་སྒོའི་རིག་རྩལ་འཁྲབ་སྟོན་དང་བྲག་འགོའི་ས་ཆེན་དགྱེས་གླུ་ཞེས་པའི་བྲག་འགོའི་ལ་གླུ་འགྲན་བསྡུར།  ལ་གླུ་རོལ་དབྱངས་དུས་སྟོན་གྱི་བྱ་དགའ་གནང་བའི་མཛད་སྒོ་དང་མཇུག་བསྡུའི་མཛད་སྒོ། ཤེལ་ཆུའི་གྲོང་འགོ--བྲག་འགོ་ནམ་མཁའ་རྒྱན་གྱི་ཐང་གའི་སྒྱུ་རྩལ་འགྲེམ་སྟོན་སྐབས་དང་པོ། ས་ཆེན་དགྱེས་གླུ། ཚོན་བཀྲའི་བྲག་འགོའི་བརྗོད་དོན་གཙོ་བོའི་པར་ལེན་འགྲེམ་སྟོན། གཙང་སྟོད་སྨད་མེ་ཏོག་ཐང་གི་རྟ་རྒྱུག་དང་གཡག་རྒྱུགས་ཆེན་དགྱེས་གླུ། ཡིག་རིས་བྲག་འགོ་ཞེས་པའི་ཡིག་གཟུགས་འགྲེམ་སྟོན། བྲག་འགོ་རྫོང་ན་གཞོན་ལས་རིགས་གསར་གཏོད་གསར་འབྱེད་བགྲོ་གླེང་སྐབས་དང་པོ་སོགས་གནའ་ད་ཟུང་འབྲེལ་དང་། སྲོལ་རྒྱུན་དང་དེང་རབས་ཀྱི་སྲོག་ཞུགས་པའི་བྱེད་སྒོ་ཕུན་སུམ་ཚོགས་པ་གྲ་སྒྲིག་བྱས་ཡོད།  

  ཐེངས་འདིའི་བྱེད་སྒོར་རིག་གནས་དང་ཡུལ་སྐོར་སྤྲོ་འཆམ། འགྲེམ་སྟོན་འགྲེམ་འཚོང་། རིག་གནས་འདུ་ཚོགས་སོགས་ཁྱད་ཆོས་དུ་མ་གཞི་གཅིག་ཏུ་འདུས་པས། ངོ་མཚར་ལྟད་མོ་བགྲང་གིས་མི་ལང་ལ། རྒྱང་རིང་མགྲོན་པོས་གནས་འདིར་ཕེབས་ནས། བྲག་འགོའི་མཛེས་ལྗོངས་དང་ཟས་མཆོག འགྲེམ་སྟོན། འཁྲབ་སྟོན་སོགས་ཉམས་སུ་མྱོང་ནས། བྲག་འགོའི་དམངས་སྲོལ་རིག་གནས་ཀྱི་སྟོན་མོ་གྱ་ནོམ་པ་ལོངས་སུ་སྤྱད་ཆོག

  བྱེད་སྒོ་མི་འདྲ་བ་བཅུ་བཞིའི་ནང་། བྲག་འགོའི་ལ་གླུ་དང་བྲག་འགོའི་ཐང་ག  རྟ་དང་གཡག་རྒྱུག སྐོར་བྲོ་སོགས་ས་གནས་དམངས་སྲོལ་རིག་གནས་མང་པོ་ཡོད་ལ། དེ་མིན་ད་རུང་རླངས་འཁོར་བྱེས་བགྲོད་འགན་བསྡུར་དང་རོལ་དབྱངས་མཚན་ཚོགས་སོགས་དེང་རབས་ཀྱི་ཁྱད་ཆོས་ལྡན་པའི་བྱེད་སྒོ་བཀོད་སྒྲིག་བྱས་ཡོད་པར་མ་ཟད།   ནས་འབྲུ་ཐོན་ལས་སྤུས་མཐོའི་འཕེལ་རྒྱས་གླེང་སྟེགས་དང་ན་གཞོན་ལས་གཏོད་གླེང་སྟེགས། སྐྱེ་ལྡན་སྐྱེ་ཁམས་ཞིང་ལས་འགྲེམ་སྟོན། ཡུལ་སྐོར་མཉམ་འབྲེལ་ཆིངས་འཇོག་མཛད་སྒོ། གཟུགས་མེད་རིག་གནས་ཤུལ་བཞག་བཅར་འདྲི་སོགས་རྣམ་གྲངས་མང་པོ་སྤེལ་ནས། བྲག་འགོ་རྫོང་གི་རིག་གནས་དང་ཞིང་ལས། ཡུལ་སྐོར་མཉམ་འདྲེས་སྤུས་མཐོའི་འཕེལ་རྒྱས་སྔར་ལས་རམ་འདེགས་བྱ་རྒྱུ་རེད།

  རྒྱུས་ལོན་བྱུང་བ་ལྟར་ན། ས་ཆེན་དགྱེས་གླུ་ཞེས་པའི་༢༠༢༣ལོའི་བྲག་འགོའི་འོང་སྐོར་དམངས་སྲོལ་རིག་གནས་བྱེད་སྒོ་ནི་ཀྲུང་གུང་བྲག་འགོ་རྫོང་ཨུ་དང་བྲག་འགོ་རྫོང་མི་དམངས་སྲིད་གཞུང་གིས་གཙོ་སྒྲུབ་གནང་ཞིང་། རིག་གནས་ལ་བརྟེན་ནས་ཡུལ་སྐོར་གཏོད་པ་དང་ཡུལ་སྐོར་ལ་བརྟེན་ནས་རིག་གནས་ངོམ་པའི་འདུ་ཤེས་གཞིར་བཟུང་ནས། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་འཛིན་སྐྱོང་སྤེལ་གསུམ་དང་། བྲག་འགོའི་རྫོང་སྟུག་པའི་རིག་གནས་སྔོག་འདོན་གང་ལེགས་བྱེད་པ། བྲག་འགོའི་དམངས་སྲོལ་རིག་གནས་ཀྱི་ནང་སྙིང་ཕྱི་ལ་བསྒྲགས་ནས། བྲག་འགོ་རྫོང་གི་རིག་གནས་ཡུལ་སྐོར་ཐོན་ཁུངས་དང་སྐྱེ་ཁམས་ཐོན་ལས་དང་ཚོང་གཉེར་ཁོར་ཡུག་གི་ལེགས་ཆ་ངོམས་ནས།བྲག་འགོའི་མཚན་སྙན་གྲགས་རྒྱས་ཤིང་། རིག་གནས་ཡུལ་སྐོར་དང་ཞིང་ལས་མཉམ་འདྲེས་འཕེལ་རྒྱས་ལ་རམ་འདེགས་བྱས་ཏེ། འོང་སྐོར་དམངས་སྲོལ་རིག་གནས་བྱེད་སྒོ་འདི་མང་ཚོགས་དགའ་འཛོམས་དུས་སྟོན་དང་ཡུལ་སྐོར་བའི་འདུ་ཚོགས་ཤིག་ཏུ་བསྐྲུན་རྒྱུ་ཡིན་པས། དབྱར་ཟླ་བདུན་པར་ང་ཚོ་བྲག་འགོར་འཛོམས་ནས། དབྱིག་འཛིན་སྒེག་མོའི་ཕང་བ་ནས་གླུ་གར་རྩེད་འཇོ་རོལ་ཆོག ། 

གསར་འགོད་པ།  ལྷ་མོ་བཀྲ་ཤིས།

རྩོམ་སྒྲིག་པ། ལྷ་མོ་བཀྲ་ཤིས།

ཞུ་དག པ་སངས་རྡོ་རྗེ།